DMK: ஒரு மாசமாகியும் கொளத்தூர் மக்களை வசைபாடும் திமுக! இதுக்கு இல்லயா சார் எண்ட்

தேர்தல் முடிவுகள் வெளியாகி ஒரு மாதம் ஆகியும் கொளத்தூர் தொகுதி மக்களை தொடர்ந்து திமுக-வினர் வசைபாடி வருகின்றனர்.

விஎஸ் பாபு - மு.க.ஸ்டாலின்

Source : TWITTER

தமிழ்நாட்டைப் பொறுத்தமட்டில் கடந்த சட்டமன்ற தேர்தல் முடிவுகள் இதற்கு முன்பு வந்த தேர்தல் முடிவுகள் ஏற்படுத்தாத தாக்கத்தை ஏற்படுத்தியுள்ளது. திமுக, அதிமுக-வை வீழ்த்தி தனது முதல் அரசியல் களத்திலே விஜய் ஆட்சியைப் பிடித்துள்ளார்.

மு.க.ஸ்டாலின் தோல்வி:

புதியதாக வந்த அரசியல் கட்சியிடம் தோற்றுவிட்டோம் என்பதைக் காட்டிலும், திமுக-வின் தலைவரும், முன்னாள் முதலமைச்சருமான மு.க.ஸ்டாலின் தோற்றுவிட்டார் என்பதே திமுக-வினருக்கு மிகப்பெரிய அதிர்ச்சியை உண்டாக்கியுள்ளது. இதன் காரணமாக, திமுக-வினரும், திமுக ஆதரவாளர்களும் பல தருணங்களில் மக்களை தொடர்ந்து விமர்சித்து வருகின்றனர். 

குறிப்பாக, கொளத்தூர் மக்களை மிக கடுமையாக விமர்சித்து வருகின்றனர். மு.க.ஸ்டாலின் தோற்றதால் கொளத்தூர் தொகுதி மக்கள் மிக கடுமையான விமர்சனத்தை தேர்தல் முடிவுகள் வெளிவந்து ஒரு மாதம் ஆகியும் எதிர்கொண்டு வருகின்றனர். 

தொடர்ந்து திட்டு வாங்கும் கொளத்தூர் மக்கள்:

கடந்த சில நாட்களுக்கு முன்பு தூத்துக்குடியில் பேசிய முன்னாள் அமைச்சர் அனிதா ராதாகிருஷ்ணன் கொளத்தூர் தொகுதி மக்கள் கேடு கெட்ட மக்கள் என்று தரம் தாழ்ந்து விமர்சித்து பேசினார். அதற்கு கண்டனங்கள் குவிந்த நிலையில், கொளத்தூரில் நேற்று கருணாநிதியின் பிறந்த நாள் விழா நேற்று நடந்தது.

இந்த நிகழ்ச்சியில் பங்கேற்று பேசிய நடிகர் சத்யராஜ் கொளத்தூர் தொகுதி மக்களைப் பார்த்து நீங்கள் செய்தது நியாயமா? பட்டுதான் திருந்தனும். நீங்கள் பட்டு திரிந்தினால்தான் தெரியும் என்று சாபம் விடுவது போல பேசினார். சத்யராஜுன் இந்த பேச்சுக்கு தொடர்ந்து கண்டனங்கள் குவிந்து வருகிறது.

திமுக-விற்கு குவியும் கண்டனம்:

திமுக-வினர் தொடர்ந்து தமிழக மக்களை வசைபாடி வருவதற்கும், குறிப்பாக கொளத்தூர் மக்களை விமர்சித்து வருவதற்கும் பல தரப்பினரும் கண்டனம் தெரிவித்து வருகின்றனர். திமுக தலைவர் மு.க.ஸ்டாலினே தான் தோற்ற தொகுதியான கொளத்தூருக்கு நேரில் சென்று தனக்காக வாக்களித்த மக்களுக்கு நன்றி தெரிவித்தார். 

ஆனாலும், இதுபோன்று மக்களை விமர்சித்தும், குறிப்பாக கொளத்தூர்வாசிகளை வசைபாடியும் கருத்துக்களை தெரிவித்து வந்தால் திமுக-வினருக்கு பின்விளைவுகளையே ஏற்படுத்தும் என்றே கூறப்படுகிறது. 

திமுக-வின் தோல்விக்கு இன்ஸ்டாகிராம்தான் காரணம் என்று ஒரு தரப்பினர் இளைஞர்கள் கூட்டத்தையும் வசை பாடி வருகின்றனர். அதேசமயம், இன்ஸ்டாகிராமில் திமுக-வினர் கணக்குகளை தொடங்கி திமுக-விற்கு ஆதரவாக பல கருத்துக்களைத் தொடர்ந்து பகிர்ந்து வருகின்றனர்.