Crime : கருமுட்டையை விற்பனை செய்ய மறுத்த தோழி...! ரவுடி கணவருடன் சேர்ந்து கொடூரமாக தாக்கிய பெண்..!
கருமுட்டையை விற்பனை செய்ய மறுத்த தோழியை தனது ரவுடி கணவருடன் சேர்ந்து இளம்பெண் கொடூரமாக தாக்கிய சம்பவம் பெரும் பரபரப்பை ஏற்படுத்தியுள்ளது.
சென்னை, திருவொற்றியூர் என்.டி.ஓ. குப்பம் அடுக்குமாடி குடியிருப்பில் 118வது பிளாக்கில் வசித்து வருபவர் சூரஜ்ஜெனிஸ் கண்ணா. இவருக்கு வயது 25. இவரது மனைவி ஐஸ்வர்யா (வயது 22). சூரஜ்ஜெனிஸ் கண்ணா அந்த பகுதியில் ரவுடியாக வலம் வருகிறார். அவர் மீது அந்த பகுதியில் உள்ள காவல்நிலையத்தில் ஏராளமான வழக்குகள் நிலுவையில் உள்ளது.
ஐஸ்வர்யாவின் தோழி சுருதி.( வயது 22). இவர் எர்ணாவூர் சுனாமி குடியிருப்பு பகுதியைச் சேர்ந்தவர். இவரது கணவர் விஜய். இவரும் ரவுடி ஆவார். விஜய்க்கும், சுருதிக்கும் இரண்டரை வயதில் ஆண் குழந்தை உள்ளது. விஜய் சுருதியை அடித்து துன்புறுத்தியதால் சுருதி தனது குழந்தையுடன் தோழி ஐஸ்வர்யா வீட்டிற்கு சென்றுள்ளார். கடந்த சில மாதங்களாக சுருதி தனது தோழி ஐஸ்வர்யா வீட்டில்தான் தங்கியுள்ளார்.
இந்த நிலையில், சூரஜ்ஜெனிஸ் கண்ணாவும், ஐஸ்வர்யாவும் சேர்ந்து சுருதியை வைத்து பணம் சம்பாதிக்க சதித்திட்டம் தீட்டியுள்ளனர். சுருதியின் கருமுட்டையை சட்டவிரோதமாக எடுத்து விற்பனை செய்ய முடிவு செய்துள்ளனர். சுருதியிடம் கருமுட்டையை விற்றால் ரூபாய் 20 ஆயிரம் வரை பணம் கிடைக்கும் என்று மூளைச்சலவை செய்து சம்மதிக்க வைத்துள்ளனர். சுருதியும் இதற்கு சம்மதம் தெரிவித்துள்ளார்.
இதையடுத்து, தாம்பரத்தில் உள்ள மருத்துவமனைக்கு சுருதியை தம்பதிகளான சூரஜ்ஜெனிஸ் கண்ணாவும், ஐஸ்வர்யாவும் அனுப்பி வைத்தனர். அங்குள்ள பெண் தரகரை நேரில் சந்திக்குமாறும் அறிவுறுத்தியுள்ளனர். அங்கு சென்று பெண் தரகரிடம் விசாரித்த சுருதியிடம், அந்த பெண் தரகர் கருமுட்டை விற்பனைக்கு ரூபாய் 50 ஆயிரம் வரை தருவதாக கூறியுள்ளனர்.
தான் ஏமாற்றப்பட்டதை அறிந்த சுருதி தன்னுடைய கணவர் விஜய்க்கு போன் செய்து நடந்ததை கூறியுள்ளார். அவர் சுருதியை உடனே வீட்டிற்கு வருமாறு அறிவுறுத்தியுள்ளார். ஆனால் சுருதி தன்னுடைய தோழி ஐஸ்வர்யாவிடம் கூறிவிட்டு வருவதாக கூறியுள்ளார். அங்கு சென்ற சுருதி தனது தோழி ஐஸ்வர்யாவிடம் நடந்ததை கூறி தான் கணவர் வீட்டுக்குச் செல்வதாக கூறியுள்ளார். சுருதி கருமுட்டையை விற்பனை செய்யாமல் வந்ததால் சூரஜ்ஜெனிஸ் கண்ணாவும், ஐஸ்வர்யாவும் ஆத்திரமடைந்துள்ளனர்.
ஆத்திரத்தில் ரவுடி சூரஜ்ஜெனிஸ் கண்ணா தான் வைத்திருந்த கத்தியின் பின்புறத்தில் சுருதியை சரமாரியாக தாக்கியுள்ளார். அவருடன் சேர்ந்து ஐஸ்வர்யாவும் தோழி என்றும் பாராமல் சுருதியை தாக்கியுள்ளார். அவர்களிடம் இருந்து தப்பியோடிய சுருதி திருவொற்றியூர் காவல்நிலையத்தில் புகார் அளித்தார்.
சுருதி அளித்த புகாரின் அடிப்படையில் ரவுடியான சூரஜ் ஜெனிஸ் கண்ணாவையும், அவரது மனைவி ஐஸ்வர்யாவையும் போலீசார் கைது செய்தனர். மேலும், கருமுட்டை விற்பனை குற்றச்சாட்டில் சிக்கிய தனியார் மருத்துவமனையிலும் விசாரணை நடத்தி வருகின்றனர். அந்த பெண் தரகர் யார்? கருமுட்டை விற்பனையில் யார்? யாருக்கு? தொடர்பு என்றும் தீவிரமாக விசாரித்து வருகின்றனர்.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்
தலைப்பு செய்திகள்
ட்ரெண்டிங் செய்திகள்
