Crime: கர்ப்பமான 16 வயது சிறுமி.. உயிருடன் எரித்து கொலை செய்த இளைஞர் - பீகாரில் கொடூரம்
கருவுற்ற சிறுமி தொடர்ந்து இளைஞனுக்கு திருமணம் செய்துகொள்ளும்படி அழுத்தம் கொடுத்து வந்த நிலையில், இருவருக்கும் மோதல் வெடித்துள்ளது.
16 வயது சிறுமியை கர்ப்பமாக்கி அவரை எரித்துக் கொன்று, சிறுமியின் பெற்றோரையும் சிறை வைத்த கொடூர சம்பவம் பீகாரில் அதிர்ச்சியை ஏற்படுத்தியுள்ளது.
கருவுற்ற 16 வயது சிறுமி:
பீகார் மாநிலம், நவாடா மாவட்டத்தில் வசித்து வந்த 16 வயது சிறுமியை இளைஞர் ஒருவர் காதலித்து வந்த நிலையில், சிறுமி ஒரு கட்டத்தில் கருவுற்றுள்ளார். இந்நிலையில், சிறுமி கருவுற்றதை அடுத்து அந்த இளைஞர் சிறுமியைத் தவிர்க்கத் தொடங்கியுள்ளார். ஆனால் கருவுற்ற சிறுமி தன்னைத் திருமணம் செய்துகொள்ளும்படி இளைஞரிடம் கேட்கத் தொடங்க, அதற்கு இளைஞரும் அவரது குடும்பத்தினரும் மறுப்பு தெரிவித்துள்ளனர்.
உயிருடன் எரித்துக் கொலை:
ஆனால் சிறுமி தொடர்ந்து இளைஞனுக்கு திருமணம் செய்துகொள்ளும்படி அழுத்தம் கொடுத்து வந்த நிலையில், இருவருக்கும் மோதல் வெடித்துள்ளது. இதில் ஏற்பட்ட வாக்குவாதத்தில் ஆத்திரமடைந்த இளைஞர் சிறுமியை தீயிட்டுக் கொளுத்தியுள்ளார். மேலும் இளைஞர் தன் பெற்றோருடன் சேர்ந்து சிறுமியின் பெற்றோரை வீட்டுச் சிறையில் வைத்துள்ளார்.
ஆனால் உடல்நலம் பாதிக்கப்பட்டதாகக் கூறி, இளைஞர் குடும்பத்திடம் இருந்து தப்பிய பெற்றோர் முன்னதாக காவல் நிலையத்துக்குச் சென்று புகார் தெரிவித்துள்ளனர்.
இந்நிலையில் சிறுமி கொலை செய்யப்பட்ட வழக்கில் சிறுமியின் தந்தை அளித்த சாட்சியங்களின்படி நால்வர் மீது வழக்குப்பதிவு செய்து காவல் துறையினர் விசாரணை செய்து வருகின்றனர்.
போக்சோ சட்டம் :
16 வயதுக்குட்பட்ட குழந்தைகளுக்கு எதிரான பாலியல் வன்கொடுமை நாளுக்குநாள் அதிகரித்து வருகிறது. இதுபோன்ற குற்றங்களில் ஈடுபடுபவர்கள் போக்சோ சட்டத்தின் கீழ் கைது செய்யப்படுகின்றனர்.
18 வயதுக்கு உள்பட்ட ஆண், பெண் குழந்தைகளுக்கு எதிரான பாலியல் குற்றங்களைத் தடுப்பதற்காக இந்த போக்சோ சட்டம் கொண்டுவரப்பட்டது. இந்தச் சட்டம் குறித்த தகவல்கள் பின்வருமாறு:
- Penetrative sexual Assault - பலவந்தமான பாலியல் வன்கொடுமை செய்தல்
- Aggravated penetrative sexual assault - தீவிரமான பாலியல் தாக்குதல்
- Sexual Assault - பாலியல் தொல்லை
- Aggravated Sexual Assault - எல்லைமீறிய பாலியல் தொல்லை
- Sexual Harassment - பாலியல் தொந்தரவு
- Taking pornographic pictures of children - குழந்தைகளை வைத்து ஆபாச படம் எடுத்தல்
இந்த ஆறுவகை பாலியல் குற்றங்களும் இந்த போக்சோ சட்டத்தின் கீழ் வருகின்றனர்.
- 18 வயதுக்கு உள்பட்ட குழந்தைகளை பாலியல் வன்கொடுமை செய்தால் 7 ஆண்டு முதல் ஆயுள் தண்டனை
- இதே குற்றத்தை பெற்றோர், பாதுகாவலர் செய்தால் 10 ஆண்டுகள் சிறை
- 12 வயதுக்கு கீழான குழந்தைகளை வன்கொடுமை செய்தால் - மரண தண்டனை (இந்த சட்டம் 2018ஆம் ஆண்டு கொண்டு வரப்பட்டது)
தலைப்பு செய்திகள்
ட்ரெண்டிங் செய்திகள்
