குண்டும் குழியுமாக இருந்த சாலைகள்; தனி ஒருவராக சீரமைத்த காவலர் ; கோவை வாசிகள் பாராட்டு

நெடுஞ்சாலை போக்குவரத்து தலைமை காவலர் ஜேம்ஸ் குண்டும், குழியுமாக இருந்து விபத்தினை ஏற்படுத்திய சாலையில் இருந்த பள்ளத்தினை கான்கிரீட் கலவை கொண்டு நிரப்ப ஏற்பாடு செய்தார்.

சாலையை சீரமைத்த காவலர்

கோவை மாவட்டம் அன்னூர் பகுதியில் குண்டும் குழியுமாக இருந்த சாலையை சீரமைத்த காவலர் ஜேம்ஸ்க்கு பல்வேறு தரப்பினரும் பாராட்டு தெரிவித்து வருகின்றனர்.

கோவை, திருப்பூர், ஈரோடு, நீலகிரி மாவட்டங்களின் மையப் பகுதியாகவும், கோவை மாவட்டத்தில் இருந்து கர்நாடக மாநிலத்தை இணைக்கும் சாலையில் அன்னூர் பகுதி இருந்து வருகிறது. நீலகிரி, சத்தி, கர்நாடகா செல்லும் வாகனங்கள் அதிகளவில் இந்த பகுதி வழியாக செல்வதன் காரணமாக 24 மணி நேரமும் அன்னூர் சாலைகளில் போக்குரத்து மிகுந்து காணப்படும். நாள்தோறும் ஆயிரக்கணக்கான வாகனங்கள் இப்பகுதி வழியாக வந்து செல்கின்றன. இந்த நிலையில் அன்னூர் கைகாட்டி பகுதி அருகே சாலையின் நடுவே இருந்த பள்ளத்தை நெடுஞ்சாலைத் துறையினர் கண்டுகொள்ளாமல் இருந்து வந்ததாக கூறப்படுகிறது. இதனால் அந்த இடத்தில் பல்வேறு விபத்துக்கள் நிகழ்ந்துள்ளன. இதனால் அப்பகுதியில் போக்குவரத்து நெரிசல் அடிக்கடி ஏற்பட்டு வந்துள்ளது.

இந்த நிலையில் இன்று அதிகாலை போக்குவரத்து குறைவாக இருந்த நேரத்தில் நெடுஞ்சாலை போக்குவரத்து தலைமை காவலர் ஜேம்ஸ் குண்டும், குழியுமாக இருந்து விபத்தினை ஏற்படுத்திய சாலையில் இருந்த பள்ளத்தினை கான்கிரீட் கலவை கொண்டு நிரப்ப ஏற்பாடு செய்தார். பின்னர் காவலர் ஜேம்ஸ் தனி ஒருவராக சாலையை சீர் செய்யும் பணியில் ஈடுபட்டார். போக்குவரத்து காவலரின் இச்செயலை கண்டு அப்பகுதி பொதுமக்கள் வெகுவாகவே பாராட்டி வருகின்றனர்.

சேதமடைந்து இருந்த சாலையை காவலர் தனி ஒருவராக சீரமைத்ததை அப்பகுதி வழியாக சென்ற வாகன ஓட்டிகள் இதனை வீடியோவாக பதிவு செய்துள்ளனர். மேலும் இதனை சமூக வலைதளங்களிலும் பதிவிட்டுள்ளனர். இந்த வீடியோ தற்போது சமூக வலைத்தளங்களில் வைரலாகி வருகிறது. இதேபோல காவலர் ஜேம்ஸ் கடந்த ஆண்டும் அன்னூர் சத்தி சாலையில் குண்டும் குழியுமாக இருந்த சாலையால் விபத்துகளை தடுக்கும் வகையில் சாலையை சீரமைத்ததுள்ளார். மேலும் காவல் துறையினர் உங்கள் நண்பன் என்பதை உணர்த்தும் வகையில், நண்பர்கள் தினத்தன்று வாகன ஓட்டிகளுக்கு காவலர் ஜேம்ஸ் ராக்கி கயிறு கட்டி விட்டு கவனத்தை ஈர்த்தது குறிப்பிடத்தக்கது.