சுடுகாடு அருகே ரகசிய சாராய விற்பனை: சுமித்ராவை தட்டித்தூக்கிய போலீஸ்...
மயிலாடுதுறை மாவட்டம் சீர்காழி அருகே தொடந்து மதுவிலக்கு குற்றங்களில் ஈடுபட்டு வந்த பெண்ணை 'குண்டர்' சட்டத்தில் காவல்துறையினர் கைது சிறையில் அடைத்துள்ளனர்.
மயிலாடுதுறை: மயிலாடுதுறை மாவட்டத்தில் சட்டவிரோத மது விற்பனை மற்றும் மதுவிலக்கு குற்றங்களில் தொடர்ச்சியாக ஈடுபட்டு வந்த பெண் ஒருவரை, மாவட்ட காவல் கண்காணிப்பாளரின் பரிந்துரையின் பேரில் மாவட்ட ஆட்சியர் குண்டர் தடுப்பு சட்டத்தின் கீழ் சிறையில் அடைக்க உத்தரவிட்டுள்ளார்.
சுனாமி குடியிருப்பில் மது விற்பனை
மயிலாடுதுறை மாவட்டம், சீர்காழி காவல் சரகத்திற்குட்பட்ட திருமுல்லைவாசல் சுனாமி குடியிருப்பு பகுதியில், புதுச்சேரி மாநில மதுபானங்கள் சட்டவிரோதமாக விற்பனை செய்யப்படுவதாக காவல்துறைக்கு ரகசிய தகவல் கிடைத்தது. இந்த தகவலின் அடிப்படையில், கடந்த ஏப்ரல் 14, 2026 அன்று சீர்காழி காவல் நிலைய உதவி ஆய்வாளர் மணிமாறன் தலைமையிலான காவல்துறையினர் தீவிர மதுவிலக்கு வேட்டையில் ஈடுபட்டனர்.
அப்போது, திருமுல்லைவாசல் அம்பேத்கர் நகரைச் சேர்ந்த ஸ்ரீதர் என்பவரின் மனைவி சுமித்ரா (43), அந்த பகுதியில் உள்ள சுடுகாடு அருகே மறைவான இடத்தில் வைத்து புதுச்சேரி சாராயத்தை சட்டவிரோதமாக விற்பனை செய்து கொண்டிருந்தது கண்டுபிடிக்கப்பட்டது.
சாராயம் பறிமுதல் மற்றும் கைது நடவடிக்கை
காவல்துறையினர் நடத்திய சோதனையில், சுமித்ரா விற்பனைக்காக பதுக்கி வைத்திருந்த 120 லிட்டர் பாண்டி சாராயம் மற்றும் 180 மி.லி அளவு கொண்ட 10 சாராய பாட்டில்களை பறிமுதல் செய்தனர். இதனைத் தொடர்ந்து, சுமித்ராவை கைது செய்த காவல்துறையினர் அவரை நீதிமன்றக் காவலுக்கு அனுப்பி வைத்தனர்.
குண்டர் சட்டம் பாய்ந்தது
கைது செய்யப்பட்ட சுமித்ரா ஏற்கனவே பலமுறை மதுவிலக்கு தொடர்பான குற்றச்சாட்டுகளில் ஈடுபட்டு வந்தவர் என்பது விசாரணையில் தெரியவந்தது. பொது அமைதிக்கும், சமூக ஒழுக்கத்திற்கும் குந்தகம் விளைவிக்கும் வகையில் தொடர்ந்து இத்தகைய செயல்களில் அவர் ஈடுபட்டு வந்ததால், அவரைத் தடுப்பு காவல் சட்டத்தின் (குண்டர் சட்டம்) கீழ் சிறையில் அடைக்க மாவட்ட காவல் கண்காணிப்பாளர் ஸ்டாலின், மாவட்ட ஆட்சியருக்குப் பரிந்துரை செய்தார்.
காவல் கண்காணிப்பாளரின் பரிந்துரையை ஏற்று, மயிலாடுதுறை மாவட்ட ஆட்சியர் கடந்த மே 11, 2026 அன்று சுமித்ராவை குண்டர் சட்டத்தின் கீழ் சிறையில் அடைக்க அதிரடி உத்தரவு பிறப்பித்தார். இந்த உத்தரவின்படி, மே 12, 2026 அன்று சீர்காழி காவல் ஆய்வாளர் கமல்ராஜ் தலைமையிலான போலீசார் சுமித்ராவை திருச்சிராப்பள்ளி மகளிர் தனிச்சிறையில் அடைத்தனர்.
புள்ளிவிவரங்கள் மற்றும் எச்சரிக்கை
மயிலாடுதுறை மாவட்டத்தில் குற்றச் செயல்களைக் கட்டுப்படுத்த காவல்துறை எடுத்து வரும் தீவிர நடவடிக்கைகளின் ஒரு பகுதியாக இவ்வாண்டு (2026) இதுவரை மொத்தம் 7 நபர்கள் தடுப்பு காவல் சட்டத்தின் கீழ் சிறையில் அடைக்கப்பட்டுள்ளனர்.
*பொது அமைதிக்கு பங்கம் விளைவித்தவர்கள்: 02 நபர்கள்
*மதுவிலக்கு குற்றங்களில் ஈடுபட்டவர்கள்: 04 நபர்கள்
*கஞ்சா விற்பனையில் ஈடுபட்டவர்கள்: 01 நபர்
என 7 பேர் இந்தாண்டு மட்டும் தடுப்பு காவல் சட்டத்தின் கீழ் சிறையில் அடைக்கப்பட்டுள்ளனர். குறிப்பிடத்தக்க வகையில், கடந்த 2025-ம் ஆண்டில் மட்டும் தொடர் குற்றச் செயல்களில் ஈடுபட்ட 50 நபர்கள் மீது இத்தகைய கடுமையான தடுப்பு காவல் சட்ட நடவடிக்கைகள் மேற்கொள்ளப்பட்டன.
காவல் கண்காணிப்பாளரின் கடும் எச்சரிக்கை
சமூக விரோத செயல்களில் ஈடுபடுவோர் தீவிரமாக கண்காணிக்கப்பட்டு வருவதாக மாவட்ட காவல் கண்காணிப்பாளர் ஸ்டாலின் தெரிவித்துள்ளார். குறிப்பாக
* பொதுமக்களை அச்சுறுத்தும் ரவுடிகள்
* பெண்கள் மற்றும் குழந்தைகளுக்கு எதிரான பாலியல் குற்றவாளிகள்
* கஞ்சா மற்றும் தடை செய்யப்பட்ட புகையிலை பொருட்களை விற்பனை செய்பவர்கள்
* மதுவிலக்கு சட்டத்தை மீறுபவர்கள்
ஆகியோர் மீது பாரபட்சமின்றி குண்டர் தடுப்பு காவல் சட்டத்தின் கீழ் கடும் நடவடிக்கை எடுக்கப்படும் என அவர் மீண்டும் எச்சரித்துள்ளார். மாவட்டத்தின் அமைதியைப் பாதுகாக்கவும், குற்றச் செயல்களை முற்றிலும் ஒழிக்கவும் காவல்துறை தொடர்ந்து இத்தகைய அதிரடி நடவடிக்கைகளை மேற்கொள்ளும் என்று எதிர்பார்க்கப்படுகிறது.
தலைப்பு செய்திகள்
ட்ரெண்டிங் செய்திகள்
