குஷியில் புதுச்சேரி மக்கள்... பிரம்மாண்டமாக திறக்கப்படும் புதிய பேருந்து நிலையம்; இவ்வளவு வசதியாக...!
புதிய பேருந்து முனையம் கட்ட திட்டமிடப்பட்டு கடந்த 2023ம் ஆண்டு ஜூன் மாதம் தொடங்கப்பட்டது. இதற்காக ரூ.29.55 கோடி நிதி ஒதுக்கப்பட்டது.
புதுச்சேரி புதிய பேருந்து நிலையம்- Pondicherry New Bus Stand
புதுச்சேரியில் 1980 ஆண்டு மறைமலை அடிகள் சாலையில், புதிய பேருந்து நிலையம் கட்டப்பட்டது. சுமார் 40 ஆண்டுகள் பழமை வாய்ந்த இந்த ராஜீவ்காந்தி பேருந்து நிலையம் காலப்போக்கில் கடும் இடநெருக்கடியை சந்தித்தது. இதை இடித்துவிட்டு, ‘ஸ்மார்ட் சிட்டி’ திட்டத்தின் கீழ் ஒருங்கிணைந்த புதிய பேருந்து முனையம் கட்ட திட்டமிடப்பட்டது. இப்பணி கடந்த 2023ம் ஆண்டு ஜூன் மாதம் தொடங்கப்பட்டது. இதற்காக ரூ.29.55 கோடி நிதி ஒதுக்கப்பட்டது.
புதிய பேருந்து நிலையத்தின் பணிகள் ஒருபுறம் தொடங்கி நடக்க, தொடர்ந்து அதே பகுதியில் பேருந்து நிலையம் இயங்கப்பட்டது. ‘பேருந்து நிலையத்தை முழுமையாக காலி செய்து கொடுத்தால் மட்டுமே பணிகளை விரைந்து முடிக்க முடியும் என ஒப்பந்த நிறுவனம் தெரிவித்தது. இதையடுத்து, கடந்த ஜூன் 16-ம் தேதி பேருந்து நிலைய வளாகம் முற்றிலுமாக காலி செய்யப்பட்டது. பேருந்துகள் அனைத்தும் கடலூர் சாலையில் உள்ள ஏஎப்டி மைதானத்துக்கு திருப்பி விடப்பட்டு, அங்கு தற்போது வரையில் தற்காலிக பேருந்து நிலையம் செயல்பட்டு வருகிறது.
பேருந்து நிலையத்தில் அடிப்படை வசதிகள்
இதன்பிறகு பணிகள் மும்முரமாக நடந்து வந்தது. சுமார் 4.5 ஏக்கர் பரப்பளவு கொண்ட பேருந்து நிலையத்தின் மைய பகுதியில் போக்குவரத்து முனைய கட்டிடம் கட்டப்பட்டுள்ளது. இங்கு 31 கடைகள், 2 உணவகங்கள், 3 பயணிகள் காத்திருப்பகம், 4 போக்குவரத்து அலுவலகம், 3 பயணச்சீட்டு பதிவகம், 6 ஆம்னி பேருந்து அலுவலகங்கள், இரு பயணிகளுக்கான இரவு தங்கும் அறைகள், விசாரணை அலுவலகம், தகவல் மையம், முதலுதவி அறை, கட்டுப்பாட்டு அறை, நிர்வாக அலுவலகம், மின் அலுவலகம், பொருள் காப்பகம் ஆகியவை இடம்பெற்றுள்ளது.
பேருந்து நிலையத்தில் ஒரே நேரத்தில் 46 பேருந்துகள் நிறுத்தும் வசதி ஏற்படுத்தப்பட்டுள்ளது. பேருந்து நிலையத்திற்கு பேருந்துகள் வருவதற்கும், செல்வதற்கும் என இரண்டு வழிகள், பொதுமக்கள் வருவதற்கு மைய பகுதியில் தனியாக ஒரு வழி என 3 வழிகள் அமைக்கப்பட்டுள்ளது. பேருந்து நிலைய வளாகத்தைச் சுற்றி 300க்கும் மேற்பட்ட இருசக்கர வாகனங்கள், 30 நான்கு சக்கர வாகனங்கள், 20 ஆட்டோக்கள் மற்றும் 10 டாக்சிகள் நிறுத்த இடவசதி செய்யப்பட்டுள்ளது.
ராஜீவ் காந்தி ஒருங்கிணைந்த பொலிவுறு போக்குவரத்து முனையம்!
இறுதிகட்ட பணிகள் முடிந்து, "புதுச்சேரி நகராட்சி ராஜீவ் காந்தி ஒருங்கிணைந்த பொலிவுறு போக்குவரத்து முனையம்" என்று தமிழிலும், ஆங்கிலத்திலும் பெயர் பலகையும் வைக்கப்பட்டு தற்போது மிக அழகாக காட்சியளிக்கிறது. பேருந்துகள் எப்படி வந்து, எப்படி செல்ல வேண்டும் என்று கடந்த டிசம்பர் மாதமே சோதனை ஓட்டம் நடத்தி முடிக்கப்பட்டுள்ளது. கடந்தாண்டு அக்டோபர் மாதமே திறக்கப்படும் என்று முதலில் தெரிவிக்கப்பட்டது. பிறகு டிசம்பரில் திறப்பு விழா என்று கூறப்பட்டது. ஆனாலும் திறக்கப்படவில்லை. பணிகளை முடிப்பதில் சற்று தாமதம் ஆனதால் திறப்பு தேதி தள்ளிப் போனது. இப்பணிகளை மேற்கொண்டு வந்த தேசிய கட்டுமான கழகம் தனது தரப்பு பணியை முடித்து, பேருந்து நிலையத்தை சமீபத்தில் புதுச்சேரி நகராட்சியிடம் ஒப்படைத்துள்ளது.
திறப்பு விழா காணும் புதிய பேருந்து நிலையம்
இந்த நிலையில் புதிய பேருந்து நிலையத்தில் பணிகள் முடிவடைந்தது. ஆனால் திறப்பு விழாவுக்கான தேதி மட்டும் அறிவிக்கப்படவில்லை. தொடர்ந்து ஒவ்வொரு தேதியாக கூறப்பட்டு வந்தது. இதனால் பேருந்து நிலைய பணிகள் முடிவடைந்தும் ஏன் திறக்கவில்லை? என மக்களிடையே அதிருப்தி எழுந்தது இதையடுத்து நீண்ட இழுபறிக்கு பிறகு புதிய பேருந்து நிலையத்தின் திறப்பு விழா நேற்றைய தினம் திறக்கப்படுவதாக அறிவிப்பு வெளியானது. ஆனால் திடீரென திறப்பு விழா ஒத்திவைக்கப்பட்டது. இதனால் ஆளுநர்- முதல்வர் இடையே மோதல் ஏற்பட்டுள்ளதாக தகவல் வெளியானது.
இந்த நிலையில் புதிய பேருந்து நிலைய திறப்பு விழா இன்று காலை ஆளுநர் கைலாஷ்நாதன், முதல்வர் ரங்கசாமி ஆகியோர் புதிய பேருந்து நிலையத்தை திறந்து வைத்தனர். இதில் அமைச்சர்கள், எம்எல்ஏக்கள் பங்கேற்றனர். தொடர்ந்து நள்ளிரவு 12 மணி முதல் புதிய பேருந்து நிலையம் செயல்பாட்டுக்கு வருகிறது.
தலைப்பு செய்திகள்
ட்ரெண்டிங் செய்திகள்
