கிரிக்கெட் சூதாட்டத்தில் பணத்தை இழந்த விரக்தியில் இளைஞர் தற்கொலை - கோவையில் அதிர்ச்சி
கிரிக்கெட் சூதாட்டத்தில் பணத்தை இழந்த இளைஞர் பூச்சி மருந்து குடித்து தற்கொலை செய்து கொண்டது குறித்து காவல் துறையினர் விசாரணை நடத்தி வருகின்றனர்.
கோவையில் கிரிக்கெட் சூதாட்டத்தில் பணத்தை இழந்த இளைஞர் பூச்சி மருந்து குடித்து தற்கொலை செய்து கொண்டது குறித்து காவல் துறையினர் விசாரணை நடத்தி வருகின்றனர்.
கோவை மாவட்டம் பொள்ளாச்சி அருகே உள்ள சப்பட்டை கிழவன் புதூர் பகுதியைச் சேர்ந்தவர் சபாநாயகம். 35 வயதான இவர், கார் டீலர் தொழில் செய்து வந்துள்ளார். இந்நிலையில் இவர் நேற்று இரவு 2:10 மணிக்கு காந்திபுரம் செவன்த் எக்ஸ்டென்ஷன் உள்ள தனியார் ஹோட்டலில் முன்பதிவு செய்து தங்கி இருந்து உள்ளார். இன்று அதிகாலையில் அறையை காலி செய்யவதாக கூறியுள்ளார். இதற்கான தகவலை கூற விடுதி ஊழியர்கள், அவருடைய செல்போன் எண்ணுக்கு அழைத்த போது போன் சுவிட்ச் ஆப் ஆக இருந்துள்ளது. இதையடுத்து விடுதி ஊழியர்கள் அவரது அறைக்கு சென்று வெகுநேரம் கதவை தட்டியும் கதவை திறக்கவில்லை. இதனால் சந்தேகம் அடைந்த விடுதி ஊழியர்கள் வேறு மாற்று சாவியைக் கொண்டு அறை கதவை திறந்து பார்த்துள்ளனர்.
அப்போது பாத்ரூம் அருகே இறந்த நிலையில் சபாநாயகம் கிடந்துள்ளார். இதனைப் பார்த்து அதிர்ச்சி அடைந்த விடுதி ஊழியர்கள் உடனே 108 ஆம்புலன்ஸ்க்கு தகவல் கூறியுள்ளனர். இதன் பேரில் விரைந்து வந்த ஆம்புலன்ஸ் ஊழியர்கள் அவரை பரிசோதித்து பார்த்த விட்டு, அவர் உயிரிழந்து ஐந்து மணி நேரம் ஆகிவிட்டதாக கூறியுள்ளனர். இது தொடர்பாக ரத்தினபுரி காவல் நிலையத்திற்கு விடுதி ஊழியர்கள் தகவல் தெரிவித்தனர். இதையடுத்து அங்கு வந்த காவல் துறையினர் உடலைக் கைப்பற்றி உடற்கூராய்விற்காக கோவை அரசு மருத்துவமனைக்கு அனுப்பி வைத்தனர். இந்த சம்பவம் குறித்து காவல் துறையினர் வழக்குப்பதிவு செய்து விசாரணை நடத்தி வருகின்றனர்.
காவல் துறையினர் நடத்திய முதற்கட்ட விசாரணையில், சபாநாயகம் கிரிக்கெட் சூதாட்டத்தில் செயலியில் பணத்தை இழந்ததால் கடன் நெருக்கடி காரணமாக மனவேதனையில் தற்கொலை செய்து உயிரிழந்திருக்கலாம் என தெரியவந்தது. கிரிக்கெட் சூதாட்டத்தில் 90 இலட்ச ரூபாய் வரை பணத்தை இழந்து இருக்கலாம் எனவும், பூச்சி மருத்து குடித்து தற்கொலை செய்து கொண்டதும் தெரியவந்துள்ளது. அவர் எந்த செயலியில் இந்த சூதாட்டத்தில் ஈடுபட்டார்? எவ்வாறு இவ்வளவு தொகையை இழந்தார்? என்பது குறித்தும், தற்கொலைக்கு வேறு ஏதேனும் காரணம் உள்ளதா என்பது குறித்தும் காவல் துறையினர் விசாரணையை மேற்கொண்டு வருகின்றனர்.
வாழ்க்கையில் கவலைகளும், துன்பங்களும் வந்து கொண்டுதான் இருக்கும். அவைகளை தற்காலிகமாக்குவதும், நிரந்தரமாக்குவதும் நாம் கையாளும் விதத்தில் தான் உள்ளது. தற்கொலை என்பது எதற்கும் தீர்வு ஆகாது. வாழ்க்கைக்கான நோக்கத்தைப் பற்றிய தெளிவும் அதை அடைவதற்கான வழிகளையும் கண்டறிய துவங்கினால் வாழ்க்கை சுவாரஸ்யமானதாக இருக்கும். அப்படி தங்களுக்கு மன அழுத்தம் ஏற்பட்டாலோ தற்கொலை எண்ணம் உண்டானாலும் அதனை மாற்ற கீழ்காணும் எங்களுக்கு அழைக்கவும். மாநில உதவி மையம் :104.
சினேகா தன்னார்வ தொண்டு நிறுவனம்,
எண்; 11, பார்க் வியூவ் சாலை, ஆர்.ஏ. புரம்,
சென்னை - 600 028.
தொலைபேசி எண் - (+91 44 2464 0050, +91 44 2464 0060)
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்
தலைப்பு செய்திகள்
ட்ரெண்டிங் செய்திகள்
