பக்தர்களே! காசி தமிழ் சங்கமத்திற்கு போக ரெடியா? இந்த இணையதளத்தில் உடனே பதிவு செய்யுங்க
காசி தமிழ் சங்கமத்தின் மூன்றாவது பதிப்பில் கலந்து கொள்வதற்கான இணையதளம் திறக்கப்பட்டுள்ளது.
காசி தமிழ் சங்கமத்தின் 3ஆவது பதிப்புக்கு செல்வதற்கான பதிவு இணையதளத்தை மத்திய கல்வித்துறை அமைச்சர் தர்மேந்திர பிரதான் இன்று தொடங்கி வைத்தார். பின்னர் செய்தியாளரிடம் பேசிய அவர், காசி தமிழ்ச் சங்கத்தின் 3ஆவது பதிப்பு வரும் பிப்ரவரி மாதம் 15ஆம் தேதி, உத்தரப்பிரதேச மாநிலம் வாரணாசியில் தொடங்கும் என்று அறிவித்தார்.
10 நாட்கள் நடைபெறும் இந்த நிகழ்ச்சி, பிப்ரவரி மாதம் 24ஆம் தேதி முடிவடைய உள்ளது. சென்னை தொழில்நுட்பக் கல்வி நிறுவனத்தின் kashitamil.iitm.ac.in என்ற இணையதளத்தில், பிப்ரவரி 1ஆம் தேதி வரை பதிவு செய்து கொள்ளலாம் என மத்திய அமைச்சர் கூறியுள்ளார்.
மூன்றாம் ஆண்டில் காசி தமிழ் சங்கமம்:
கல்வி அமைச்சகத்தின் செயலாளர் சஞ்சய் குமார், பத்திரிகை தகவல் அலுவலகத்தின் முதன்மை தலைமை இயக்குநர் திரேந்திர ஓஜா, உயர்கல்வித்துறை கூடுதல் செயலாளர் சுனில் குமார் பர்ன்வால், பாரதிய பாஷா சமிதியின் தலைவர் சாமு கிருஷ்ண சாஸ்திரி உள்ளிட்ட பிற உயரதிகாரிகளும் இந்த செய்தியாளர் சந்திப்பில் கலந்து கொண்டனர்.
செய்தியாளர்களிடம் பேசிய தர்மேந்திர பிரதான், "தமிழகம் - காசி இடையேயான பிரிக்க முடியாத பிணைப்பு காசி தமிழ்ச் சங்கமம் 3ஆம் பதிப்பின் மூலம் மீண்டும் உயிர் பெறும். பிரதமர் மோடியின் சிந்தனையில் உதித்த காசி தமிழ்ச் சங்கமம், தமிழ்நாடு - காசி இடையேயான காலத்தால் அழியாத பிணைப்பை கொண்டாடவும், நாகரிக தொடர்புகளை வலுப்படுத்தவும், ஒரே பாரதம், உன்னத பாரதம் என்ற உணர்வை மேம்படுத்தவும் உத்வேகம் அளிப்பதற்கான முயற்சியாகும்.
பதிவு செய்வதற்கான இணையதளம்:
இந்த ஆண்டு, காசி தமிழ் சங்கமம் மகா கும்பமேளா நிகழ்ச்சியுடன் ஒன்று சேர்ந்து நடைபெறுவதால் தனிச் சிறப்பான முக்கியத்துவத்தைக் கொண்டுள்ளது. அயோத்தியில் ஸ்ரீ ராம் லல்லாவின் 'பிராண பிரதிஷ்டாவுக்கு' பிறகு நடைபெறும் முதல் சங்கம நிகழ்ச்சி இது.
காசி தமிழ்ச் சங்கமம் 3ஆவது பதிப்பில் தமிழக மக்கள் முழு அளவில் பங்கேற்க வேண்டும். அகத்திய முனிவரின் பல்வேறு பரிமாணங்கள், தமிழ்நாட்டின் சுகாதாரம், தத்துவம், அறிவியல், மொழியியல், இலக்கியம், அரசியல், பண்பாடு, கலை ஆகிய துறைகளில் அவர் அளித்த அளப்பரிய பங்களிப்புகள் குறித்த கண்காட்சி, கருத்தரங்குகள், பயிலரங்குகள், புத்தக வெளியீடு போன்றவையும் ஏற்பாடு செய்யப்பட்டுள்ளன" என்றார்.
தலைப்பு செய்திகள்
ட்ரெண்டிங் செய்திகள்
