TN School Leave: மாணவர்களே, ஜாலிதான்.! அரையாண்டு விடுமுறையை அறிவித்த பள்ளிக்கல்வித்துறை; எத்தனை நாள் தெரியுமா.?

பள்ளி மாணவர்களுக்கு அரையாண்டுத் தேர்வுகள் நடைபெற்று வரும் நிலையில், அவர்களுக்கான அரையாண்டு விடுமுறையை அறிவித்துள்ளது பள்ளிக்கல்வித் துறை. அது எத்தனை நாட்கள் தெரியுமா.?

பள்ளி மாணவர்களுக்கு 9 நாட்கள் அரையாண்டு விடுமுறை - பள்ளிக்கல்வித்துறை

Source : சிறப்பு ஏற்பாடு

தமிழ்நாட்டில், பள்ளி மாணவர்களுக்கு அரையாண்டு தேர்வுகள் தொடங்கி நடைபெற்று வருகின்றன. அரையாண்டுத் தேர்வுகள் மொத்தமாக டிசம்பர் 23-ம் தேதி நிறைவடைய உள்ள நிலையில், மாணவர்களுக்கான அரையாண்டு விடுமுறையை அறிவித்துள்ளது பள்ளிக்கல்வித்துறை. அது எத்தனை நாட்கள் என்பதை பார்க்கலாம்.

பள்ளிகளில் நடைபெற்றுவரும் அரையாண்டுத் தேர்வுகள்

தமிழ்நாட்டில், 10, 11 மற்றும் 12-ம் வகுப்பு மாணவர்களுக்கு, கடந்த 10-ம் தேதி அரையாண்டுத் தேர்வுகள் தொடங்கி நடைபெற்று வருகிறது. இந்த நிலையில், 6 முதல் 9-ம் வகுப்பு வரையிலான மாணவர்களுக்கு, இன்று முதல் அரையாண்டுத் தேர்வுகள் தொடங்ளியுள்ளன. 6 முதல் 12-ம் வகுப்வு வரையில், அனைத்து வகுப்புகளுக்கான  அரையாண்டுத் தேர்வுகளும் டிசம்பர் 23-ம் தேதியுடன் முடிவடைகின்றன.

தற்போது, மாணவர்கள் அனைவருக்கும் காலை 9.45 மணி முதல் மதியம் 1 மணி வரை அரையாண்டுத் தேர்வு நடைபெறுகிறது. முதல் 10 நிமிடங்கள் வினாத்தாளை வாசித்துப் பார்க்கவும், அதற்கு அடுத்த 5 நிமிடங்கள் தேர்வரின் விவரங்களை சரிபார்க்கவும் ஒதுக்கப்பட்டுள்ளது. சரியாக காலை 10 மணிக்குத் தேர்வு தொடங்கி, பிற்பகல் 1 மணி வரை நடைபெறுகிறது.

9 நாட்கள் அரையாண்டு விடுமுறை அறிவிப்பு

அனைத்து வகுப்பு மாணவர்களுக்கும் வரும் 23-ம் தேதி அரையாண்டுத் தேர்வுகள் முடிவடைவதைத் தொடர்ந்து, மாணவர்களுக்கு 9 நாட்கள் அரையாண்டு தேர்வு விடுமுறை பள்ளிக்கல்வித் துறையால் அறிவிக்கப்பட்டுள்ளது. அதன்படி, டிசம்பர் 24-ம் தேதி முதல், 2026 ஜனவரி 1-ம் தேதி வரை, பள்ளி மாணவர்களுக்கு அரையாண்டு விடுமுறை விடப்படும் என பள்ளிக்கல்வித்துறை அறிவித்துள்ளது.

அரையாண்டு விடுமுறை முடிந்து, ஜனவரி 2-ம் தேதி வகுப்புகள் மீண்டும் தொடங்கப்படும் என  பள்ளிக்கல்வித் துறையின் அறிக்கையில் தெரிவிக்கப்பட்டுள்ளது. அரையாண்டுத் தேர்வுகள் முடிந்த உடன், கிறிஸ்துமஸ் மற்றும் அதைத் தொடர்ந்து புது வருடப்பிறப்பு வருவதால், மாணவர்களுக்கு இது குஷியான அறிவிப்பாக உள்ளது.