TN Rain Alert: தொடரும் மழை.. மதியம் 1 மணி வரை 5 மாவட்டங்களுக்கு எச்சரிக்கை.. எந்தெந்த பகுதிகளில்?

தமிழ்நாட்டில் அடுத்த 3 மணி நேரத்தில் 5 மாவட்டங்களில் இடி மின்னலுடன் கூடிய லேசான மழை பெய்யக்கூடும் என வானிலை மையம் தெரிவித்துள்ளது.

தமிழகத்தில் மழை (கோப்பு புகைப்படம்)

தமிழ்நாட்டில் அடுத்த 3 மணி நேரத்தில் நாகை, திருவாரூர், தஞ்சாவூர், புதுக்கோட்டை மற்றும் ராமநாதபுரம் ஆகிய மாவட்டங்களில் இடி மின்னலுடன் கூடிய லேசான மழை பெய்யக்கூடும் என வானிலை ஆய்வு மையம் தெரிவித்துள்ளது.

குமரிக்கடல் மற்றும் அதனை ஒட்டிய பகுதிகளில் நிலவும் வளிமண்டல சுழற்சி காரணமாக கடந்த 2 தினங்களாக திருநெல்வேலி, தூத்துக்குடி, கன்னியாகுமரி, தென்காசி உள்ளிட்ட தென் மாவட்டங்களில் மழை பெய்தது. குறிப்பாக திருநெல்வேலி, தூத்துக்குடி மாவட்டங்களில் அனைத்து பகுதிகளிலும் இடைவிடாது 24 மணி நேரத்தையும் தாண்டி அதிக கனமழை பெய்தது. இதன் காரணமாக இந்த மாவட்டங்கள் முழுவதும் நீரில் மூழ்கியது என்றே சொல்லலாம். அப்படி அனைத்து பகுதிகளிலும் மழை நீர் சூழ்ந்தது.

இந்நிலையில் இன்றும் ஒரு சில மாவட்டங்களுக்கு கனமழை எச்சரிக்கை விடுக்கப்பட்டுள்ளது. அதன்படி இன்று தென் தமிழகத்தில் ஒருசில இடங்களிலும், வட தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை  பெய்யக்கூடும் என்றும், கன்னியாகுமரி, திருநெல்வேலி, தூத்துக்குடி மற்றும் தென்காசி மாவட்டங்களில் ஓரிரு இடங்களில் கனமழை பெய்யவாய்ப்புள்ளது என்றும் தெரிவிக்கப்பட்டுள்ளது.

அதேபோல் 24 ஆம் தேதி வரை, தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை  பெய்யக்கூடும் என தெரிவிக்கப்பட்டுள்ளது.

மேலும் சென்னை மற்றும் சுற்றுவட்டாரப் பகுதிகளில் அடுத்த 24 மணி நேரத்திற்கு வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் லேசான/மிதமான மழை  பெய்யக்கூடும். அதிகபட்ச வெப்பநிலை 30-31 டிகிரி செல்சியஸ் மற்றும் குறைந்தபட்ச வெப்பநிலை 24-25 டிகிரி செல்சியஸை ஒட்டியும் இருக்கக்கூடும் என தெரிவிக்கப்பட்டுள்ளது.

கடந்த 24 மணி நேரத்தில் பதிவான மழை (செண்டிமீட்டரில்):

திருச்செந்தூர் (தூத்துக்குடி மாவட்டம்) 23, காயல்பட்டினம் (தூத்துக்குடி மாவட்டம்) 21, நாலுமுக்கு (திருநெல்வேலி மாவட்டம்) 19, காக்காச்சி (திருநெல்வேலி மாவட்டம்) 18, மாஞ்சோலை (திருநெல்வேலி மாவட்டம்) 17, ஊத்து (திருநெல்வேலி மாவட்டம்) 15, மூலைக்கரைப்பட்டி (திருநெல்வேலி மாவட்டம்) 13, அம்பாசமுத்திரம் (திருநெல்வேலி மாவட்டம்) 12, பாபநாசம் (திருநெல்வேலி மாவட்டம்) 11, கன்னட அணைக்கட்டு (திருநெல்வேலி மாவட்டம்) 9, மணிமுத்தாறு (திருநெல்வேலி மாவட்டம்) 8, சேர்வலர் அணை (திருநெல்வேலி மாவட்டம்) 6, களக்காடு (திருநெல்வேலி மாவட்டம்) 6, சேரன்மகாதேவி (திருநெல்வேலி மாவட்டம்) 5, கமுதி (ராமநாதபுரம் மாவட்டம்), கொடுமுடியாறு அணை (திருநெல்வேலி மாவட்டம்), அருப்புக்கோட்டை (விருதுநகர் மாவட்டம்), உசிலம்பட்டி (மதுரை மாவட்டம்), திருநெல்வேலி (திருநெல்வேலி மாவட்டம்), காரியாபட்டி (விருதுநகர் மாவட்டம்), கல்லிக்குடி (மதுரை மாவட்டம்) தலா 4 செ.மீ மழை பதிவாகியுள்ளது.  

 

மீனவர்களுக்கான எச்சரிக்கை: 

தமிழக கடலோரப்பகுதிகள்:

19.12.2023: தென்தமிழக கடலோரப்பகுதிகள், மன்னார் வளைகுடா, குமரிக்கடல் பகுதிகளில் சூறாவளிக்காற்று  மணிக்கு 40 முதல் 45 கிலோ மீட்டர் வேகத்திலும் இடையிடையே 55  கிலோ மீட்டர் வேகத்திலும் வீசக்கூடும்.

20.12.2023: தென்தமிழக கடலோரப்பகுதிகள், மன்னார் வளைகுடா மற்றும் அதனை ஒட்டிய  குமரிக்கடல் பகுதிகளில் சூறாவளிக்காற்று  மணிக்கு 40 முதல் 45 கிலோ மீட்டர் வேகத்திலும் இடையிடையே 55  கிலோ மீட்டர் வேகத்திலும் வீசக்கூடும்.

அரபிக்கடல் பகுதிகள்:

19.12.2023: லட்சதீவு பகுதிகள் மற்றும் அதனை ஒட்டிய தென்கிழக்கு அரபிக்கடல் பகுதிகளில் சூறாவளிக்காற்று  மணிக்கு 40 முதல் 45 கிலோ மீட்டர் வேகத்திலும் இடையிடையே 55  கிலோ மீட்டர் வேகத்திலும் வீசக்கூடும். மேற்குறிப்பிட்ட நாட்களில் மீனவர்கள் இப்பகுதிகளுக்கு செல்ல வேண்டாமென்று அறிவுறுத்த படுகிறார்கள்.