கூடுதல் வாடகை வசூலித்தால் கடும் நடவடிக்கை; புகார்களுக்கு பிரத்யேக எண்கள் அறிவிப்பு - மயிலாடுதுறை ஆட்சியர் எச்சரிக்கை
மயிலாடுதுறை மாவட்டத்தில் நெல் அறுவடை இயந்திரங்களுக்கான வாடகை நிர்ணயம் செய்து, கூடுதல் வாடகை வசூலித்தால் கடும் நடவடிக்கை எடுக்கப்படும் என மாவட்ட ஆட்சியர் எச்சரிக்கை விடுத்துள்ளார்.
மயிலாடுதுறை: மயிலாடுதுறை மாவட்டத்தில் சம்பா மற்றும் தாளடி நெல் அறுவடை பணிகள் தீவிரமடைந்துள்ள நிலையில், தனியார் மற்றும் அரசு அறுவடை இயந்திரங்களுக்கான மணிநேர வாடகையை நிர்ணயம் செய்து மாவட்ட ஆட்சியர் ஹெச்.எஸ்.ஸ்ரீகாந்த் அதிகாரப்பூர்வ உத்தரவை பிறப்பித்துள்ளார். விவசாயிகள் மற்றும் இயந்திர உரிமையாளர்கள் இடையே நிலவி வந்த இழுபறியை முடிவுக்குக் கொண்டு வரும் வகையில் இந்த நடவடிக்கை எடுக்கப்பட்டுள்ளது.
விவசாயிகளின் நீண்டகால கோரிக்கை
மயிலாடுதுறை மாவட்டத்தின் பிரதான தொழிலாக விவசாயம் இருந்து வருகிறது. தற்போது அறுவடை பருவம் தொடங்கியுள்ள நிலையில், தனியார் அறுவடை இயந்திர உரிமையாளர்கள் தன்னிச்சையாக கூடுதல் வாடகை வசூலிப்பதாக மாவட்ட நிர்வாகத்திற்கு புகார்கள் வந்தன. டீசல் விலை உயர்வு மற்றும் பராமரிப்பு செலவுகளைக் காரணம் காட்டி, ஒவ்வொரு பகுதியிலும் ஒவ்வொரு விதமான கட்டணம் வசூலிக்கப்படுவதால் விவசாயிகள் கடும் பாதிப்புக்கு உள்ளாகி வந்தனர்.
இந்த வாடகையினை முறைப்படுத்தக் கோரி விவசாய சங்கங்கள் விடுத்த கோரிக்கையை ஏற்று, மாவட்ட ஆட்சியர் அலுவலகத்தில் முத்தரப்புக் குழுக் கூட்டம் நடைபெற்றது.
முத்தரப்புக் கூட்டம் மற்றும் வாடகை நிர்ணயம்
மாவட்ட ஆட்சியர் தலைமையில் நடைபெற்ற இந்த ஆலோசனைக் கூட்டத்தில், முன்னோடி விவசாயிகள், வேளாண் துறை சார்ந்த உயர் அலுவலர்கள், அறுவடை இயந்திரங்களின் உரிமையாளர்கள் மற்றும் ஏஜெண்டுகள் கலந்து கொண்டனர். இருதரப்பு வாதங்களையும் கேட்டறிந்த ஆட்சியர், டீசல் விலை மற்றும் இயந்திரங்களின் தேய்மானம் ஆகியவற்றை கணக்கில் கொண்டு ஒருமித்த கருத்துடன் பின்வரும் வாடகைத் தொகையை நிர்ணயம் செய்துள்ளார்.
தனியார் அறுவடை இயந்திரங்களுக்கான வாடகை
* பெல்ட் டைப் (Chain Type): ஒரு மணி நேரத்திற்கு ரூ. 2,500/-
* டயர் டைப் (Tyre Type): ஒரு மணி நேரத்திற்கு ரூ. 1,850/-
இந்த கட்டணமானது உடனடியாக அமலுக்கு வருவதாகவும், மாவட்டத்தின் அனைத்து பகுதிகளிலும் இந்த விலையே நடைமுறைப்படுத்தப்பட வேண்டும் என்றும் ஆட்சியர் அறிவுறுத்தியுள்ளார்.
அரசு வேளாண்மைப் பொறியியல் துறை இயந்திரங்கள்
தனியார் இயந்திரங்கள் தவிர்த்து, தமிழக அரசின் வேளாண்மைப் பொறியியல் துறை மூலம் வழங்கப்படும் இயந்திரங்களுக்கான வாடகை மிகக் குறைவாக நிர்ணயிக்கப்பட்டுள்ளது. இது ஏழை விவசாயிகள் மற்றும் சிறு குறு விவசாயிகளுக்கு பெரும் வரப்பிரசாதமாக அமையும்.
அரசு இயந்திரங்களுக்கான வாடகை விபரம்
* பெல்ட் டைப் இயந்திரம்: ஒரு மணி நேரத்திற்கு ரூ. 1,880/- * டயர் டைப் இயந்திரம்: ஒரு மணி நேரத்திற்கு ரூ. 1,160/-
* உழுவை இயந்திரங்கள் (Tractor) மற்றும் இதர கருவிகள்: ஒரு மணி நேரத்திற்கு ரூ. 500/- மட்டுமே.
'உழவன் செயலி' மூலம் முன்பதிவு
விவசாயிகள் தங்கள் இருப்பிடத்தில் இருந்தோ அல்லது வயல்களில் இருந்தோ எளிதாக இயந்திரங்களை முன்பதிவு செய்ய ஏதுவாக "உழவன் செயலி" (Uzhavan App) பயன்படுத்தப்பட வேண்டும். இதில் உள்ள 'இ-வாடகை' (e-Rent) வசதி மூலம் முன்பதிவு செய்து, குறைந்த வாடகையில் அரசு கருவிகளைப் பெற்று பயன்பெறலாம் என ஆட்சியர் தெரிவித்துள்ளார்.
புகார் அளிக்க சிறப்பு எண்கள்
நிர்ணயம் செய்யப்பட்ட வாடகைத் தொகையை விட கூடுதலாக பணம் கேட்கும் உரிமையாளர்கள் அல்லது ஏஜெண்டுகள் மீது சட்டப்படி நடவடிக்கை எடுக்கப்படும் என எச்சரிக்கப்பட்டுள்ளது. விவசாயிகள் இது தொடர்பாக புகார் அளிக்க பின்வரும் எண்களைத் தொடர்பு கொள்ளலாம் என கூறப்பட்டுள்ளது.
* 9600765868
* 8098582064
விவசாயிகள் தங்கள் பகுதியில் உள்ள வட்டாட்சியர்கள், வேளாண்மைத் துறை மற்றும் வேளாண்மைப் பொறியியல் துறை அலுவலர்களிடமும் இது குறித்து புகார் அளிக்கலாம்.
ஆட்சியரின் வேண்டுகோள்
இது குறித்து பேசிய மாவட்ட ஆட்சியர் ஹெச்.எஸ்.ஸ்ரீகாந்த், "விவசாயிகளின் நலனைப் பாதுகாப்பதே அரசின் முக்கிய நோக்கம். இயந்திர உரிமையாளர்கள் லாப நோக்கத்துடன் மட்டும் செயல்படாமல், அறுவடைப் பணிகளில் விவசாயிகளுக்கு முழு ஒத்துழைப்பு வழங்க வேண்டும். நிர்ணயிக்கப்பட்ட தொகையை விட ஒரு பைசா கூட கூடுதலாக வசூலிக்கக்கூடாது. இதனை வேளாண் துறையினர் தீவிரமாக கண்காணிப்பார்கள்" என்று உறுதியளித்தார்.
மயிலாடுதுறை மாவட்ட நிர்வாகத்தின் இந்த அதிரடி அறிவிப்பு, அறுவடைப் பணிகளில் ஈடுபட்டுள்ள லட்சக்கணக்கான விவசாயிகள் மத்தியில் பெரும் வரவேற்பைப் பெற்றுள்ளது.
Before You Go
"வேதனையில் இருக்கும் சிறுவனை இப்டியா இமிடேட் செய்வது" கொந்தளித்த TRB ராஜா
தலைப்பு செய்திகள்
ட்ரெண்டிங் செய்திகள்
