நீலகிரியில் மனித-வனவிலங்கு மோதலுக்கு தீர்வு... அதிநவீன புதிய கட்டுப்பாட்டு மையம் திறப்பு! தமிழக அரசின் சூப்பர் ஐடியா

தமிழக வனப்படை நவீனமயமாக்குதல் திட்டத்தின் கீழ், ரூ.6 கோடி மதிப்பில் நாடுகாணி ஜீன்பூல் மரபியல் தோட்டத்தில் இந்த 'கட்டளை மற்றும் கட்டுப்பாட்டு மையம்' (Command-and-Control Centre) அமைக்கப்பட்டுள்ளது.

வனவிலங்கு பாதுக்காப்பு

Source : Twitter/ IndiaTourismBa2

நீலகிரி: கூடலூர் வனக்கோட்டத்தில் நிலவி வரும் மனித - வனவிலங்கு மோதல்களுக்கு நிரந்தரத் தீர்வுகாணும் வகையில், தமிழக அரசு மற்றும் வனத்துறை சார்பில் அதிநவீன தொழில்நுட்பத்துடன் கூடிய புதிய கட்டுப்பாட்டு மையத்தை நீலகிரி நாடாளுமன்ற உறுப்பினர் திரு. ஆ. இராசா அவர்கள் இன்று திறந்து வைத்தார்.

செயற்கை நுண்ணறிவு (AI) மூலம் 24 மணி நேரக் கண்காணிப்பு

தமிழக வனப்படை நவீனமயமாக்குதல் திட்டத்தின் கீழ், ரூ.6 கோடி மதிப்பில் நாடுகாணி ஜீன்பூல் மரபியல் தோட்டத்தில் இந்த 'கட்டளை மற்றும் கட்டுப்பாட்டு மையம்' (Command-and-Control Centre) அமைக்கப்பட்டுள்ளது.

• AI கண்காணிப்பு: மோதல்கள் அதிகம் நிகழும் 46 இடங்கள் கண்டறியப்பட்டு, அங்கு செயற்கை நுண்ணறிவு தொழில்நுட்பத்துடன் கூடிய 46 கேமராக்கள் பொருத்தப்பட்டுள்ளன. இவை விலங்குகளின் நடமாட்டத்தை 24 மணி நேரமும் கண்காணிக்கும்.

• உடனடி எச்சரிக்கை: வனவிலங்குகள் குடியிருப்பு பகுதிக்குள் நுழையும்போது, கட்டுப்பாட்டு மையம் மூலம் அப்பகுதி மக்களுக்கு 24 எச்சரிக்கை ஒலிபெருக்கிகள் மற்றும் குறுஞ்செய்திகள் (SMS) வாயிலாக உடனுக்குடன் எச்சரிக்கை விடுக்கப்படும்.

களப்பணிகள் மற்றும் ரோந்துப் படைகள்

தொழில்நுட்பம் மட்டுமின்றி, கள அளவிலும் பாதுகாப்பை உறுதி செய்ய வனத்துறை பல்வேறு நடவடிக்கைகளை எடுத்துள்ளது:

• பாதுகாப்புப் பணியாளர்கள்: யானை விரட்டும் காவலர்கள் மற்றும் வேட்டை தடுப்பு காவலர்கள் என மொத்தம் 120 தற்காலிகப் பணியாளர்கள் பணியமர்த்தப்பட்டுள்ளனர். ஜூன் முதல் செப்டம்பர் வரையிலான காலங்களில் கூடுதலாக 40 பேர் பணியில் ஈடுபடுத்தப்படுவர்.

• ரோந்து வாகனங்கள்: கண்காணிப்புப் பணிகளைத் தீவிரப்படுத்த கூடுதலாக 3 புதிய ரோந்து வாகனங்கள் வழங்கப்பட்டுள்ளன.

அதிநவீனத் தொழில்நுட்பக் கருவிகள்

யானைகளின் நடமாட்டத்தை அறிவியல் ரீதியாகக் கண்காணிக்கப் புதிய கருவிகள் அறிமுகப்படுத்தப்பட்டுள்ளன:

1. ரேடியோ காலர்கள்: மூன்று காட்டுயானைகளுக்கு ரேடியோ காலர்கள் பொருத்தப்பட்டு அவற்றின் இருப்பிடம் கண்காணிக்கப்படுகிறது.

2. Thermal Imaging ட்ரோன்கள்: இரவு நேரங்களிலும் யானைகளைத் துல்லியமாகக் கண்டறிந்து வனப்பகுதிக்குள் விரட்ட இரண்டு அதிநவீன ட்ரோன்கள் பயன்பாட்டிற்கு வந்துள்ளன.

3. கட்டணமில்லா உதவி எண்: வனப்பாதுகாப்பு மற்றும் அவசர உதவிகளுக்காக 1800-425-4353 என்ற புதிய தொலைபேசி எண் அறிமுகம் செய்யப்பட்டுள்ளது.

நிவாரணம் மற்றும் வாழ்விட மறுசீரமைப்பு

வனவிலங்குகளால் உயிரிழப்பு அல்லது சேதங்கள் ஏற்படும் பட்சத்தில், பாதிக்கப்பட்டவர்களுக்கு 24 மணி நேரத்திற்குள் நிவாரணத் தொகை வழங்கப்படுவதை வனத்துறை உறுதி செய்துள்ளது. மேலும், வனவிலங்குகளின் உணவுத் தேவையைப் பூர்த்தி செய்ய வனப்பகுதிகளில் வாழ்விட மறுசீரமைப்புப் பணிகளும் விரிவான முறையில் மேற்கொள்ளப்பட்டு வருகின்றன.

முக்கியப் பங்கேற்பாளர்கள்

இந்நிகழ்வில் சுற்றுச்சூழல் மற்றும் வனத்துறை கூடுதல் தலைமைச் செயலாளர் திருமதி. சுப்ரியா சாஹூ இ.ஆ.ப., முதன்மை தலைமை வனப்பாதுகாவலர் திரு. ஸ்ரீனிவாஸ் ரா ரெட்டி, நீலகிரி மாவட்ட ஆட்சியர் திருமதி. லட்சுமி பவ்யா தண்ணீரு மற்றும் முதுமலை புலிகள் காப்பக கள இயக்குநர் திரு. இரா. கிருபாஷங்கர் உள்ளிட்ட உயர் அதிகாரிகள் கலந்து கொண்டனர்.