பிரபல நடிகருடன் ஃபோட்டோ எடுத்துக்கொண்ட விஜய் மகன் ஜேசன்.. வைரலாகும் சுப்பர் Pic..!

பிரபல முன்னணி நடிகர் ஒருவருடன் நடிகர் விஜயின் மகன் ஜேசன் சஞ்சய் எடுத்துக் கொண்ட புகைப்படம் ஒன்று சமூக வலைத்தளங்களில் வைரலாகி வருகிறது.

ஜேசன் விஜய்

பிரபல முன்னணி நடிகர் ஒருவருடன் நடிகர் விஜயின் மகன் ஜேசன் சஞ்சய் எடுத்துக் கொண்ட புகைப்படம் ஒன்று சமூக வலைத்தளங்களில் வைரலாகி வருகிறது. இது நட்பு ரீதியாக நடைபெற்ற சந்திப்பா, துறை ரீதியான சந்திப்பா என ரசிகர்கள் ஆர்வத்தில் கேள்விகளை எழுப்பி வருகின்றனர். 

நடிகர் விஜய் தற்போது தனது முழுக் கவனத்தையும் இயக்குநர் நெல்சன் திலீப்குமார் இயக்கத்தில் உருவாகி வரும் `பீஸ்ட்’ படத்தின் மீது செலுத்தி வருகிறார். சன் பிக்சர்ஸ் தயாரித்துள்ள இந்தப் படத்தில் நடிகர் விஜய்க்கு ஜோடியாக நடிகை பூஜா ஹெக்டே நடித்து வருகிறார். `பீஸ்ட்’ படத்திற்குப் பிறகு, தெலுங்கு இயக்குநர் வம்சி படிப்பள்ளி இயக்கும் படத்தில் நடிக்கவுள்ளார் நடிகர் விஜய். `தளபதி 66’ என்று தற்போது அழைக்கப்படும் இந்தப் படம் தமிழ், தெலுங்கு ஆகிய இரு மொழிகளில் உருவாகி வருகிறது. இயக்குநர் வம்சி படிப்பள்ளி ஏற்கனவே `தோழா’ முதலான படங்களை இயக்கியவர். இந்தப் படத்தைத் தெலுங்கு திரையுலகின் முன்னணி தயாரிப்பாளர் தில் ராஜு மிகப்பெரிய பட்ஜெட்டில் தயாரிப்பதாகவும் தகவல்கள் வெளியாகியுள்ளன. 

1999ஆம் ஆண்டு திருமணம் செய்துகொண்ட நடிகர் விஜய் - சங்கீதா தம்பதியினருக்கு இரண்டு குழந்தைகள் உள்ளனர். மகன் ஜேசன் சஞ்சய், மகள் திவ்யா சாஷா ஆகியோர் இதற்கு முன், `வேட்டைக்காரன்’, `தெறி’ ஆகிய படங்களில் கௌரவத் தோற்றமாக நடித்துள்ளனர். நடிகர் விஜயின் மகன் ஜேசன் சஞ்சய் திரைப்பட இயக்கத்தில் ஆர்வம் கொண்டவர்; அதற்காக லண்டனில் திரைப்படங்கள் குறித்து கல்வி பயின்று வருகிறார் ஜேசன் சஞ்சய். அவர் தனது தந்தையுடனும், பிற நண்பர்களுடனும் எடுக்கும் புகைப்படங்கள் அடிக்கடி இணையத்தில் வெளியாகி விஜய் ரசிகர்களுக்கு மகிழ்ச்சி அளித்து வருகின்றன. 

இதில் சமீபத்தில் மலையாளத் திரைத்துறையின் பிரபலமான முன்னணி நடிகர் நிவின் பாலியுடன் நடிகர் விஜயின் மகன் ஜேசன் சஞ்சய் இருப்பது போன்ற புகைப்படங்கள் தற்போது சமூக வலைத்தளங்களில் வைரலாகி வருகின்றன. இந்தப் படத்தில் ஜேசன் சஞ்சய், நிவின் பாலி ஆகியோருடன் ஜேசன் சஞ்சயின் நண்பர்களும் உள்ளனர். ஜேசன் சஞ்சய், நிவின் பாலி ஆகியோருக்கு இடையிலான சந்திப்பு நட்பு ரீதியாக நடைபெற்றதா, திரைப்பட இயக்கத்தில் ஜேசன் சஞ்சய்க்கு ஆர்வம் அதிகம் என்பதால் துறை ரீதியான சந்திப்பா என்ற கேள்விகளை ரசிகர்கள் இணையத்தில் எழுப்பி வருகின்றனர். எனினும், இந்தச் சந்திப்பு குறித்து அதிகாரப்பூர்வ அறிவிப்பு எதுவும் வெளியாகவில்லை. 

தமிழ் பார்வையாளர்களுக்கு மிகவும் பிரபலமான நடிகர் நிவின் பாலி தற்போது இயக்குநர் ராம் இயக்கி வரும் படத்தில் நடித்து வருகிறார். இன்னும் பெயர் சூட்டப்படாத இந்தப் படத்தை சுரேஷ் காமாட்சி தயாரித்துள்ளார். இந்தப் படத்தில் அஞ்சலி, சூரி ஆகியோர் முன்னணி வேடங்களில் நடிக்கின்றனர்.