Rahmanullah Gurbaz : விராட் கோலியை தூக்கி சாப்பிட்ட குர்பாஸ்! இப்படி ஒரு சாதனையா..

Rahmanullah Gurbaz : 22 வயதில் அதிக சதங்களை அடித்து விராட் கோலியின் சாதனையை ரஹ்மானுல்லா குர்பாஸ் முறியடித்துள்ளார்.

ரஹ்மானுல்லா குர்பாஸ்

Source : Twitter

வங்கதேச அணிக்கு எதிரான போட்டியில் சதம் அடித்து விராட் கோலியின் சாதனையை முறியடித்திருக்கிறார் ஆப்கானிஸ்தான் அணி துவக்க ஆட்டக்காரர்  ரஹ்மானுல்லா குர்பாஸ். இந்த சாதனையை தனது 23 வயதில் படைத்திருக்கிறார் குர்பாஸ். 

வங்கதேச தொடர்:

வங்கதேசம் மற்றும் ஆப்கானிஸ்தான் அணிகளுக்கு இடையேயான மூன்று போட்டிகள் கொண்ட ஒரு நாள் தொடர் நடைப்பெற்றது. இதில் முதல் போட்டியை ஆப்கானிஸ்தான் அணி 92 ரன்கள் வித்தியாசத்தில் வெற்றி பெற்றிருந்தத நிலையில் இரண்டாவது போட்டியை வங்கதேசம் அணி 68 ரன்கள் வித்தியாசத்தில் வெற்றி பெற்றது. 

தொடரை தீர்மானிக்கும் மூன்றாவது ஒருநாள் போட்டி நேற்று சார்ஜாவில் நடைப்பெற்றது. டாஸ் ஜெயித்து முதலில் பேட்டிங் செய்த வங்கதேச அணி 50 ஓவர்கள் முடிவில் 8 விக்கெட் இழப்புக்கு 244 ரன்களை எடுத்தது. அந்த் அணியில் அதிகபட்சமாக மஹ்மத்துல்லா 98 ரன்களும், கேப்டன் மெஹதி ஹசன் 66 ரன்களும் எடுத்தார். 

இலக்கை துரத்திய ஆப்கானிஸ்தான் 49வது ஓவரில் இலக்கை துரத்தி பிடித்து தொடரையும் வென்றது. ஆப்கான் அணியில் அதிகபட்சமாக துவக்க ஆட்டக்காரர் ரஹ்மானுல்லா குர்பாஸ் அதிரடியாக ஆடி  சதமடித்தார். 

இதையும் படியுங்கள்:Champions Trophy 2025 : சாம்பியன்ஸ் டிராபி தொடர்.. செக் வைக்கும் பாகிஸ்தான்.. அதிர்ச்சியில் ஐசிசி

கோலி சாதனை முறியடிப்பு :

இந்த சதத்தின் மூலம் ரஹ்மானுல்லா குர்பாஸ் பல சாதனைகளை முறியடித்துள்ளார். குறிப்பாக 23 வயதுக்குள் அதிக சதங்களை அடித்த வீரர் என்ற சாதனையை லிட்டில் மாஸ்டர் சச்சின் மற்றும் தென் ஆப்பிரிக்கா வீரர் குவிண்டன் டி காக் ஆகியோருடன் பகிர்ந்துள்ளார் குர்பாஸ். மூவரும் தங்கள் 23 வயதில் 8 சதங்களை விளாசியுள்ளனர் என்பது குறிப்பிடத்தக்கது. இந்த பட்டியலில் இந்திய அணி வீரர் விராட் கோலி இரண்டாம் இடத்தில் உள்ளார். விராட் கோலி தனது 23வது வயதில் ஏழு சதங்களை விளாசி தள்ளிய நிலையில் அந்த சாதனையை குர்பாஸ் தற்போது உடைத்துள்ளார். 

சாதனை மேல் சாதனை:

இது மட்டுமில்லாமல் ஆப்கான் அணிக்காக ஒரு நாள் போட்டிகளில் அதிக சதங்கள் அடித்த வீரர் சாதனையும் அவரது பெயரில் இடம்பெற்றுள்ளது. இதற்கு முன்னால் ஆப்கான் வீரர் முகமது ஷாசாத் ஆப்கானிஸ்தான் அணிக்காக 6 சதங்கள் அடித்திருந்தார், அந்த சாதனையையும் தற்போது ரஹ்மானுல்லா குர்பாஸ் முறியடித்துள்ளார். 

இந்த ஆண்டில் மட்டும் அவர் ஒரு நாள் போட்டிகளில் ஆப்கானிஸ்தான் அணிக்காக மூன்று சதங்களை அடித்துள்ளார். குர்பாசின் இந்த சதத்தின் மூலம் ஆப்கானிஸ்தான் அணி வங்கதேச அணிக்கு எதிரான தொடரை 2-1 கணக்கில் வென்று அசத்தியது. இந்த ஆட்டத்தில் பேட்டிங்கில் 70 ரன்கள் மற்றும் பெளலிங்கில் 4 விக்கெட்டுகளை எடுத்து அசத்திய ஆல்ரவுண்டர் ஒமர்சாய் ஆட்ட நாயகன் விருதை பெற்றார்.