Sowmya Anbumani: "கர்நாடக முதலமைச்சரின் கருத்தை ஒருபோதும் ஏற்க முடியாது" -செளமியா அன்புமணி

காவிரியின் குறுக்கே 10 தடுப்பணைகளை கட்ட வேண்டும் 50 முதல் 70 டி.எம்.சி தண்ணீரை சேமிக்க முடியும் என பாமக தொடர்ந்து வலியுறுத்தி வருகிறது.

சௌமியா அன்புமணி ஆய்வு.

Source : ABP Nadu original

மேட்டூர் அணை முழு கொள்ளளவை எட்ட உள்ள நிலையில் பசுமைத் தாயகம் அமைப்பின் மாநிலத் தலைவர் செளமியா அன்புமணி, நீர் தேக்கப் பகுதிகளையும், உபரிநீர் போக்கி அமைந்துள்ள 16 கண்பாலம் பகுதியையும் பார்வையிட்டார். தொடர்ந்து செய்தியாளர்களை சந்தித்த செளமியா அன்புமணி, "நாடாளுமன்றத் தேர்தல் நேரத்தில் மேட்டூர் அணை பகுதிக்கு வந்து பார்த்த போது, வறட்சியாக இருந்தது. மாதாந்திர அட்டவணைப்படி கர்நாடக மாநிலம், தமிழ்நாட்டிற்குத் தேவையான உரிமை நீரை வழங்காததே இதற்கு காரணம்.

மாறாக தென்மேற்கு பருவமழை தீவிரமாக பெய்த காரணத்தினால் கர்நாடக அணைகளில் தண்ணீர் தேக்க முடியாத நிலையில், உபரிநீர் காவிரியில் வெளியேற்றப்பட்டதால் மேட்டூர் அணை முழு கொள்ளளவை எட்ட உள்ளது.

இவ்வாறு ஒவ்வொரு முறையும் முழு கொள்ள்ளவை எட்டும் நேரத்தில் உபரிநீர் வீணாக கடலில் சென்று கலப்பதாக பசுமைத் தாயகம் அமைப்பு தொடர்ந்து குற்றம்சாட்டி வருகிறது. இருப்பினும் கூட தமிழக அரசு ஒரு சொட்டு தண்ணீரைக் கூட சேகரித்து வைக்க இதுவரை நடவடிக்கை எடுக்கவில்லை.

காவிரியின் குறுக்கே 10 தடுப்பணைகளை கட்ட வேண்டும் 50 முதல் 70 டி.எம்.சி தண்ணீரை சேமிக்க முடியும் என பாமக தொடர்ந்து வலியுறுத்தி வருகிறது. இதன்மூலம் நீர் மேலாண்மையில் தமிழக அரசு எந்த ஒரு தொலை நோக்குத் திட்டங்களையும் செயல்படுத்தாத காரணத்தினால்தான் விவசாயிகள் பாதிப்புக்குள்ளாகின்றனர்.

மேட்டூர் அணை நிரம்பினால் பயிர்கள் வெள்ளத்தில் மூழ்குவதும், மேட்டூர் அணை வறண்டால் பயிர்கள் காய்ந்து போவதும் என்ற நிலையே இதுவரை நீடித்து வருகிறது. இதனை மாற்ற நீர் மேலாண்மைக்கு முக்கியத்துவம் அளித்து கடலில் சென்று வீணாக கலக்கும் தண்ணீரை ஒவ்வொரு மாவட்டத்திலும் உள்ள வறண்ட ஏரிகளில் நிரப்ப நடவடிக்கை எடுக்க வேண்டும்.

இவ்வாறு உபரி நீரை ஏரிகளில் நிரப்புவதன் மூலம் நிலத்தடி நீரும் உயர்ந்து விவசாயம் செழிக்கும் என்பதை கருத்தில் கொண்டு அரசு நடவடிக்கைகளை தீவிரப்படுத்த வேண்டும். உபரி நீர் முறையாக பயன்படுத்தப்படாததால்தான் மேகதாதுவில் அணை கட்ட வேண்டும் என்று கர்நாடகா முடிவெடுத்துள்ளதாக அம்மாநில முதலமைச்சர் சித்தராமையா கூறும் கருத்தை ஏற்றுக் கொள்ள முடியாது. மேகதாதுவில் அணை கட்டினால் தமிழகம் மிகவும் பாதிக்கப்படும்" என்று கூறினார்.