தேனி: சுருளி, கும்பக்கரை அருவியில் சுற்றுலா பயணிகள் செல்ல தொடரும் தடை
தேனி மாவட்டத்தில் உள்ள பிரபல சுற்றுலா தலங்களான சுருளி அருவி , கும்பக்கரை அருவியில் சுற்றுலா பயணிகள் செல்ல தொடரும் தடை. வார விடுமுறை நாட்களில் வரும் சுற்றுலா பயணிகள் ஏமாற்றம்.
தேனி மாவட்டம் பெரியகுளம் அருகே மேற்கு தொடர்ச்சி மலை மற்றும் கொடைக்கானல் மலை அடிவாரத்தில் இயற்கையின் சூழலில் பெரியகுளத்தில் இருந்து 9 கிலோமீட்டர் தொலைவில் அமைந்துள்ளது கும்பக்கரை அருவி. இந்த அருவிக்கு மேற்குத் தொடர்ச்சி மலைப்பகுதியில் பெய்கின்ற மழைநீர் சிறு, குறு ஓடைகள் வழியாக வந்து கும்பக்கரை ஆற்றை அடைந்து அருவியாக ஆர்ப்பரிக்கிறது. இந்த அருவிக்கு தேனி மாவட்டம் மட்டுமின்றி தமிழகத்தின் பல்வேறு மாவட்டங்களில் இருந்தும் வெளி மாநிலங்களில் இருந்தும் சுற்றுலா பயணிகள் வருவது வழக்கம். அருவியின் நீர்பிடிப்பு பகுதிகளான கொடைக்கானல், வட்டக்கானல் மற்றும் மேற்கு தொடர்ச்சி மலைப் பகுதிகளில் கடந்த மாத இறுதியில் பெய்த கனமழையின் காரணமாக கும்பக்கரை அருவிக்கு நீர்வரத்து அதிகரித்து வெள்ளப்பெருக்கு ஏற்பட்டுள்ளது.
இதனால் கடந்த 31ம் தேதி முதல் கும்பக்கரை அருவியில் சுற்றுலா பயணிகள் குளிக்க தடை விதிப்பதாக தேவதானப்பட்டி வனத்துறை சார்பாக அறிவிப்பு பெளியானது. இந்நிலையில் அருவியில் ஏற்பட்ட வெள்ளப்பெருக்கால் நீரின் அளவு குறைந்து நீர் வரத்து சீராகாத நிலையில், சுற்றுலா பயணிகளின் பாதுகாப்பு கருதி இன்றுவரையில் 10 வது நாளாக சுற்றுலா பயணிகள் குளிக்க விதிக்கப்பட்ட தடையானது தொடர்வதாக தேவதானப்பட்டி வனத்துறை சார்பாக அறிவிக்கப்பட்டுள்ளது.
தமிழக கேரள எல்லையை ஒட்டியுள்ள கம்பம் அருகே 15 கிலோமீட்டர் தூரத்தில் சுற்றுலாத்தளமாக அமைந்துள்ளது சுருளி அருவி. பார்ப்பவர்களின் கண்களைக் கவரும் இந்த அருவியில், ஆனந்த குளியிடும்போது போது வரும் ஆனந்தத்திற்கு அளவே இல்லை என்பார்கள். மேற்கு தொடர்ச்சி மலை அடிவாரத்தில் வனப்பகுதிக்குள் 40 அடி உயரம் கொண்ட இந்த அருவி வனப்பகுதியிகளிலிருந்து வரும் தண்ணீர் மூலம் அருவியாக உருவெடுத்துள்ளது. கேரளாவை ஒட்டியுள்ள வனப் பகுதிகளில் தொடர் கனமழையும் பெய்து வருகிறது. சுருளி அருவியில் இதுவரை இல்லாத அளவுக்கு கடுமையான வெள்ளப்பெருக்கு ஏற்பட்டுள்ளது.
சுருளி அருவிக்கு நீர்வரத்து வரும் தூவானம், மேகமலை உள்ளிட்ட வனப்பகுதிகளில் கடுமையான தொடர் கனமழை பெய்துவரும் நிலையில் இதுவரையில் இல்லாத அளவுக்கு காட்டாற்று வெள்ளம் போல் கடுமையான வெள்ளப்பெருக்கு ஏற்பட்டு உள்ளதாக வனத்துறையினர் தெரிவித்தனர்.
அருவியில் ஏற்பட்டுள்ள வெள்ளப்பெருக்கால் சென்ற ஆகஸ்ட் மாதம் ஆரம்பத்திலிருந்து அருவியில் குளிக்க சுற்றுலா பயணிகளுக்கு தடை விதிக்கப்பட்டுள்ள நிலையில் இன்று வரையில் சுமார் 1 மாதத்திற்கு மேலாக அருவியில் குளிக்க விதிக்கப்பட்டுள்ள தடை நீட்டிக்கப்பட்டுள்ளது. இதனால் வார விடுமுறை நாட்களில் அருவியில் குளிக்க வரும் வெளி மாவட்ட, மாநில சுற்றுலா பயணிகள் ஏமாற்றம் அடைந்துள்ளனர்.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்
தலைப்பு செய்திகள்
ட்ரெண்டிங் செய்திகள்
