விஸ்வகர்மா திட்டம்; பொய் பிரச்சாரம் செய்யும் அண்ணாமலை - செல்வப்பெருந்தகை

ஒன்றிய அரசின் விஸ்வகர்மா திட்டமும் தமிழ்நாடு அரசு கொண்டு வந்துள்ள கலைஞர் கைவினை திட்டமும் ஒன்றல்ல.

செல்வப்பெருந்தகை

Source : Whats app

சென்னை இராயப்பேட்டையில் உள்ள தமிழ்நாடு காங்கிரஸ் கமிட்டியின் தலைமை அலுவலகமான சத்தியமூர்த்தி பவனில் தமிழ்நாடு காங்கிரஸ் கமிட்டி தலைவர் செல்வப் பெருந்தகை செய்தியாளர்களை சந்தித்தார். இந்த செய்தியாளர் சந்திப்பின் போது தமிழ்நாடு சிறுபான்மையினர் நல ஆணையத்தின் முன்னாள் தலைவர் பீட்டர் அல்போன்ஸ் , மாநில துணை தலைவர்கள் கோபன்னா, சொர்னா சேதுராமன், மாநில அமைப்பு செயலாளர் ராம் மோகன் இளைஞர் காங்கிரஸ் மாநில தலைவர் லெனின் பிரசாத் இலக்கிய அணி தலைவர் புத்தன் உள்ளிட்ட பலர் உடன் இருந்தனர் .

இந்த செய்தியாளர் சந்திப்பின்போது பேசிய தமிழ்நாடு காங்கிரஸ் கமிட்டி தலைவர் செல்வப்பெருந்தகை ;

தமிழ்நாடு முழுவதும் உள்ள ஊராட்சி, பேரூராட்சி , நகராட்சி , மாநகராட்சி என அனைத்து இடங்களுக்கும் கமிட்டி சீரமைப்பு பணியை துவக்கவுள்ளோம். இதற்கு முன்னாள் நாடாளுமன்ற உறுப்பினர் பீட்டர் அல்போன்ஸ் சீரமைப்பு குழுத் தலைவராக இன்று நியமனம் செய்யப்பட்டார்.

39 நாடாளுமன்ற தொகுதிகளில் 3 தொகுதி ஒரு மண்டலமாக பிரித்து மண்டல தலைவர், ஒவ்வொரு நாடாளுமன்றத்திற்கு ஒரு அமைப்பாளர் என 13 மண்டலங்களுக்கு 13 அமைப்பாளர்கள் நியமிக்கப்பட்டுள்ளனர். அதே போல் 234 தொகுதிகளுக்கு அமைப்பாளர்கள் உள்ளனர். இவர்கள் மூலம் வரும் சட்டமன்ற தேர்தலுக்குள் கிராம கமிட்டி அமைக்க திட்டமிட்டு  அடுத்த 2 மாதத்திற்குள் முடிக்க திட்டமிட்டுள்ளோம்.

காங்கிரஸ் கட்சியின் நிறுவன நாள் வரும் 28 ஆம் தேதி கொண்டப்படவுள்ளது. அப்போது சென்னையில் தொகுதி வாரியவுள்ளவர்களை அழைத்து பயிற்சி அளிக்கவுள்ளோம். காங்கிரஸ் கட்சி வலுப்பெற்றால் இந்தியா கூட்டணி வலுப்பெறும். காங்கிரஸ் வலுப்பெற்றால் இந்தியா வலுப்பெறும் கூட்டணியும் வலுப்பெறும். ஜனநாயகத்தின் மீது நம்பிக்கை இருந்தால் பாராளுமன்றம் முறையாக நடைபெறும்.

பொய் பிரச்சாரம் செய்யும் அண்ணாமலை

சபரீசன் திமுகவில் பொறுப்பில் உள்ளாரா ? எந்த கட்சியில் பொறுப்பிலுள்ளார் ? ஒரு தனி மனிதர் யாரையும் சந்திக்க கூடாது என்றில்லை. முதல்வர் தான் சந்திக்கவில்லை என்பதை தெளிவுப்படுத்தி விட்டார்கள். விஸ்வகர்மா திட்டமும் தமிழ்நாடு அரசு கொண்டு வந்துள்ள கலைஞர் கைவினைத் திட்டமும் ஒன்றில்லை பொய் பிரச்சாரம் செய்கிறார் அண்ணாமலை.

18 வயது என்பது அவர்கள் ஆராய்ச்சி படிப்பிற்கு மேல் படிப்பிற்கு செல்லக் கூடாது என்பது தான் ஒன்றிய அரசின் எண்ணம். ஆனால் தமிழ்நாடு அரசு திட்டத்தில் அப்படியில்லை. அதே போல் இவர் தான் இத்தொழிலை செய்ய வேண்டும் என்றில்லை , யார் வேண்டுமானாலும் எத்தொழிலை வேண்டுமானாலும் செய்யலாம் என்றுள்ளது.