12 Hours Labour Law: தனியார் நிறுவனங்களில் 12 மணி நேர வேலை கட்டாயமா? அமைச்சர் சொல்வது என்ன?

இது தொழிலாளர்கள் விரோத சட்டதிருத்தம் அல்ல. எந்த ஒரு தொழிலாளரின் விருப்பத்திற்கு மாறாகவோ எதிர்ப்பாகவோ கொண்டு வரக்கூடிய சட்ட திருத்தம் அல்ல என்று அமைச்சர் கணேசன் கூறியுள்ளார்.

தமிழ்நாடு தொழிலாளர் அமைச்சர் கணேசன்

தோழமைக்கட்சிகளின் எதிர்ப்பையும் மீறி 12 மணிநேர வேலை'சட்டமசோதாவை திமுக அரசு நிறைவேற்றியுள்ளது. தனியார் நிறுவனங்களில் வேலையை 12 மணி நேரமாக அதிகரிக்கும் மசோதா தமிழ்நாடு சட்டப்பேரவையில் நிறைவேற்றப்பட்டுள்ளது. 

இதற்கு எதிர்க்கட்சிகளுடன், திமுக கூட்டணி கட்சிகளான காங்கிரஸ், இந்திய கம்யூனிஸ்ட், மார்க்சிஸ்ட் கம்யூனிஸ்ட், மதிமுக, விசிக உள்ளிட்ட கட்சிகள் எதிர்ப்பு தெரிவித்தன. இருப்பினும், குரல் வாக்கெடுப்பு மூலம் இந்த சட்ட மசோதா நிறைவேற்றப்பட்டது.

தொழிலாளர் விரோத சட்டமா?

இந்த மசோதா குறித்து விளக்கம் அளித்த தொழிலாளர் நலத்துறை அமைச்சர் கணேசன், வாரத்திற்கு 48 மணி நேரம் வேலை என்பதில் மாற்றமில்லை என்று கூறினார். வாரத்திற்கு 4 நாட்கள் மட்டுமே வேலை செய்ய இந்த மசோதா வழிவகை செய்வதாகவும், இதனை நடைமுறைப்படுத்துவது அந்தந்த நிறுவனங்களின் விருப்பம் என்றும்  அமைச்சர் கணேசன் கூறினார்.

பின்னர் பேசிய அமைச்சர் துரைமுருகன், இந்த சட்டத்தால் தொழிற்சங்கங்களின் உரிமை பறிபோகும் என்ற அச்சம் தேவையில்லை என்று தெரிவித்தார். மேலும், இந்த சட்டத்தின் மூலம் ஏதேனும் பிரச்னை வந்தால், தொழிலாளர்களின் உரிமையைக் காப்போம் எனவும் துரைமுருகன் தெரிவித்தார்.

உயர்மட்ட குழு அமைக்கப்படும்

இந்த மசோதா தொடர்பாக விளக்கம் அளித்த அமைச்சர் தங்கம் தென்னரசு, “வெளிநாட்டு நிறுவனங்கள் முதலீட்டிற்காக தமிழகத்தை நோக்கி வருகின்றன. தொழிற்சாலைகளில் நெகிழ்வுத் தன்மை வரவேண்டும் என்பதற்காக, இந்தச் சட்டம் கொண்டுவரப்பட்டுள்ளது. எந்த தொழிலாளர்கள் விரும்புகிறார்களோ, அவர்களுக்கு மட்டுமே இது பொருந்தும். இது தொடர்பாக உயர்மட்ட குழு அமைக்கப்படும்.

மின்னணுவியல் துறை, தோல் அல்லாத காலணிகள் உற்பத்தி, மென்பொருள் துறையில் பணியாற்றக் கூடியவர்களுக்கு 12 மணி நேர வேலை மசோதா பொருந்தும் வாய்ப்புள்ளது" என்று தெரிவித்தார்.

இதுகுறித்து விசிக சட்டப்பேரவை உறுப்பினர் சிந்தனைசெல்வன் கூறுகையில், "ஆலை முதலாளிகளுக்கான சட்டமாக இது உள்ளது. அனைத்து கூட்டணிக் கட்சிகளும் எதிர்த்து குரல் கொடுத்தோம். யார் மீதும் திணிக்கப்படாது என்கிறார்கள். ஆனால் உழைப்புச் சுரண்டலுக்கு வழிவகுக்கும்" என்றார்.

தொடர்ந்து பேசிய மார்க்சிஸ்ட் கம்யூனிஸ்ட் கட்சி எம்எல்ஏ நாகை மாலி, "கார்ப்பரேட் கம்பெனிகளுக்கு ஆதரவான சட்டத்தை தமிழக அரசு நிறைவேற்றியிருக்கிறது. தொழிற்சங்க உரிமையை நசுக்கும் சட்டம் பற்றி காலையிலேயே முதல்வரை சந்தித்து பேசினோம். முதல்வர் உறுதியளித்த பின்னரும் நிறைவேற்றப்பட்டுள்ளது" என்றார்.

"நூற்றாண்டு காலமாக போராடி பெற்ற சம்பள உயர்வு, நிரந்தர வேலை எல்லாவற்றையும் நீர்த்துப் போகும் வகையில் சட்டத் திருத்தம் கொண்டுவரப்பட்டது. அதை எதிர்த்து வெளிநடப்பு செய்தோம்" என இந்திய கம்யூனிஸ்ட் கட்சி சட்டப்பேரவை உறுப்பினர் தளி ராமச்சந்திரன் கூறியுள்ளார்.

மேலும் படிக்க: Sudan Fighting: கலவரத்தால் சிக்கி தவிக்கும் சூடான்.. பாதுகாப்பாக உள்ளனரா இந்தியர்கள்? பிரதமர் மோடி அவசர கூட்டம்..!