சென்னை சொகுசு கப்பலை புதுச்சேரியில் அனுமதிக்காதது ஏன்..? - ஆளுநர் தமிழிசை விளக்கம்
சென்னை சுற்றுலா சொகுசு கப்பல் புதுச்சேரி வருவதற்கு மாநில அரசு அனுமதிக்கவில்லை, வேண்டாம் என்று முடிவு செய்யப்பட்டுள்ளது என்று துணைநிலை ஆளுநர் தமிழிசை செளந்தரராஜன் விளக்கம்
சென்னை சுற்றுலா சொகுசுக் கப்பல் புதுச்சேரி வருவதற்கு மாநில அரசு அனுமதிக்கவில்லை, வேண்டாம் என்று முடிவு செய்யப்பட்டுள்ளது என்று துணைநிலை ஆளுநர் தமிழிசை செளந்தரராஜன் விளக்கம் அளித்துள்ளார்.
ஸ்ரீ பாலாஜி வித்யாபீடத்தின் யோகா சிகிச்சைக் கல்வி மற்றும் ஆராய்ச்சி நிறுவனம் மற்றும் மத்திய ஆயுஷ் அமைச்சகத்தின் மொரார்ஜி தேசாய் தேசிய யோகா நிறுவனம் ஆகியவை இணைந்து நடத்தும் சர்வதேச யோகா தின விழாவிற்கான முன்னோட்ட நிகழ்ச்சி புதுவை கடற்கரை சாலையில் இன்று நடைபெற்றது. ஆளுநர் தமிழிசை நிகழ்ச்சியை தொடங்கி வைத்து யோகக் கலை வல்லுநர்கள் பயிற்சியாளர்கள், பழகுநர்கள் ஆகியோருடன் இணைந்து யோகா பயிற்சியில் ஈடுபட்டார்.
நிகழ்ச்சியில் ஆளுநர் தமிழிசை பேசுகையில், பிரதமர் ஜூன் 21ஆம் தேதியை உலக யோகா தினமாகக் கொண்டாட வேண்டும் என்ற கருத்தை ஐக்கிய நாடுகள் சபை மாநாட்டில் முன்வைத்து அதனை கொண்டாட ஏற்பாடு செய்தார். பல ஆயிரம் ஆண்டுகளுக்கு முன்னாள் இந்தியாவில் உதித்த யோகக் கலை இன்று உலகம் முழுவதும் பரவி, சென்ற ஆண்டு மட்டும் 199 நாடுகள் இந்த யோகா தினத்தை ஜூன் 21-ம் தேதி கொண்டாடினர். இதில் 33 நாடுகள் இஸ்லாமிய நாடுகள். எல்லோரும் யோகக் கலையை ஏற்றுக் கொண்டிருக்கிறார்கள்.
யோகக் கலை வாழ்வியலை செழுமைப்படுத்துகிறது. வாழ்க்கையில் சவாலையும் சந்திக்க வேண்டுமென்றால் உடல் வேகமாக இருக்க வேண்டும் மனம் அமைதியாக இருக்க வேண்டும். அதனை இந்த யோகா பயிற்சி தருகிறது. யோகா காலை வாழ்க்கையில் ஒரு புத்துணர்ச்சியை ஏற்படுத்துகிறது. யோகா செய்யும்போது உடலின் தசை நார்கள் பயிற்சி பெறுகிறது பலப்படுகிறது. பெற்றோர்கள் அனைவரும் 5 வயதில் இருந்தே குழந்தைகளுக்கு யோகக் கலையை பயிற்றுவிக்க வேண்டும். யோகா சொல்லிக் கொடுத்தால் கட்டுப்பாட்டோடு அறிவாளிகளாக பிள்ளைகள் வளர்வார்கள். படிக்கும் பருவத்தில் யோகா பயிற்சி நினைவாற்றலை கவனத்தை அதிகரிக்கும். தீபாவளி, பொங்கலை விழாக்களாக கொண்டாடி வருகிறோம். உடல்நலத்தைப் பாதுகாக்கும் யோகா தினமும் விழாவாக எல்லோரும் கொண்டாட வேண்டும் என்பதை வருங்கால சந்ததியினருக்கு சொல்லிக் கொடுக்க வேண்டும் என்று குறிப்பிட்டார்.
சொகுசு கப்பல் புதுச்சேரியில் அனுமதிக்காதது தொடர்பாக செய்தியாளர்களிடம் ஆளுநர் தமிழிசை கூறியதாவது:- கடலில் சர்வதேச எல்லை, இந்திய எல்லை மற்றும் மாநில எல்லை என்று தனியாக எல்லைகள் உள்ளன. புதுச்சேரி வந்த சொகுசு கப்பலில் உள்ள சில நிகழ்வுகளுக்கு இங்குள்ள அரசியல் கட்சிகள் எதிர்ப்பு தெரிவித்தால், அதற்கு அனுமதி வழங்க தயக்கம் காட்டினோம். சுற்றுலாவை மேம்படுத்த வேண்டும் என்பது மாநில அரசு எண்ணம். அதேநேரத்தில் அந்தந்த மாநிலத்திற்கு ஏற்றார்போல் முடிவு எடுக்க வேண்டும். சொகுசு கப்பலுக்கு அனுமதி வழங்குவதற்கு சில வழிமுறைகள் உள்ளது. அந்த சொகுசு கப்பலில் இருக்கும் அம்சங்களுக்கு பல்வேறு தரப்பில் இருந்து எதிர்ப்பு தெரிவிப்பதால் மாநில அரசு அனுமதி வழங்கவில்லை. அது நம்முடைய மாநிலத்திற்கு வேண்டாம் என்று அரசு முடிவு செய்துள்ளது என்றார்.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்
தலைப்பு செய்திகள்
ட்ரெண்டிங் செய்திகள்
