ஒரு நாள் தலைமை ஆசிரியரான பள்ளி மாணவன்; தலைமையாசிரியர் செய்த நெகிழ்ச்சி சம்பவம்

காலாண்டு தேர்வில் முதலிரண்டு மதிப்பெண்கள் பெறும் மாணவர்கள் ஒருநாள் பள்ளி தலைமை ஆசிரியராகவும், உதவி தலைமை ஆசிரியராகவும் பொறுப்பு வழங்கப்படும் என தலைமையாசிரியர் தெரிவித்திருந்தார்.

தலைமை ஆசிரியரான பள்ளி மாணவன்

கோவை மாவட்டம் மாக்கினாம்பட்டி அரசுப் பள்ளியில் காலாண்டு தேர்வில் முதல் மதிப்பெண் பெற்ற பத்தாம் வகுப்பைச் சேர்ந்த மாணவனை, தலைமை ஆசிரியர் பாராட்டி ஒரு நாள் பள்ளி தலைமை ஆசிரியராக இருக்கையில் அமர வைத்தார்.

கோவை மாவட்டம் பொள்ளாச்சி அடுத்துள்ள மாக்கினாம்பட்டி ஊராட்சியில் அரசு உயர் நிலைப்பள்ளி செயல்பட்டு வருகிறது. இந்தப் பள்ளியில் 6 முதல் பத்தாம் வகுப்பு வரை 276 மாணவ, மாணவிகள் கல்வி பயின்று வருகின்றனர். இந்நிலையில் காலாண்டு தேர்வில் முதல் மதிப்பெண் பெறும் மாணவர் ஒருநாள் பள்ளி தலைமை ஆசிரியராகவும், இரண்டாவது மதிப்பெண் பெரும் மாணவர் உதவி தலைமை ஆசிரியராகவும் பொறுப்பு வழங்கப்படும் என அப்பள்ளியின் தலைமை ஆசிரியர் ஹரி கிருஷ்ணன் பள்ளி மாணவர்களிடம் ஊக்கத்தை ஏற்படுத்தும் வகையில் தெரிவித்திருந்தார்.

இந்நிலையில் நடந்து முடிந்த காலாண்டு தேர்வில் தர்ஷன் என்ற மாணவர் முதல் மதிப்பெண் பெற்றார். இதேபோல கவின்ராஜ் என்ற மாணவர் இரண்டாவது மதிப்பெண் பெற்றார். முதலிரண்டு மதிப்பெண்கள் பெற்ர தர்ஷன் மற்றும் கவின்ராஜ் இருவரையும் தலைமை ஆசிரியர், ஆசிரியர்கள் மற்றும் மாணவர்கள் பாராட்டுகளை தெரிவித்தனர். முதல் மதிப்பெண் பெற்ற தர்ஷனுக்கு சால்வை அணிவித்த தலைமை ஆசிரியர் ஹரி கிருஷ்ணன், தலைமை ஆசிரியரின் இருக்கையில் அமர வைத்தார். இரண்டாவது மதிப்பெண் பெற்ற கவின்ராஜை உதவி தலைமை ஆசிரியர் இருக்கையில் அமர வைத்து இன்று ஒரு நாள் மட்டும் பொறுப்புகளை இரு மாணவர்களுக்கும் தலைமை ஆசிரியர் ஹரிகிருஷ்ணன் வழங்கி உள்ளார்.

இதுகுறித்து ஒரு நாள் தலைமை ஆசிரியரான தர்ஷன் கூறுகையில், “பள்ளி மாணவ மாணவிகள் இடையே கல்வி ஆர்வத்தையும் ஊக்கத்தையும் ஏற்படுத்தும் விதமாக எங்கள் பள்ளி தலைமை ஆசிரியர் ஹரி கிருஷ்ணன் கூறியது எங்களுடைய மிகுந்த ஆர்வத்தை ஏற்படுத்தியது. இதனால் நன்றாக படித்து பள்ளியில் முதல் மதிப்பெண் பெற்றேன். அதனால் எனக்கு இன்று ஒரு நாள் தலைமை ஆசிரியர் பொறுப்பு கிடைத்தது மிகவும் மகிழ்ச்சி அளிக்கிறது. இதேபோல் மற்ற அரசு பள்ளிகளிலும் நடந்தால் எங்களைப் போன்ற மாணவர்களிடையே மேலும் கல்வியை கற்க ஆர்வமும், ஊக்கமும் ஏற்படும். தலைமை ஆசிரியரின் இச்செயல் என்னை மேலும் நன்றாக படிக்க தூண்டும் வகையில் உள்ளது” எனத் தெரிவித்தார். பள்ளி தலைமையாசிரியர் ஹரி கிருஷ்ணன் கூறுகையில், ”கடந்தாண்டு பொதுத் தேர்வில் 100% தேர்ச்சி பெற்றோம். அதைவிட நடப்பாண்டில் மாநில அளவில் பள்ளி மாணவர்கள் வெற்றி பெற வேண்டும் என ஊக்கத்தை அளித்து கல்வியை கற்பித்து வருகிறோம். மாணவர்களும் ஆர்வமுடன் கல்வி பயின்று வருகின்றனர். அவர்களை ஊக்குவிக்கும் வகையில் முதலிரண்டு மதிப்பெண்கள் பெற்ற மாணவர்களுக்கு தலைமையாசிரியர் மற்றும் உதவி தலைமையாசிரியர் பொறுப்பு வழங்கினோம்” எனத் தெரிவித்தார்.