மயிலாடுதுறையில் மாஸ்க் அணியாதவர்களின் காலில் விழுந்த பேரூராட்சி ஊழியர்

முகக்கவசம் அணியாதவர்களின் காலில் விழுந்து வேண்டுகோள் விடுத்திருக்கிறார் பேரூராட்சி ஊழியர் ஒருவர்.

காலில் விழுந்த பேரூராட்சி ஊழியர்

மயிலாடுதுறை அருகே முகக்கவசம் அணியாதவர்களின் காலில் விழுந்து வேண்டுகோள் விடுத்த மணல்மேடு பேரூராட்சி ஊழியரின் வீடியோ சமூக வலைதளங்களில் வைரலாகி வருகிறது. கொரோனா வைரஸ் பரவல் தமிழகத்தில் நாளுக்கு நாள் தீவிரமடைந்து வரும் நிலையில் மே 24-ஆம் தேதி வரை தளர்வுகளுடன் கூடிய ஊரடங்கு உத்தரவை அரசு பிறப்பித்தது. இருந்தும் பொதுமக்கள் பெரும்பாலானோர் ஊரடங்கு உத்தரவை சிறிதும் மதிக்காமல் வீதிகளில் வலம்வந்த வண்ணம் இருந்தனர். இதனால் கொரோனா வைரஸ் பரவலை கட்டுப்படுத்த முடியாத சூழல் ஏற்பட்டுள்ளது. இதனையடுத்து நாளை முதல் தளர்வுகள் அற்ற முழு ஊரடங்கு உத்தரவு ஒரு வார காலத்திற்கு தமிழக அரசு பிறப்பித்துள்ளது.

இந்நிலையில் ஒருங்கிணைந்த நாகை மற்றும் மயிலாடுதுறை மாவட்டத்தில் கொரோனா வைரஸ் தொற்றால் இதுநாள் வரை 23 ஆயிரத்து 57 பேர் பாதிக்கப்பட்டு, 18 ஆயிரத்து 418 குணமடைந்துள்ளனர். மேலும் சிகிச்சை பலனின்றி 271 பேர் பலியான நிலையில் மயிலாடுதுறை சீர்காழி புத்தூர் வேதாரண்யம் நாகப்பட்டினம் உள்ளிட்ட பல்வேறு இடங்களில் மருத்துவமனைகள் கொரோனா சிகிச்சை மையங்களில் 4 ஆயிரத்து 368 பேர் சிகிச்சை பெற்று வருகின்றனர்.

இந்தநிலையில் மணல்மேடு கடைவீதியில் முகக்கவசம் அணியாமல் சென்றவர்களின் காலில் விழுந்து பேரூராட்சி பொது சுகாதார மேற்பார்வையாளர் முகக்கவசம் அணிய வலியுறுத்திய காட்சி சமூக வலைதளங்களில் வைரலாக பரவிவருகிறது.  மயிலாடுதுறை மாவட்டம் மணல்மேடு பேரூராட்சியில் 40 பேருக்கு கொரோனா தொற்று உறுதி செய்யப்பட்டு சிகிச்சையில் உள்ளனர். மேலும் 3 பேர் சிகிச்சை பலனின்றி உயிரிழந்துள்ளனர். 

இதனால் அரசின் வழிகாட்டு நெறிமுறைகளை பின்பற்ற மணல்மேடு பேரூராட்சி சார்பில் தினந்தோறும் ஆட்டோவில் ஒலிபெருக்கி மூலம் வலியுறுத்தி வருகின்றனர். முகக்கவசம் அணியாதவர்களுக்கு அபராதமும் விதிக்கப்பட்டு வருகிறது. இந்த சூழலில், தமிழக அரசு திங்கட்கிழமை முதல் ஒரு வாரத்துக்கு தளர்வுகள் அற்ற பொதுமுடக்கத்தை அறிவித்ததையடுத்து, மணல்மேடு பேரூராட்சியில் கடைகள் திறக்கப்பட்டு, அத்தியாவசிய பொருள்கள் வாங்க பொதுமக்கள் கடைவீதிகளில் முண்டியடித்தனர். அப்போது முகக்கவசம் அணியாமல் கடைவீதிக்கு வந்தவர்களை மணல்மேடு பேரூராட்சி பொது சுகாதார மேற்பார்வையாளர் சாமிநாதன் என்பவர் தடுத்து நிறுத்தி, ஏன் முகக்கவசம் அணியவில்லை? என்று கேள்வி எழுப்பி, முகக்கவசம் அணியாமல் வந்தவர்களின் கால்களில் விழுந்து, கைகூப்பி வணங்கி முகக்கவசம் அணியாததால் ஏற்படும் உயிரிழப்புகள் குறித்து எடுத்துரைத்து முகக்கவசத்தை வழங்கி அணிந்துகொள்ளச் செய்துள்ளார். போலீசார் ஊரடங்கு மீறி வெளியில் சுற்றுபவர்களையும், முகக்கவசம் அணியாமல் வருபவர்களை கடுமையாக கண்டித்தும் மாற்றம் ஏற்படாத சூழலில், இவர் காலில் விழுந்து முகக்கவசம் அணிய செய்தது, முகக்கவசம் அணியாமல் வந்தவர்களை மன உறுத்தலுடன் குற்றவுணர்வுக்கு ஆளாகி அவர்கள் இனி எப்போதும் முகக்கவசத்தை மறக்காத வண்ணம் அமைந்துள்ளதாக அந்த வீடியோ சமூக வலைதளங்களில் கண்டவர்கள் பதிவிட்டு வருகின்றனர்.