NEET: "நீட்டை ஒழிக்க வேண்டும்.. தேர்வுகளை மாநிலங்களே நடத்த வேண்டும்" திமுகவை பின்பற்றும் மம்தா!

நீட் தேர்வு தொடர்பாக தொடர் புகார் எழுந்து வரும் நிலையில், அதை ஒழிக்க வேண்டும் என பிரதமர் மோடிக்கு மேற்குவங்க முதலமைச்சர் மம்தா பானர்ஜி கடிதம் எழுதியுள்ளார்.

மம்தா பானர்ஜி - ஸ்டாலின்

இந்தியாவில் இளநிலை மற்றும் முதுநிலை மருத்துவ படிப்புகளுக்கு நீட் எனப்படும் தேசிய தகுதி மற்றும் நுழைவுத் தேர்வு நடைபெற்று வருகிறது. இந்த தேர்வானது மிகுந்த கட்டுப்பாடுகள் மற்றும் தீவிர சோதனைகளுக்குப் பிறகு தேசிய தேர்வு முகமையால் ஆண்டுதோறும் நடத்தப்பட்டு வருகிறது.

நீட் தேர்வு:

அவ்வப்போது வட மாநிலங்களில் நீட் தேர்வில் முறைகேடு நடைபெறுவதாகப் புகார் எழும். அந்த வகையில், இந்தாண்டும் பிரச்னை வெடித்துள்ளது. வழக்கத்துக்கு மாறாக 67 பேர் முதல் மதிப்பெண் பெற்றது, சில மாணவர்களுக்கு கருணை மதிப்பெண் வழங்கப்பட்டது, ஆள் மாறாட்டம், வினாத்தாள் கசிவு என நீட் இளநிலைத் தேர்வில் ஏகப்பட்ட சர்ச்சைகள் கிளம்பின.

பற்றி எரியும் நீட் விவகாரம்: முதலில் நீட் தேர்வில் முறைகேடுகள் நடந்ததை தேசியத் தேர்வுகள் முகமை மறுத்தது. ஆனால் இதுதொடர்பான விசாரணையில் பலர் கைது செய்யப்பட்டனர். பிகார், ஹரியானா ஆகிய மாநிலங்களில் கைது நடந்த நிலையில், மத்திய கல்வி அமைச்சர் தர்மேந்திர பிரதான் நீட் தேர்வில் முறைகேடு நடந்ததை ஒப்புக்கொண்டார். இந்த விவகாரம் தற்போது சிபிஐ வசம் ஒப்படைக்கப்பட்டுள்ளது. 

நாடு முழுவதும் நீட் முறைகேட்டை கண்டித்து எதிர்க்கட்சிகளும் மாணவர்களும் போராட்டத்தில் ஈடுபட்டு வருகின்றனர். இந்த நிலையில், நீட் தேர்வை ஒழிக்க வேண்டும் என பிரதமர் மோடிக்கு மேற்குவங்க முதலமைச்சர் மம்தா பானர்ஜி கடிதம் எழுதியுள்ளார்.

அதில், "வினாத்தாள் கசிவு, தேர்வு நடத்தும் பணியில் ஈடுபட்டுள்ள குறிப்பிட்ட நபர்கள் மற்றும் அதிகாரிகள் லஞ்சம் வாங்கியது, குறிப்பிட்ட மாணவர்களுக்கு மட்டும் கருணை மதிப்பெண்கள் வழங்கியது போன்ற குற்றச்சாட்டுகளில் முழு கவனம் தேவைப்படுகிறது.

முழுமையான, வெளிப்படைத்தன்மை வாய்ந்த, பாரபட்சமற்ற விசாரணை தேவை. இத்தகைய நிகழ்வுகள், இந்த மருத்துவப் படிப்பு சேர்க்கையை எதிர்பார்க்கும் லட்சக்கணக்கான மாணவர்களின் வாழ்க்கையையும், லட்சியங்களையும் பாதிக்கும்.

திமுகவை பின்பற்றும் மம்தா:

இத்தகைய நிகழ்வுகள் நாட்டின் மருத்துவக் கல்வியின் தரத்தை சமரசம் செய்வதோடு மட்டுமல்லாமல், நாட்டின் மருத்துவ வசதிகள்/சிகிச்சையின் தரத்தையும் மோசமாகப் பாதிக்கின்றன. 2017ஆம் ஆண்டுக்கு முன், மாநிலங்கள் தங்கள் சொந்த நுழைவுத் தேர்வுகளை நடத்த அனுமதிக்கப்பட்டதையும் சுட்டிக்காட்ட விரும்புகிறேன்.

மேலும் மத்திய அரசும் மருத்துவப் படிப்புகளில் சேர்க்கைக்கு சொந்தமாகத் தேர்வுகளை நடத்தி வந்தது. இந்த அமைப்பு அதிக பிரச்சனைகள் இல்லாமல் சீராக இயங்கி வந்தது. எனவே, கூட்டு நுழைவுத் தேர்வு மூலம் மருத்துவ படிப்புக்கான மாணவர்களை தேர்வு செய்ய மாநில அரசுக்கு சுதந்திரம் வழங்க வேண்டும்.

எனவே, மாநில அரசுகள் இந்த தேர்வை நடத்தும் முந்தைய முறையை மீட்டெடுக்கவும், நீட் தேர்வை ரத்து செய்யவும் பரிசீலித்து உடனடி நடவடிக்கை எடுக்க வேண்டும் என்று கேட்டுக்கொள்கிறேன்" என கடிதத்தில் மம்தா குறிப்பிட்டுள்ளார்.

தொடக்கத்தில் இருந்தே நீட் தேர்வுக்கு திமுக எதிர்ப்பு தெரிவித்து வரும் நிலையில், தற்போது அதே நிலைபாட்டை சமாஜ்வாதி, திரிணாமுல் போன்ற மற்ற எதிர்க்கட்சிகளும் எடுத்து வருகின்றன.