ஒரு இன்ஸ்டாகிராம் விளம்பரத்திற்கு இத்தனை லட்சமா..ஶ்ரீலீலா மாதத்திற்கு இவ்வளவு சம்பாதிக்கிறாரா!

நடிகை ஶ்ரீலீலா இன்ஸ்டாகிராமில் விளம்பரங்கள் மூலம் மட்டுமே மாதத்திற்கு 30 முதல் 50 லட்சம் வரை சம்பாதிப்பதாக தகவல் வெளியாகியுள்ளது

ஶ்ரீலீலா

Source : X

தென்னிந்திய திரையுலகில் மிகக் குறுகிய காலத்திலேயே முன்னணி நடிகைகளில் ஒருவராக உயர்ந்திருப்பவர் நடிகை ஸ்ரீலீலா. நடனம், திரை வசீகரம் மற்றும் இளைய ரசிகர்களிடையே பெற்றிருக்கும் மிகப்பெரிய வரவேற்பு காரணமாக, அவர் தற்போது சமூக வலைதளங்களிலும் அதிக செல்வாக்கு கொண்ட நடிகைகளில் ஒருவராக திகழ்கிறார். இந்த நிலையில், ஸ்ரீலீலாவின் இன்ஸ்டாகிராம் வருமானம் தொடர்பாக வெளியாகியுள்ள தகவல் ரசிகர்களிடையே ஆச்சரியத்தை ஏற்படுத்தியுள்ளது.

மாதம் 50 லட்சம் சம்பளம்

திரையுலக வட்டாரங்களில் வெளியாகியுள்ள தகவலின்படி, இன்ஸ்டாகிராமில் 1.7 கோடிக்கும் (17 மில்லியன்) அதிகமான ஃபாலோவர்களை கொண்டுள்ள ஸ்ரீலீலா, ஒரு ஸ்பான்சர் செய்யப்பட்ட விளம்பரப் பதிவுக்காக ரூ.5 லட்சம் முதல் ரூ.10 லட்சம் வரை கட்டணமாக பெறுவதாக கூறப்படுகிறது. மேலும், பல்வேறு நிறுவனங்களுடன் இணைந்து செய்யும் பிராண்ட் விளம்பரங்கள் மூலம் மட்டும் அவர் மாதத்திற்கு சராசரியாக ரூ.30 லட்சம் முதல் ரூ.50 லட்சம் வரை வருமானம் ஈட்டுவதாகவும் தகவல்கள் வெளியாகியுள்ளன. எனினும், இந்த வருமான விவரங்கள் குறித்து ஸ்ரீலீலா அல்லது அவரது தரப்பில் இருந்து அதிகாரப்பூர்வ உறுதிப்படுத்தல் எதுவும் வெளியாகவில்லை.

பெங்களூருவைச் சேர்ந்த ஸ்ரீலீலா, கன்னட திரைப்படமான 'கிஸ்' மூலம் கதாநாயகியாக அறிமுகமானார். பின்னர் தெலுங்கு திரையுலகில் அடுத்தடுத்து வெற்றிப் படங்களில் நடித்ததன் மூலம் முன்னணி நடிகையாக உயர்ந்தார். குறிப்பாக, அவரது நடனத் திறமை மற்றும் திரை ஆற்றல் ரசிகர்களிடையே தனி வரவேற்பைப் பெற்றுள்ளது.

தமிழ் ரசிகர்களுக்கும் ஸ்ரீலீலா பரிச்சயமான முகமாக மாறியுள்ளார். சிவகார்த்திகேயன் நடித்த பராசக்தி திரைப்படம் இவருக்கு தமிழில் முதல் படமாக வெளியானது. அடுத்தபடியாக தனுஷ் நடிக்கும் ஓம் திரைப்படத்தில் முக்கிய கதாபாத்திரத்தில் நடிக்கிறார்.

ஶ்ரீலீலா தற்போது ஒரு திரைப்படத்தில் நடிப்பதற்காக ரூ.4 கோடி முதல் ரூ.7 கோடி வரை சம்பளமாக பெறுவதாக திரையுலக தகவல்கள் தெரிவிக்கின்றன. தொடர்ச்சியான வெற்றிப் படங்கள் மற்றும் அதிகரித்து வரும் ரசிகர் ஆதரவு காரணமாக அவரது மார்க்கெட் மதிப்பும் உயர்ந்து வருகிறது.நடிப்பு தவிர்த்து ஶ்ரீலீலா மருத்துவத்தில் பட்டம் பெற்றவர். மேலும் ஏழை குழந்தைகளை தத்தெடுத்து அவர்களின் கல்விக்கான செலவுகளுக்கும் அவர் பொறுப்பேற்றுள்ளார்