‘லோன் கிடைக்கல’ - மத்திய நிதியமைச்சர் நிர்மலா சீதாராமனிடம் புகார் கூறிய நபரால் பரபரப்பு

கடனுதவி வழங்கும் விழாவில் கலந்து கொண்ட சதீஷ் என்ற நபர் தனக்கு லோன் தரவில்லை என நிதியமைச்சர் நிர்மலா சீதாராமனிடம் புகார் கூறியதால் சலசலப்பு ஏற்பட்டது.

சதீஷ்

கோவை கொடிசியா அரங்கில் மாபெரும் கடனுதவி வழங்கும் விழா நடைபெற்றது. இந்நிகழ்ச்சியில் சுமார் ஒரு இலட்சம் வங்கி கணக்குகளுக்கு 3749 கோடி ரூபாய் கடனுதவிகளை மத்திய நிதி அமைச்சர் நிர்மலா சீதாராமன் வழங்கினார். இதையடுத்து பேசிய நிர்மலா சீதாராமன், "வங்கிகள் மூலமாக மானியம் எந்த கடனுக்கு உள்ளதோ அந்தப் பயனாளிகளுக்கு கடன் சென்று சேருகிறதா என்ற முயற்சியை நாம் மேற்கொண்டு வருகிறோம். இதனை புதுச்சேரி, ராஜஸ்தான், சிக்கிம், நாகாலாந்து ஆகிய இடங்களில் செய்துள்ளோம். கோவையில் இந்த முயற்சி ஆகஸ்ட் மாதத்தில் துவங்கப்பட்டது. அதன்படி தற்போது நடைபெறும் விழாவில் 23,800 பேருக்கு 1278 கோடி ரூபாய் ரீடைல் லோன் வழங்கப்படுகிறது. மேலும் இன்று 2904 புதிய முத்ரா லோன்கள் வழங்கப்படுகிறது.

அதேபோல் கிராமப்புறத்தில் இருக்கும் பட்டியல் இனத்தை சார்ந்த மற்றும் மலைவாழ் பகுதியில் சார்ந்த இளைஞர்களுக்கும் பெண்களுக்கும் ஸ்டாண்ட் அப் இந்தியா லோன் 18 பேருக்கு கிட்டத்தட்ட 4 கோடி மதிப்பிற்கு தரப்படுகிறது. மேலும் சாலையோர வியாபாரிகள் 7911 பேருக்கு 9.27 கோடி கடன் வழங்கப்படுகிறது. சிறு, குறு தொழில் நிறுவனங்களுக்கு 1043 கோடி கடன் உதவி வழங்கப்படுகிறது. மேலும் 2867 விவசாயிகளுக்கு 30 கோடி ரூபாய் கடன் உதவி வழங்கப்படுகிறது. இதேபோல் வேளாண் துறை சார்ந்த கடன் உதவிகள் வழங்கப்படுகிறது. ஆகஸ்ட் மாதம் முதல் மேற்கொள்ளப்பட்ட முயற்சியின் காரணமாக ஒரு லட்சத்திற்கும் மேற்பட்ட வங்கி கணக்காளர்களுக்கு 3749 கோடி கடன் உதவிகள் வழங்கப்படுகிறது.

கடன் தேடி வங்கிகளுக்குச் சென்ற காலம் போய் தற்பொழுது வங்கிகள் நம்மை தேடி வரும் சூழல் உருவாகி உள்ளது. மேலும் சிறுகுறு தொழில்களுக்கு கடன் வழங்கக்கூடிய ஒரே வங்கி நம் நாட்டில் உள்ளது. இன்று கோவையில் இரண்டாவது SIDBI வங்கி துவங்கப்பட்டுள்ளது" எனத் தெரிவித்தார்.

இதனிடையே கடனுதவி வழங்கும் விழாவில் கலந்து கொண்ட சதீஷ் என்ற நபர் தனக்கு லோன் தரவில்லை என நிதியமைச்சர் நிர்மலா சீதாராமனிடம் புகார் கூறியதால் சலசலப்பு ஏற்பட்டது. பங்க் ஆப் பரோடா வங்கி தனக்கு பிணையில்லா கடன் தரவில்லை என அவர் புகார் கூறியபடி அங்கிருந்து வெளியேறினார். இதனையடுத்து சதீஷ் என்பவரை வரவழைத்து விசாரித்த மத்திய நிதியமைச்சர் நிர்மலா சீத்தாராமன் அவருக்கு என்ன பிரச்சனை என்பதை கேட்டறிந்தார். அப்போது நீங்கள் உங்களுடைய ஆவணங்களை கொடுங்கள். உங்களுக்கு கண்டிப்பாக செய்துத் தரப்படும் என நிர்மலா சீதாராமன் உறுதியளித்தார்.