கோவையில் 5 தொகுதிகளில் தனுஷ் நற்பணி இயக்கம் – அறிவிப்பு வெளியீடு

Dhanush Political Entry : கோவையில் 5 சட்டமன்றத் தொகுதிகளில் தனுஷ் நற்பணி இயக்கத்தை விரிவுபடுத்த அறிவிப்பு வெளியாகியுள்ளது.

தனுஷ்

Source : X

நடிகர் தனுஷின் ரசிகர்கள் மற்றும் நற்பணி இயக்கப் பணிகளை கோவை மாவட்டத்தில் மேலும் விரிவுபடுத்தும் வகையில், 5 சட்டமன்றத் தொகுதிகளில் நற்பணி இயக்கங்களை செயல்படுத்துவதற்கான அறிவிப்பு வெளியாகியுள்ளது.

நடிகர் தனுஷின் அரசியல் வருகை குறித்த பேச்சுகள் சமீபகாலமாக மீண்டும் தீவிரமடைந்துள்ளன. ரசிகர் மன்றத்தின் நற்பணி நடவடிக்கைகளை விரிவுபடுத்தி வரும் தனுஷ், சமீபத்தில் தான் படித்த பள்ளிக்குச் சென்று மாணவர்களிடம் உரையாற்றியதுடன், எம்ஜிஆர் சிலைக்கு மாலை அணிவித்த நிகழ்வும் கவனம் பெற்றது. மேலும், ரசிகர்களை சமூகப் பணிகளில் தீவிரமாக ஈடுபடுமாறு அவர் தொடர்ந்து வலியுறுத்தி வருகிறார். இதனிடையே, தனுஷுக்கு அரசியலில் ஆர்வம் இருப்பதாக சில ஊடகங்கள் பெயர் குறிப்பிடாத ஆதாரங்களை மேற்கோள் காட்டி செய்தி வெளியிட்டுள்ளன. எனினும், தனுஷ் தரப்பில் அரசியல் கட்சி தொடங்குவது அல்லது தேர்தல் அரசியலில் களமிறங்குவது தொடர்பாக இதுவரை அதிகாரப்பூர்வ அறிவிப்பு எதுவும் வெளியாகவில்லை. இந்த சூழலில், கோவையில் 5 சட்டமன்றத் தொகுதிகளில் தனுஷ் நற்பணி இயக்கத்தை ஒருங்கிணைக்கும் அறிவிப்பும் வெளியாகியுள்ளது.

கோவையில் 5 தொகுதிகளில் தனுஷ் நற்பணி இயக்கம்

அனைத்திந்திய தலைமை தனுஷ் நண்பர்கள் நற்பணி மன்றம் சார்பில் வெளியிடப்பட்டுள்ள இந்த அறிவிப்பில், கோவை மாவட்டத் தலைமைக்கு உட்பட்ட நற்பணி இயக்கங்கள் செயல்படும் தொகுதிகள் குறிப்பிடப்பட்டுள்ளன.

அதன்படி, கோவை வடக்கு, கோவை கவுண்டம்பாளையம், கோவை சிங்காநல்லூர், கோவை சூலூர் மற்றும் கோவை மேட்டுப்பாளையம் ஆகிய 5 சட்டமன்றத் தொகுதிகளில் தனுஷ் நற்பணி இயக்கத்தின் செயல்பாடுகளை மேற்கொள்ள அறிவுறுத்தப்பட்டுள்ளது.

இந்த 5 தொகுதிகளுக்கும் உட்பட்ட பகுதிகளில் நற்பணி இயக்கப் பணிகளை முன்னெடுப்பதுடன், புதிய உறுப்பினர்களை இணைத்து இயக்கத்தை வலுப்படுத்தும் பணிகளும் மேற்கொள்ளப்பட உள்ளதாக அறிவிப்பில் தெரிவிக்கப்பட்டுள்ளது.

மேலும், புதிதாக பொறுப்பேற்கும் நிர்வாகிகள் மற்றும் உறுப்பினர்கள், கோவை மாவட்டத் தலைவர் G. சங்கர் அவர்களை தொடர்புகொண்டு தேவையான தகவல்களைப் பெற்றுக்கொள்ளுமாறு கேட்டுக்கொள்ளப்பட்டுள்ளது. அவரது வழிகாட்டுதலுடன் அனைவரும் ஒன்றுபட்டு செயல்பட வேண்டும் என்றும் அறிவிப்பில் குறிப்பிடப்பட்டுள்ளது.

அனைத்திந்திய தலைமை தனுஷ் நண்பர்கள் நற்பணி மன்றத்தின் தலைவர் V. சுப்ரமணியசிவா மற்றும் அமைப்புச் செயலாளர் B. ராஜா ஆகியோர் கையெழுத்திட்டு இந்த அறிவிப்பை வெளியிட்டுள்ளனர்.