தோனியை வாழ்த்திய மு.க.ஸ்டாலின்.. சுப்மன்கில்லை பாராட்டிய எடப்பாடி பழனிசாமி - இதுதாங்க காரணம்!

இன்று பிறந்தநாள் கொண்டாடும் தோனிக்கு முதலமைச்சர் மு.க.ஸ்டாலினும், எட்ஜ்பாஸ்டனில் வெற்றி பெற்ற இந்திய அணிக்கு எடப்பாடி பழனிசாமியும் வாழ்த்து தெரிவித்துள்ளனர்.

முக ஸ்டாலின் - எடப்பாடி பழனிசாமி

Source : twitter

இந்திய கிரிக்கெட் அணிக்கும், இந்திய கிரிக்கெட் ரசிகர்களுக்கும் நேற்றும், இன்றும் மகிழ்ச்சிகரமான நாளாக அமைந்துள்ளது. 58 ஆண்டுகால வரலாற்றில் எட்ஜ்பாஸ்டன் மைதானத்தில் இந்திய அணி முதன்முறையாக டெஸ்ட் போட்டியில் வெற்றி பெற்றது. 

இந்திய அணிக்காக டி20 உலகக்கோப்பை, சாம்பியன்ஸ் டிராபி, 50 ஓவர் உலகக்கோப்பையை வாங்கித் தந்த ஒரே கேப்டனான முன்னாள் வீரர் தோனிக்கு இன்று பிறந்த நாள் ஆகும். 

இந்திய அணிக்கு எடப்பாடி வாழ்த்து:

இந்திய கிரிக்கெட் அணி இங்கிலாந்தில் சுற்றுப்பயணம் மேற்கொண்டு டெஸ்ட் தொடரில் ஆடி வருகிறது. இங்கிலாந்து அணிக்கு எதிராக 1967ம் ஆண்டு முதல் டெஸ்ட் போட்டியில் எட்ஜ்பாஸ்டன் மைதானத்தில் இந்திய அணி ஆடி வரும் நிலையில், அபாரமான ஆட்டத்தால் இந்திய அணி வெற்றி பெற்றது. வெற்றி பெற்ற இந்திய அணிக்கு பலரும் வாழ்த்து தெரிவித்தனர். 

🇮🇳 What a victory!

Heartiest Congratulations to #TeamIndia on a historic Test win at Edgbaston, defeating England by a massive 336 runs!

Special applause to Captain @ShubmanGill for leading from the front with twin centuries and to Akash Deep for his sensational 10-wicket…

— Edappadi K Palaniswami-SayYEStoWomenSafety&AIADMK (@EPSTamilNadu) July 6, 2025

இந்திய அணிக்கு எதிர்க்கட்சித் தலைவரும், அதிமுக பொதுச்செயலாளருமான எடப்பாடி பழனிசாமி வாழ்த்து தெரிவித்துள்ளார். அவர் தனது எக்ஸ் பக்கத்தில், என்ன ஒரு வெற்றி... எட்ஜ்பாஸ்டன் மைதானத்தில் 336 ரன்கள் வித்தியாசத்தில் வெற்றி பெற்ற இந்திய அணிக்கு வாழ்த்துகள். 

இரட்டை சதம் விளாசிய கேப்டன் சுப்மன்கில்லுக்கும், 10 விக்கெட்டுகள் வீழ்த்தி ஆகாஷ் தீப்பிற்கும் சிறப்பு பாராட்டுகள். இது வெறும் வெற்றி அல்ல. சிவப்பு நிற பந்து கிரிக்கெட்டில் இந்திய அணியின் ஆதிக்கத்தின் வெளிப்பாடு. நம்பிக்கையுடனும், பெருமையுடன் லார்ட்சுக்கு செல்லுங்கள்.

இவ்வாறு எடப்பாடி பழனிசாமி பதிவிட்டுள்ளார். 

தோனியை பாராட்டிய மு.க.ஸ்டாலின்:

மறுமுனையில், இந்திய அணிக்காக பல வெற்றிகளைப் பெற்றுத் தந்ததுடன், சென்னை சூப்பர் கிங்ஸ் அணிக்காக 5 ஐபிஎல் கோப்பைகளைப் பெற்றுத் தந்தவருமான எம்.எஸ்.தோனிக்கு முதலமைச்சர் மு.க.ஸ்டாலின் பாராட்டு தெரிவித்துள்ளார். 

மு.க.ஸ்டாலின் தன்னுடைய எக்ஸ் பக்கத்தில் பதிவிட்டுள்ளதாவது, தன் ஒவ்வொரு அசைவிலும் அழுத்தத்தை கூட கவிதையாக மாற்றிய  அரிதான ஓஜி தோனிக்கு பிறந்தநாள் வாழ்த்துகள். ஒரு முடிவு, ஒரு ரன், ஒரு அமைதியான வெற்றி என்பதை நீங்கள் நிரூபித்துள்ளீர்கள். மகத்துவம் பிறக்கவில்லை, அது கட்டமைக்கப்படுகிறது. 

இவ்வாறு அவர் பதிவிட்டுள்ளார்.

கிரிக்கெட் ரசிகர்கள்:

இந்தியாவில் அதிகளவு கிரிக்கெட் ரசிகர்களை கொண்ட மாநிலங்களில் தமிழ்நாடு முக்கியமானது ஆகும். சர்வதேச கிரிக்கெட், ஐபிஎல் போன்று எந்தவித வடிவத்திலான கிரிக்கெட்டையும் கொண்டாடுபவர்கள். இதன் காரணமாக கிரிக்கெட் ரசிகர்களை கவரும் விதமாகவும், கிரக்கெட் வீரர்களை ஊக்குவிக்கும் விதமாகவும் இரு தலைவர்களும் இந்திய அணிக்கும், தோனிக்கும் வாழ்த்து தெரிவித்துள்ளனர். 

இந்திய அணியின் முன்னாள் கேப்டனுக்கும், இந்திய அணியின் இந்நாள் கேப்டனுக்கும் இரு அரசியல் தலைவர்களும் வாழ்த்து தெரிவித்திருப்பதற்கு பலரும் கருத்து தெரிவித்து வருகின்றனர்.