Vijay Makkal Iyakkam: வெற்றிக்கணக்கைத் தொடங்கிய விஜய் மக்கள் இயக்கம்! புதுக்கோட்டையில் முதல் வெற்றி!

TN Urban Local Body Election Results 2022: புதுக்கோட்டை நகராட்சியில் 4 ஆவது வார்டில் விஜய் மக்கள் இயக்க வேட்பாளர் பர்வேஸ் வெற்றி பெற்றிருக்கிறார். 

விஜய் மக்கள் இயக்கம்

கடந்த 19ஆம் தேதி தமிழகத்தில் நகர்புற உள்ளாட்சித் தேர்தலுக்கான வாக்குப்பதிவு நடந்து முடிந்த நிலையில், வாக்கு எண்ணிக்கை தொடங்கி நடைபெற்று வருகிறது. அந்த வகையில் புதுக்கோட்டை நகராட்சியில் 4 ஆவது வார்டில் விஜய் மக்கள் இயக்க வேட்பாளர் முகமது பர்வேஸ் வெற்றி பெற்றிருக்கிறார். 

தமிழ்நாட்டில் உள்ள 21 மாநகராட்சிகள், 138 நகராட்சிகள் மற்றும் 490 பேரூராட்சிகள் ஆகியவற்றிற்கு கடந்த 19ஆம் தேதி ஒரே கட்டமாக தேர்தல் நடைபெற்றது. மொத்தம் 1,374 மாநகராட்சி உறுப்பினர்கள், 3,843 நகராட்சி உறுப்பினர், 7,621 பேரூராட்சி உறுப்பினர் பதவிகள் என மொத்தமாக 12,838 பதவிகளுக்கு  தேர்தல் நடைபெற்றது. அந்தத் தேர்தலில் பதிவான வாக்குகள் இன்று காலை முதல் எண்ணப்பட்டு வருகிறது. தமிழ்நாடு முழுவதும் 30 ஆயிரத்திற்கும் மேற்பட்ட அலுவலர்கள் வாக்கு எண்ணும் பணியில் ஈடுபட்டுள்ளனர். 

முன்னதாக, கடந்த ஆண்டு நடந்து முடிந்த, ஊரக உள்ளாட்சி அமைப்புகளுக்கான தேர்தலில் விஜய் மக்கள் இயக்கம் முதன்முறையாக தங்களது வேட்பாளர்களை தேர்தல் களத்தில் இறக்கியது. இந்த தேர்தலில் போட்டியிட்ட 115 பேர் வெற்றிபெற்றனர். வெற்றி பெற்ற பிரதிநிதிகளை விஜய் நேரில் சந்தித்து வாழ்த்துகளை தெரிவித்தார். அதனைத்தொடர்ந்து கடந்த 19 ஆம் தேதி நடைபெற்ற உள்ளாட்சி தேர்தலிலும், யாருக்கும் ஆதரவு தராமால் தனித்து போட்டியிட்டது. வாக்கு எண்ணும் பணி இன்று தொடங்கிய நிலையில் விஜய் மக்கள் இயக்கத்தின் வெற்றிக்கணக்கை முகமது பர்வேஸ் தொடங்கியிருக்கிறார்.