நிழல் இல்லா அதிசயம்: திருச்சியில் வானம் காட்டிய வியப்பு

சூரியன் சரியாக உச்சி வானிற்கு வரும்போது, அதாவது அதன் அச்சு பூமிக்குச் செங்குத்தாக (90 டிகிரி கோணத்தில்) அமையும் போது 'நிழல் இல்லா நாள்' ஏற்படுகிறது.

திருச்சி அண்ணா அறிவியல் மையம் 

Source : Abpnadu Original

தஞ்சாவூர்: என்னது திருச்சியில் நிழல் இல்லாத நாளா? என்ற கேள்வி எழுகிறதா. ஆனால் இந்த வானியல் அதிசயத்தை அண்ணா அறிவியல் மையம் விளக்கி உள்ளது. இது ஆண்டுக்கு 2 முறைதான் நிகழும் என்பதும் குறிப்பிடத்தக்கது.

திருச்சியில் உள்ள அண்ணா அறிவியல் மையக் கோளரங்கத்தில், 'நிழல் இல்லா நாள்' எனும் அரிதான வானியல் நிகழ்வைக் குறிக்கும் வகையில் சிறப்பு விழிப்புணர்வு நிகழ்ச்சி நடைபெற்றது. பொதுமக்களுக்கும், குறிப்பாக மாணவர்களுக்கும் வானியல் குறித்த ஆர்வத்தை ஏற்படுத்தவும், சூரியனின் இயக்கத்தைப் பற்றிய அறிவியல் உண்மைகளை விளக்கவும் இந்த நிகழ்ச்சிக்கு ஏற்பாடு செய்யப்பட்டிருந்தது. இயற்கையின் இந்த வியக்கத்தக்க மாற்றத்தை நேரடிச் சோதனைகள் மூலம் பார்வையாளர்கள் கண்டு வியந்தனர்… மகிழ்ந்தனர் என்பதும் குறிப்பிடத்தக்கது.

சூரியன் சரியாக உச்சி வானிற்கு வரும்போது, அதாவது அதன் அச்சு பூமிக்குச் செங்குத்தாக (90 டிகிரி கோணத்தில்) அமையும் போது 'நிழல் இல்லா நாள்' ஏற்படுகிறது. சூரிய மதிய வேளையில் சூரியன் அதன் உச்சநிலையை அடையும் போது, குச்சிகள், தூண்கள் அல்லது மனிதர்கள் போன்ற செங்குத்தான பொருட்களின் நிழல் பக்கவாட்டில் விழாமல், சரியாக அந்தப் பொருளின் அடியிலேயே விழும். இதனால் அந்தப் பொருளுக்கு நிழல் இல்லாதது போன்ற ஒரு மாயத் தோற்றம் உருவாகிறது. இது பூமியின் அச்சு சாய்வு மற்றும் சூரியனைச் சுற்றியுள்ள அதன் சுற்றுப்பாதை காரணமாக நிகழும் ஒரு காலமுறை நிகழ்வாகும்.

திருச்சியைப் பொறுத்தவரை, உள்ளூர் சூரிய மத்தியான நேரம் என்பது மதியம் சுமார் 12.10 மணி அளவில் அமையும். ஒவ்வொரு ஆண்டும் இதில் மிகச் சிறிய மாற்றங்கள் இருக்கலாம் என்று நிபுணர்கள் தரப்பில் தெரிவிக்கின்றனர். சுமார் 10.79 டிகிரி வடக்கு அட்சரேகையில் அமைந்துள்ள திருச்சி மாவட்டம், ஆண்டுக்கு இரண்டு முறை இந்த நிழல் இல்லா நாளை அனுபவிக்கிறது. வழக்கமாக ஏப்ரல் 18 மற்றும் ஆகஸ்ட் 24 ஆகிய தேதிகளில் இந்த அதிசயம் நிகழும் என்று கோளரங்க வல்லுநர்கள் விளக்கினர். கடக ரேகை மற்றும் மகர ரேகைக்கு இடைப்பட்ட பகுதிகளில் வசிக்கும் மக்கள் மட்டுமே இந்த அரிய நிகழ்வை ஆண்டுக்கு இருமுறை காண முடியும் என்பது குறிப்பிடத்தக்கது.

இந்த விழிப்புணர்வு நிகழ்ச்சியின் ஒரு பகுதியாக, மாணவர்களுக்கும் பார்வையாளர்களுக்கும் நேரடிச் செய்முறை விளக்கங்கள் அளிக்கப்பட்டன. திறந்தவெளியில் செங்குத்தான கம்புகளை நட்டு வைத்து, மதியம் 12.10 மணி அளவில் அவற்றின் நிழல் மறைவதை பொதுமக்கள் அனைவரும் நேரடியாகக் கண்டனர். சூரியனின் நகர்விற்கும், பூமியின் அட்சரேகைக்கும் இடையிலான தொடர்பை விளக்கும் ஊடாடும் அமர்வுகளும் (Interactive Sessions) நடத்தப்பட்டன. இதன் மூலம், பாடப்புத்தகங்களில் படிக்கும் அறிவியல் கோட்பாடுகள் எவ்வாறு நிஜ வாழ்க்கையில் பிரதிபலிக்கின்றன என்பதை மாணவர்கள் எளிதில் புரிந்துகொள்ள இந்த நிகழ்ச்சி மிகவும் உதவிகரமாக இருந்தது.

சூரிய வடிவியல் மற்றும் அது நம் பகுதியில் ஏற்படுத்தும் தனித்துவமான விளைவுகள் குறித்து மக்களிடையே அறிவியல் பூர்வமான விழிப்புணர்வை உருவாக்குவதே இந்த நிகழ்ச்சியின் முதன்மை நோக்கமாகும். இயற்கையின் மாற்றங்களை அறிவியலின் துணை கொண்டு அணுகுவதற்கு இது போன்ற நிகழ்ச்சிகள் பெரிதும் உதவுகின்றன. அண்ணா அறிவியல் மையம் நடத்திய இந்த முன்னெடுப்பு, எதிர்காலத் தலைமுறையினரிடையே வானியல் மற்றும் விண்வெளி அறிவியல் மீதான ஆர்வத்தை அதிகரித்துள்ளதாகச் சமூக ஆர்வலர்கள் பாராட்டுத் தெரிவித்துள்ளனர்.