Maaveeran Issue: கொடியால் வந்த பிரச்னை... மாவீரன் படத்துக்கு எதிரான வழக்கு... சென்னை உயர் நீதிமன்றம் அதிரடி உத்தரவு!

இந்திய ஜனநாயகக் கட்சியின் கொடியை பிரதிபலிக்காத வகையில் மாவீரன் படக்காட்சிகளை மாற்ற வேண்டும் என சென்னை உயர் நீதிமன்றம் உத்தரவிட்டுள்ளது.

சிவகார்த்திகேயன், ஐஜேகே நிறுவனர் பாரிவேந்தர் எம்.பி

வரும் ஜூலை 14ஆம் தேதி சிவகார்த்திகேயன், அதிதி சங்கர் நடிப்பில் மாவீரன் திரைப்படம் வெளியாகவுள்ளது.  இந்நிலையில் முன்னதாக வெளியான மாவீரன் படத்தின் ட்ரெய்லரில் இந்திய ஜனநாயகக் கட்சியை பிரதிபலிக்கும் கொடிகள் இடம்பெற்றிருந்தன.

கொடியால் வந்த பிரச்னை

இந்நிலையில், மாவீரன் படத்தில் இடம்பெறும் கொடியின் நிறத்தை மாற்ற வேண்டும் என்றும், அவ்வாறு மாற்றம் செய்யப்படாமல் இத்திரைப்படம் வெளியிடப்படுமாயின் படத்துக்கு தடை விதிக்கவேண்டும் என்றும் கோரி ஐஜேகே பொதுச்செயலாளர் பி.ஜெயசீலன் முன்னதாக சென்னை உயர் நீதிமன்றத்தில் வழக்கு தொடர்ந்திருந்தார். இந்த வழக்கு இன்று நீதிபதி ஆர்.என்.மஞ்சுளா முன்பு விசாரணைக்கு வந்தது.

உயர் நீதிமன்றம் உத்தரவு

இந்த விசாரணையைத் தொடர்ந்து இந்திய ஜனநாயகக் கட்சியின் கொடியை பிரதிபலிக்காத வகையில் மாவீரன் படக்காட்சிகளை மாற்ற வேண்டும் என சென்னை உயர் நீதிமன்றம் உத்தரவிட்டுள்ளது.

மேலும் மாவீரன் திரைப்படத்தில் எந்த ஒரு அரசியல் கட்சியையும் குறிப்பிடவில்லை என பொறுப்புதுறப்பு வாசகங்களை திரையரங்குகளில் வெளியிட வேண்டும். அதேபோல் கொடியின் நிறத்தில் மாற்றங்கள்  செய்த பிறகே ஓடிடி தளங்கள் மற்றும் தொலைக்காட்சியில் இப்படம் வெளியிடப்பட வேண்டும் எனவும் உயர் நீதிமன்றம் தெரிவித்துள்ளது.

பைலிங்குவல் திரைப்படம்

மண்டேலா படத்தை இயக்கிய மடோன் அஸ்வின் இயக்கத்தில் இரண்டாவதாக வெளியாகும் திரைப்படம் மாவீரன். இந்தப் படத்தில் சிவகார்த்திகேயனுக்கு ஜோடியாக அதிதி ஷங்கர் நடித்துள்ளார். மேலும் சரிதா, யோகி பாபு, மிஸ்கின் உள்ளிட்டோர் முக்கியக் கதாபாத்திரங்களில் இப்படத்தில் நடித்துள்ளனர். 

தமிழ், தெலுங்கு என பைலிங்குவல் படமாக இப்படம் வெளியாகிறது. நாளை மறுநாள் படம் வெளியாகும் நிலையில், இப்படத்தின் இறுதிக்கட்ட ப்ரொமோஷன் பணிகளை படக்குழு முழிவீச்சில் மேற்கொண்டு வருகிறது.

விஜய் சேதுபதியின் குரல்

இந்நிலையில், நேற்று இப்படத்தில் சிவகார்த்திகேயன் கதாபாத்திரத்துடன் உரையாடும் குரல் பற்றிய அப்டேட் வெளியானது. இப்படத்தின் ட்ரெய்லரில் “காதுல ஒரு குரல் கேட்டுட்டே இருக்கு” என சிவகார்த்திகேயன் கூறும் வசனம் கவனம் ஈர்த்த நிலையில், சிவகார்த்திகேயன் எதற்காக மேலே பார்க்கிறார் என ரசிகர்கள் ஆராய்ச்சி செய்து பல கோணங்களில் கருத்துகளை இணையத்தில் முன்வைத்து வந்தனர்.

இந்நிலையில், ‘வீரமே ஜெயம்’  என விஜய் சேதுபதி பேசும் வசனத்துடன் மாவீரன் படக்குழு நேற்று ஒஎரு காட்சியை பகிர்ந்திருந்தது.  நடிகர் சிவகார்த்திகேயனும் இதுகுறித்து மகிழ்ச்சி தெரிவித்து பதிவிட்டிருந்தது குறிப்பிடத்தக்கது.

மேலும் படிக்க: Past Lives Review: காலங்கள் இடையே நடக்கும் காதல் போராட்டம்.. ‘Past Lives’ திரைப்படத்தின் முழு விமர்சனம் இதோ..!