Bhagyaraj: அன்று குரு பாரதிராஜா.. இன்று சிஷ்யன் பாக்யராஜ்..! ஒரே மாதத்தில் மீளாத துயரத்தில் தமிழ் சினிமா!

தமிழ் சினிமாவின் மாபெரும் ஆளுமைகளான இயக்குனர்கள் பாரதிராஜாவும், பாக்யராஜும் ஒரே மாதத்தில் உயிரிழந்த சம்பவம் ரசிகர்கள் மத்தியில் சோகத்தை ஏற்படுத்தியுள்ளது.

சிஷ்யன் பாக்யராஜுடன் குரு பாரதிராஜா

Source : twitter

தமிழ் சினிமாவை அடுத்தகட்டத்திற்கு எடுத்துச் சென்றவர்கள் வெகு சிலரே. அவர்களில் தவிர்க்க முடியாதவர் இயக்குனர் பாரதிராஜா. அவரது சிஷ்யனும், பிரபல இயக்குரும் நடிகருமானவர் பாக்யராஜ். 

குரு பாரதிராஜா, சிஷ்யன் பாக்யராஜ்:

தமிழ் சினிமாவை முதன்முறையாக சினிமா செட்களில் இருந்து கிராமப்புறங்களுக்கு கொண்டு சென்ற பெருமைக்குச் சொந்தக்காரர் பாரதிராஜா. அவர் கடந்த 10ம் தேதி உடல்நலக்குறைவாலும், வயது மூப்பாலும் காலமானார். அவரது மரணம் மொத்த தமிழ் சினிமாவையும் சோகத்தில் ஆழ்த்தியது.

அவரது மரணம் மொத்த தமிழ்நாட்டையும் சோகத்தில் இருந்து மீட்காத நிலையில், தற்போது திரைக்கதை ஜாம்பவானும், பிரபல நடிகரும், இயக்குனருமாகிய பாக்யராஜ் காலமானார். இது தமிழ் சினிமாவை மேலும் சோகமாக்கியுள்ளது. 

தமிழ் சினிமாவின் அடுத்தகட்டம்:

ஆக்ஷன், ஆன்மீகம் பாணியிலே திரைப்படங்கள் வெளியாகி வந்து கொண்டிருந்த தருணத்தில் கிராமங்கள், குடும்ப கதைகள், உறவுச்சிக்கல்களை மிக அழகாக கையாண்ட திறமைசாலிகள் பாரதிராஜாவும், அவரது சிஷ்யன் பாக்யராஜும் ஆவார்கள். 

பாரதிராஜாவின் 16 வயதினிலே, கிழக்கே போகும் ரயில், சிகப்பு ரோஜாக்கள், அலைகள் ஓய்வதில்லை, புதுமை பெண், மண்வாசனை, முதல் மரியாதை, கடலோர கவிதைகள், வேதம் புதிது, புது நெல்லு புது நாத்து, கிழக்கு சீமையிலே படங்கள் தமிழ் சினிமா இதுவரை பார்க்காத பக்கத்தை தமிழ் ரசிகர்களுக்கு காட்டிய படங்கள். 

தனது குருநாதருக்கு சற்றும் சளைக்காத பாக்யராஜ் சுவரில்லாத சித்திரங்கள், ஒரு கை ஓசை, அந்த 7 நாட்கள், இன்று போய் நாளை வா,தூறல் நின்னு போச்சு, முந்தானை முடிச்சு, சின்ன வீடு, ராசுக்குட்டி,  தாவணிக் கனவுகள், பவுனு பவுனுதான் என குடும்பங்கள் கொண்டாடும் பல வெற்றிப்படங்களை இயக்கியுள்ளார்.

முதன்மை சிஷ்யன்:

பாரதிராஜாவிற்கு ஏராளமான உதவியாளர்கள் இருந்தாலும் ரசிகர்கள் மனதில் முதலில் வந்து நிற்கும் உதவியாளராக எப்போதும் பாக்யராஜே திகழ்கிறார். ஏனென்றால், பாரதிராஜாவின் திறமைக்கு நிகரான திறமையை கோலிவுட்டில் காட்டியவர் பாக்யராஜ். மேலும், இயக்குனராக மட்டுமின்றி நடிகராகவும் வெற்றி பெற்றவர். பாரதிராஜாவின் சிகப்பு ரோஜாக்கள், நிறம் மாறாத பூக்கள், புதிய வார்ப்புகள் ஆகிய படங்களில் வசன கர்த்தவாகாவும் பாக்யராஜ் பணியாற்றியுள்ளார். 

ஒரே மாதத்தில் குரு, சிஷ்யன் மரணம்:

பாரதிராஜாவும், பாக்யராஜும் தமிழ் சினிமாவிற்கு ஆற்றிய பங்களிப்புகள் என்பது மிக மிகப்பெரியது. தமிழ் சினிமாவை உலகளவில் பேச வைத்ததில் இவர்களின் திரைப்படங்கள் மிக மிக முக்கியமானது. இப்பெரும் புகழும், பெயரும் கொண்ட பாரதிராஜா, பாக்யராஜ் இருவரும் ஒரே மாதத்தில் 17 நாட்கள் இடைவெளியில் காலமானது ரசிகர்கள் மத்தியில் சோகத்தை ஏற்படுத்தியுள்ளது.