MK Stalin biopic | ஸ்டாலினாக சமுத்திரக்கனி? படமாகும் வாழ்க்கை வரலாறு! விஜய் சேதுபதி யார் கேரக்டர்?

முதலமைச்சர் ஸ்டாலினின் வாழ்க்கை வரலாற்றை படமாக்கும் வேலையில் சமுத்திரக்கனி இறங்கியுள்ளதாகவும், ஸ்டாலின் கதாப்பாத்திரத்தில் அவரே நடிக்கவிருப்பதாகவும் தகவல் வெளியாகியுள்ளது. அதுமட்டுமல்லாமல் முக்கியமான கேரக்டர் ஒன்றில் விஜய் சேதுபதி நடிக்கவிருப்பதாகவும் சொல்கின்றனர்.

பிரதமர் மோடி, முன்னாள் பிரதமர் இந்திரா காந்தி, மறைந்த முதலமைச்சர் ஜெயலலிதா உள்ளிட்ட அரசியல் தலைவர்களின் வாழ்க்கை வரலாறு படங்கள் மக்கள் மத்தியில் வரவேற்பை பெற்றன. அந்தவகையில் முதலமைச்சர் ஸ்டாலினின் வாழ்க்கை வரலாற்றை படமாக எடுப்பதற்கான வேலைகள் நடந்து வருவதாக தகவல் வெளியாகியுள்ளது. இதற்காக அவர் ஸ்டாலினுக்கு நெருக்கமானவர்களை சந்தித்து விவரங்களை சேகரித்து வருகிறாராம். 

ஏற்கனவே 2021ம் ஆண்டே ஸ்டாலின் வாழ்க்கை வரலாறு படம் பற்றிய தனது ஆசையை சொல்லியிருந்தார் சமுத்திரக்கனி. பேட்டி ஒன்றில் யாருடைய வாழ்க்கை வரலாற்றில் நடிக்க ஆசை என கேட்ட போது, உடனடியாக முதலமைச்சர் ஸ்டாலின் என பதில் கொடுத்தார் சமுத்திரக்கனி. மேலும், போஸ்வெங்கட் முதலமைச்சரைப் பற்றி சொன்ன விஷயங்கள் ரொம்ப பிரம்மிப்பாக இருந்தது; பல விஷயங்கள் என்னிடம் சொல்லியிருக்கிறார். நாங்கள் இரண்டு பேரும் அவ்வபோது உட்கார்ந்து பேசும்போது முதலமைச்சர் அவ்வளவு சாதாரணமாகவெல்லாம் இந்த சீட்டுக்கு வந்துவிடவில்லை என்று சொல்லி நிறைய புத்தகங்களைப் படிக்க சொன்னார். இப்படி ஒரு போராட்டம், இப்படி ஒரு விஷயங்களை எல்லாம் கடந்து தான் இந்த இடத்திற்கு வந்திருக்கிறார் என்பதை பார்க்கும்போது நம் முதலமைச்சர் மீது ஒரு பேரன்பு வந்தது. நான் தான் சொன்னேன். முதல்ல இந்த கதையை ஒரு ட்ராஃப்ட் பண்ணு அதற்குப் பிறகு மற்ற வேலைகளை பார்க்கலாம் என்று சொன்னேன். முதலமைச்சரின் வாழ்க்கை வரலாற்று படத்தை உருவாக்கலாம் என்று முடிவு செய்து வைத்திருக்கிறோம். இந்த படத்தை உருவாக்க வேண்டும் என்று பெரிய ஆசை. அது நடக்கிறதா என்று பார்போம்” என சொல்லியிருந்தார்.

இந்தநிலையில் வாழ்க்கை வரலாறு படத்தை எடுக்கும் வேலைகள் முழு வேகத்தில் நடந்து வருவதாக பேச்சு இருக்கிறது. சமுத்திரக்கனியே ஸ்டாலின் கதாப்பாத்திரத்தில் நடிக்க முடிவெடுத்துள்ளதாக தகவல் வெளியாகியுள்ளது. அதேபோல் விஜய் சேதுபதியும் முக்கிய கதாப்பாத்திரத்தில் நடிக்கவிருப்பதாகவும், வேறு சில முக்கிய நடிகர்களும் படத்தில் இணையவிருப்பதாகவும் கோலிவுட் வட்டாரத்தில் பேச்சு இருக்கிறது. அடுத்த ஆண்டு ஸ்டாலின் வாழ்க்கை வரலாறு படப்பிடிப்பு ஆரம்பமாக வாய்ப்புள்ளதாகவும் சொல்கின்றனர்.