IND vs NZ 1st T20: அபிஷேக் சிக்ஸர் மழை.. ரிங்கு காட்டடி..! 239 ரன்களை எட்டுமா நியூசிலாந்து?
IND vs NZ 1st T20: அபிஷேக் சர்மா அதிரடி சதம், கடைசி நேர ரிங்குசிங் பேட்டிங்கால் இந்திய அணி 238 ரன்களை குவித்துள்ளது.
இந்தியா வந்துள்ள நியூசிலாந்து அணி ஒருநாள் தொடரை கைப்பற்றிய நிலையி்ல், இரு அணிகளும் மோதிய முதல் டி20 போட்டி இன்று நாக்பூரில் நடைபெற்று வருகிறது. இந்த போட்டியில் டாஸ் வென்ற நியூசிலாந்து கேப்டன் சான்ட்னர் இந்திய கேப்டன் சூர்யகுமார் யாதவை பேட்டிங் செய்ய அழைத்தார்.
காட்டடி அடித்த அபிஷேக் சர்மா:
மைதானம் பேட்டிங்கிற்கு ஒத்துழைத்ததால் தொடக்க வீரர்கள் சாம்சன் - அபிஷேக் சர்மா இருவரும் அதிரடியாகவே ஆட்டத்தை ஆரம்பித்தனர், சாம்சன் 7 பந்துகளில் 2 பவுண்டரியுடன் 10 ரன்கள் எடுத்த நிலையில் அவுட்டானார். அடுத்து வந்த இஷான் கிஷான் முதல் பந்திலே பவுண்டரியுடன் பேட்டிங்கைத் தொடங்க, அவர் 5 பந்துகளில் 2 பவுண்டரியுடன் 8 ரன்கள் எடுத்து அவுட்டானார்.
27 ரன்களுக்குள் 2 விக்கெட் விழுந்த நிலையில், கேப்டன் சூர்யகுமார் யாதவ் - தொடக்க வீரர் அபிஷேக் சர்மா ஜோடி சேர்ந்தனர். விக்கெட் விழுந்ததைப் பற்றி எல்லாம் கவலைப்படாமல் அபிஷேக் சர்மா பவுண்டரிகளும், சிக்ஸர்களும் விளாசினார். அவருக்கு கேப்டன் சூர்யகுமார் யாதவும் பவுண்டரிகள் விளாசி ஒத்துழைப்பு அளித்தார்.
84 ரன்கள்:
ஜேக்கப் டஃபி மட்டும் சற்று சவால் அளிக்க, ஜேமிசன், கிளார்க், சோதி பந்துகளை அபிஷேக் சர்மா சிக்ஸருக்கும், பவுண்டரிக்கும் அனுப்பினார். இதனால், இந்தியாவின் ஸ்கோர் ஜெட் வேகத்தில் ஏறியது. சிறப்பாக ஆடிய அபிஷேக் சர்மா அரைசதம் கடந்தார். சிறப்பாக ஆடிய இந்த ஜோடி 11வது ஓவரில் பிரிந்தது. சூர்யகுமார் யாதவ் 22 பந்துகளில் 4 பவுண்டரி 1 சிக்ஸருடன் 32 ரன்கள் எடுத்து அவுட்டானார்.
அடுத்து வந்த ஹர்திக் பாண்ட்யாவும் அதிரடி காட்ட, அரைசதம் கடந்து சதத்தை நோக்கி சென்ற அபிஷேக் சர்மா சோதி பந்தில் அவுட்டானார். அவர் 35 பந்துகளில் 5 பவுண்டரி 8 சிக்ஸருடன் 84 ரன்கள் எடுத்து அவுட்டானார். அவர் ஆட்டமிழந்த சில நிமிடங்களில் அதிரடியாக காட்டிய ஹர்திக் பாண்ட்யாவும் 16 பந்துகளில் 3 பவுண்டரி 1 சிக்ஸருடன் 25 ரன்கள் எடுத்து அவுட்டானார்.
ரிங்குசிங் அதிரடி:
கடைசி கட்டத்தில் இந்திய அணிக்காக ரிங்குசிங் அதிரடியாக ஆடினார். டேரில் மிட்செல் வீசிய கடைசி ஓவரில் மட்டும் ரிங்குசிங் 20 ரன்களை விளாசினார். ரிங்குசிங் 20 பந்துகளில் 3 பவுண்டரி 4 சிக்ஸருடன் 44 ரன்கள் எடுத்து ஆட்டமிழக்காமல் இருந்தார். இதனால், இந்திய அணி 20 ஓவர்களில் 238 ரன்களை எடுத்துள்ளது. 239 ரன்கள் என்ற இலக்குடன் நியூசிலாந்து அணி களமிறங்கியுள்ளது.
நியூசிலாந்து அணிக்காக ஜேக்கப் டஃபி சிறப்பாக பந்துவீசினார். பேட்டிங்கிற்கு ஒத்துழைக்கும் இந்த மைதானத்தில் அவர் 4 ஓவர்களில் 27 ரன்கள் மட்டுமே விட்டுக்கொடுத்தார். 2 விக்கெட்டுகளை கைப்பற்றினார். ஜேமிசன் 4 ஓவர்களில் 54 ரன்களையும், கிளார்க் 4 ஓவர்களில் 40 ரன்களையும் விட்டுக்கொடுத்தனர். நியூசிலாந்தும் வலுவான பேட்டிங் வைத்திருந்தாலும் பும்ரா, அர்ஷ்தீப்சிங், அக்ஷர் படேல், ஹர்திக் பாண்ட்யா, வருண் பந்துவீச்சில் நெருக்கடி தருவார்கள் என்று எதிர்பார்க்கப்படுகிறது.
தலைப்பு செய்திகள்
ட்ரெண்டிங் செய்திகள்
