China New Weapons: செதறடிவிட்ட சீனா; பிரமாண்ட ராணுவ அணிவகுப்பில் இடம்பெற்ற நவீன ஆயுதங்கள் என்னென்ன தெரியுமா.?

China Military Parade 2025: சீனாவில் இன்று நடைபெற்ற பிரமாண்ட ராணுவ அணிவகுப்பில், என்னென்ன ஆயுதங்கள் காட்சிப்படுத்தப்பட்டன என்று தெரியுமா.? அந்த நவீன ஆயுதங்கள் பற்றி தற்போது பார்க்கலாம்.

அணிவகுப்பில் ராணுவ பலத்தை காட்டிய சீனா

Source : PTI

இரண்டாம் உலகப் போர் நிறைவடைந்ததன் 80 ஆண்டுகளை குறிக்கும் விதமாக, இன்று சீனாவில் பிரமாண்ட ராணுவ அணிவகுப்பு நடைபெற்றது. ரஷ்ய அதிபர் புதின், வட கொரிய அதிபர் கிம் ஜாங் உன் உள்ளிட்ட 26 நாடுகளின் தலைவர்கள் சிறப்பு விருந்தினர்களாக இந்த அணிவகுப்பில் பங்கேற்று பார்வையிட்டனர். இந்நிலையில், இந்த ராணுவ அணிவகுப்பில் இடம்பெற்ற நவீன ஆயுதங்கள் குறித்து தான் தற்போது பார்க்கப் போகிறோம்.

அணிவகுப்பில் காட்சிப்படுத்தப்பட்ட ஏவுகணைகள்

கடல், நிலம் மற்றும் வான்வழியாக ஏவக்கூடிய அணுசக்தி திறன் கொண்ட ஏவுகணைகளை சீனா இந்த ராணுவ அணிவகுப்பில் அறிமுகப்படுத்தியது. இது முதல் முறையாக அணுசக்திக்கு தயாராக இருக்கும் அதன் "முக்கூட்டு" திறன்களை காட்டியது.

இந்த ஏவுகணைகளில், வான்வழி, நீண்ட தூர ஏவுகணை ஜிங்லீ-1, நீர்மூழ்கிக் கப்பலில் இருந்து ஏவப்படும் கண்டம் விட்டு கண்டம் பாயும் ஏவுகணை ஜூலாங்-3 மற்றும் நில அடிப்படையிலான கண்டம் விட்டு கண்டம் பாயும் ஏவுகணைகளான டோங்ஃபெங்-61 (DF-61) மற்றும் டோங்ஃபெங்-31 ஆகியவையும் அடங்கும். இவை நாட்டின் இறையாண்மை மற்றும் கண்ணியத்தைப் பாதுகாக்க சீனாவின் மூலோபாய "ஏஸ்" சக்தியாகும் என்று செய்தி வெளியிடப்பட்டுள்ளது.

இன்று காட்சிபடுத்தப்பட்ட டோங்ஃபெங்-5C (DF-5C) என்பது 1970-களில் சீனா தொடங்கிய ஏவுகணைத் திட்டத்தின் சமீபத்திய பதிப்பு என தெரிவிக்கப்பட்டுள்ளது. இந்த ஏவுகணை, திரவ எரிபொருளால் இயக்கப்படுகிறது மற்றும் ஒரே இலக்கில் பல, சுயாதீனமான போர்முனைகளை ஏவும் திறன் கொண்டது.

இந்த பிரமாண்ட ராணுவ அணிவகுப்பில், அமெரிக்க விமானம் தாங்கிக் கப்பல்களின் மாதிரிகளுக்கு எதிராக சீனா முன்னர் சோதித்த ஹைப்பர்சோனிக் கப்பல் எதிர்ப்பு ஏவுகணைகளும் இடம்பெற்றன. அவற்றில் யிங்ஜி-19, யிங்ஜி-17 மற்றும் யிங்ஜி-20 ஆகியவை அடங்கும்.

அணிவகுப்பில் இடம்பெற்ற மற்ற ஏவுகணைகளில், சாங்ஜியன்-20A, யிங்ஜி-18C, சாங்ஜியன்-1000 ஆகிய கப்பல் ஏவுகணைகளும், சீனாவின் அரசு ஊடகங்கள் "அனைத்து வானிலை போர் திறன்களையும்" கொண்டதாக கூறிய யிங்ஜி-21, டோங்ஃபெங்-17 மற்றும் டோங்ஃபெங்-26D ஆகிய ஹைப்பர்சோனிக் ஏவுகணைகளும் அடங்கும்.

அணிவகுப்பில இடம்பெற்ற லேசர் ஆயுதங்கள்

சீனா, ட்ரோன் தாக்குதல்களுக்கு எதிரான பாதுகாப்பு கவசமாக லேசர் ஆயுதங்களை உருவாக்கி வருகிறது. அணிவகுப்பில் காட்சிப்படுத்தப்பட்ட அதன் ட்ரோன் எதிர்ப்பு அமைப்புகளின் முழு அளவிலான ஆயுதங்களில், ஏவுகணை துப்பாக்கி, உயர் ஆற்றல் லேசர் ஆயுதங்கள் மற்றும் உயர் சக்தி மைக்ரோவேவ் ஆயுதங்கள் ஆகியவை அடங்கும்.

மக்கள் விடுதலை ராணுவத்தின் ட்ரோன் எதிர்ப்பு அமைப்புகளில், அது ஒரு "முக்கூட்டை" பிரதிநிதித்துவப்படுத்துவதாக அந்நாட்டு ஊடகங்கள் தெரிவித்துள்ளன.

அணிவகுப்பில் இடம்பெற்ற ட்ரோன்கள்

இந்த ராணுவ அணிவகுப்பில், நீரிலும் ஆகாயத்திலும் இயங்கக்கூடிய ட்ரோன்களை சீனா காட்சிப்படுத்தியது, இதில் உளவு பார்க்கவும், இலக்குகளை தாக்கவும் பயன்படுத்தக்கூடிய ட்ரோன்களும் அடங்கும். கப்பல்களில் இருந்து ஏவப்படும் வகையில் வடிவமைக்கப்பட்ட ஆளில்லா ஹெலிகாப்டர்களும் இந்த அணிவகுப்பில் இடம்பெற்றிருந்தன.

கடல் சார்ந்த அமைப்புகள்

கடல் சார்ந்த அமைப்புகளில் நீர்மூழ்கிக் கப்பல்கள், மேற்பரப்பு கப்பல்கள் மற்றும் ஒரு சுரங்க அமைப்பு ஆகியவை அடங்கும்.

ஆக மொத்தத்தில், இந்த ராணுவ அணிவகுப்பின் மூலம், சீனா தன்னிடம் உள்ள சக்திவாய்ந்த ஆயுதங்களை வெளி உலகிற்கு அறிமுகப்படுத்தியுள்ளது. எல்லாம் ஒரு எச்சரிக்கை விடுக்கத்தான்...