Jananayagan release: மே மாதம் தான் ரிலீஸ் ஆகுமா ஜனநாயகன்.!! விஜய் ரசிகர்களுக்கு ஷாக் கொடுக்கும் புதிய தகவல்

Jananayagan release: நடிருகம் தவெக தலைவருமான விஜய் நடித்துள்ள ஜனநாயகன் திரைப்படம் வெளியாகுவதில் சிக்கல் நீடித்து வருகிறது. அந்த வகையில், தேர்தலுக்கு பிறகு மே மாதம் தான் படம் வெளியாகும் என தகவல் வெளியாகியுள்ளது.

jananayagan cinema

Source : social media

சிக்கலில் ஜனநாயகன்

தமிழ் திரைத்துறையில் முன்னனி நடிகராக இருப்பவர் நடிகர் விஜய், தமிழகம் முழுவதும் பல லட்சம் ரசிகர்களை கொண்ட விஜய், திரைத்துறையில் இருந்து அரசியலில் களம் இறங்கினார். கடந்த 2024ஆம் ஆண்டு பிப்ரவரி மாதம் தமிழக வெற்றிக்கழகம் என்ற கட்சியை தொடங்கியவர், மதுரை மற்றும் விக்கிரவாண்டியில் இரண்டு மாநில மாநாட்டை நடத்தி அசத்தினார். மேலும் ஜனநாயகன் திரைப்படம் தான் தனது கடைசி திரைப்படம் எனவும் அறிவித்தார். இதனையடுத்து இந்த திரைப்படம் பொங்கல் பண்டிகையையொட்டி ஜனவரி 9ஆம் தேதி வெளியாகும் என அறிவிக்கப்பட்டது. இதற்கு ஏற்ப திரையரங்குகளிலும் ரசிகர்கள் பேனர்கள் வைத்தும், தோரணங்கள் கட்டியும் கொண்டாடினார்.

சென்சார் சிக்கலில் ஜனநாயகன்

ஆனால் படம் வெளியாவதற்கு ஒரு வாரத்திற்கு முன்பாக சென்சார் சான்றிதழ் கிடைக்காத நிலை உருவானது. இதனையடுத்து நீதிமன்றத்தில் படக்குழு முறையிட்ட நிலையில், அடுத்த இரண்டு நாட்களில் விசாரணை நடத்திய தனி நீதிபதி, படத்தை வெளியிட அனுமதி அளித்து உத்தரவிட்டார். ஆனால் அடுத்த சில நிமிடங்களில் சென்சார் குழு உயர்நீதிமன்ற தலைமை நீதிபதியிடம் முறையிட்டது. இதன் காரணமாக பொங்கல் பண்டிகைக்கு படம் வெளியாகாத நிலை உருவானது. இதனையடுத்து கடந்த வாரம் வழக்கு விசாரணை நடைபெற்ற நிலையில், இன்று ஜனநாயகன் திரைப்படம் தொடர்பாக தீர்ப்பு வெளியிடப்பட்டது.

மீண்டும் தனி நீதிபதி விசாரிக்க உத்தரவு

அதில் தனி நீதிபதி அளித்த தீர்ப்பு செல்லாது எனவும், படத்தில் மதம் சார்ந்த காட்சிகள் இடம்பெற்றுள்ளதாக தெரிவித்த நீதிபதி, மீண்டும் தனி நீதிபதியே ஜனநாயகன் திரைப்படத்திற்கான விசாரணையை நடத்தி தீர்ப்பு வழங்க உத்தரவிடப்பட்டது. இதனால் தொடங்கிய இடத்திற்கே மீண்டும் ஜனநாயகன் படம் வந்துள்ளதால் படம் தற்போது உள்ள நிலையில் வெளியாக வாய்ப்பு குறைந்துள்ளது. எனவே அடுத்தாக தனி நீதிபதி விசாரணை நடத்தி உத்தரவிட குறைந்தது ஒரு வாரம் முதல் 10 நாட்கள் வரை ஆகும் என தகவல் தெரிவிக்கிறது.

இதனையடுத்து பிப்ரவரி மத்தியில் தீர்ப்பு வந்தாலும், இரண்டு தரப்பிலும் உச்சநீதிமன்றத்தில் மேல்முறையீடு செய்ய வாய்ப்பு உள்ளது. அதையும் தாண்டி படம் வெளியாக அனுமதி கிடைத்தாலும் பிப்ரவரி மாதம் எந்தவித தொடர் விடுமுறை நாட்களும் இல்லை. அதிலும் பள்ளி மாணவர்களுக்கான ஆண்டு இறுதி தேர்வுக்கு மாணவர்கள் தயாராக தொடங்கிவிடுவார்கள். இதனால் ஜனநாயகன் திரைப்படத்தை வெளியிட முடியாத நிலை உருவாகியுள்ளது. அடுத்ததாக தமிழக சட்டமன்ற தேர்தல் தேதி மார்ச் மாதம் முதல் வாரம் அறிவிக்கப்படும் என எதிர்பார்க்கப்படுகிறது. 

மே மாதம் படம் ரிலீஸ் ஆக வாய்ப்பு

தமிழக சட்டமன்ற தேர்தல் தேதி அறிவிக்கப்பட்ட பிறகு தேர்தலில் போட்டியிடும் கட்சியின் தலைவர் படத்தை வெளியிடுவதில் சிக்கம் நீடிக்கும்.எனவே மார்ச் மற்றும் ஏப்ரல் மாதம் இறுதி வரை படத்தை வெளியிடுவதற்கான வாய்ப்பு குறைந்துள்ளது. எனவே சட்டமன்ற தேர்தல் முடிவடைந்த பிறகு மே மாதம் பள்ளி விடுமுறை நாட்களில் தான் படத்தை வெளியிடுவதற்கான வாய்ப்பு உருவாகும் என கூறப்படுகிறது. எனவே ஜனநாயகன் திரைப்படத்தை பார்க்க இன்னும் 3 முதல் 4 மாதங்கள் காத்திருக்க வேண்டிய நிலை ஏற்பட்டுள்ளது.