SMP Vs BT: தொடரை விட்டு வெளியேறிய திருச்சி...அமர்க்களமாக ஆடி ஹாட்ரிக் வெற்றி பெற்ற மதுரை!

7வது சீசன் டி.என்.பி.எல் போட்டி சேலம் அடுத்த வாழப்பாடியில் நடந்து வருகிறது. நேற்று நடந்த 21 வது லீக் போட்டியில் திருச்சி அணி மதுரை பாந்தர்ஸ் அணியை எதிர்கொண்டது. சிறப்பக விளையாடிய மதுரை வெற்றி பெற்றது.

வெற்றி பெற்ற மதுரை பாந்தர்ஸ் அணி

7வது சீசன் டி.என்.பி.எல் போட்டி சேலம் அடுத்த வாழப்பாடியில் நடந்து வருகிறது. நேற்று நடந்த 21 வது லீக் போட்டியில் திருச்சி அணி மதுரை பாந்தர்ஸ் அணியை எதிர்கொண்டது. டாஸ் வென்ற திருச்சி அணி முதலில் பேட்டிங் செய்ய முன்வந்தது.

ஆரம்பம் முதலே திருச்சி அணியின் மீது ஆதிக்கம் செலுத்தி வந்தனர் மதுரை அணியின் பந்துவீச்சாளர்கள். திருச்சி அணியின் கேப்டனும், தொடக்க ஆட்டக்காரருமான கங்கா ஸ்ரீதர் ராஜு முதல் பந்திலேயே அவுட் ஆனார்.

பிரான்சிஸ் ரோகின்ஸ் (18), மணி பாரதி(48), டேரில் பெராரியோ(21) ஆகிய மூவரை தவிர களமிறங்கிய அனைவரும் இரட்டை இலக்கை தொடவில்லை. 18.5 ஓவரில் அனைத்து விக்கெட்டுகளையும் இழந்து 105 ரன்கள் மட்டுமே எடுத்திருந்தது திருச்சி.

எளிமையான இலக்கை நோக்கி இரண்டாவது இன்னிங்ஸை தொடங்கிய மதுரை அணி ஆரம்பம் முதலே நிதானமாக ஆடியது.

தொடக்க ஆட்டக்காரரான ஹரி நிஷாந்த் 11 ரன்களில் ஆட்டமிழந்தார். பின்னர் களம் இறங்கிய வீரர்களும் நிதானமாகவே ஆடினர். குறிப்பிட்ட இடைவேளையில் விக்கெட்டுகள் சரிந்தாலும், ரன் வேகம் சரியவில்லை.

இதனால் மதுரை அணி 17 ஓவரில் 3 விக்கெட் இழப்புக்கு 108 ரன்கள் எடுத்து வெற்றி பெற்றது. இந்த வெற்றியின் மூலம் மதுரை புள்ளி பட்டியலில் நான்காம் இடத்திற்கு முன்னேறியுள்ளது.