புது தில்லியில் நடைபெறும் பாரத் டெக்ஸ் - 2025 ஜவுளி கண்காட்சியில் 2 லட்சம் பேர் பங்கேற்பார்கள் - ஜவுளி சங்கம்

மத்திய அரசின் ஜவுளித்துறை சார்பில் கண்காட்சியை பார்வையிட வர கூடிய வெளிநாட்டவர்களுக்கு, தங்கும் வசதி, போக்குவரத்து வசதி ஆகியவை செய்து தரப்படவுள்ளது.

கரூரில் ஜவுளி உற்பத்தியாளர்கள் மற்றும் ஏற்றுமதியாக சங்கத்தின் சார்பாக தலைவர் கோபாலகிருஷ்ணன் செய்தியாளர்களை சந்தித்தபோது

Source : Getty Images

புது தில்லியில் நடைபெறும் பாரத் டெக்ஸ் - 2025 ஜவுளி கண்காட்சியில் 2 லட்சம் பேர் பங்கேற்க உள்ளனர். இந்தியா மற்றும் வெளிநாடுகளில் உள்ள ஜவுளி தொழில் சார்ந்த நகரங்களில் பல்வேறு விழிப்புணர்வு கூட்டங்கள் நடத்தப்பட்டு வருகிறது என்று கரூரில் நடந்த கூட்டத்தில் ஜவுளி சங்க தலைவர் கோபாலகிருஷ்ணன் தெரிவித்தார்.

 

 

கரூர், ரெட்டிபாளையம் பகுதியில் அமைந்துள்ள தனியார் விடுதியில் மத்திய ஜவுளி அமைச்சகத்தின் சார்பாக புது தில்லியில் அடுத்த ஆண்டு பிப்ரவரி 14 முதல் 17 வரை நடைபெற உள்ள "பாரத் டெக்ஸ் - 2025" ஜவுளி கண்காட்சிக்கான ஏற்றுமதியாளர்கள் விழிப்புணர்வு கூட்டம் நடைபெற்றது. கரூர் ஜவுளி உற்பத்தியாளர் மற்றும் ஏற்றுமதியாளர் சங்கத்தின் தலைவர் கோபாலகிருஷ்ணன் தலைமையில் நடைபெற்ற இந்த கூட்டத்தில் கைத்தறி ஏற்றுமதி முன்னேற்ற சபையின் நிர்வாக இயக்குனர் ஸ்ரீதர், விசைத்தறி ஏற்றுமதி முன்னேற்ற சபையின் துணைத் தலைவர் சக்திவேல் ஆகியோர் சிறப்பு விருந்தினராக கலந்து கொண்டனர்.

 

 

கூட்டத்தில் கரூரை மையமாகக் கொண்டு செயல்பட்டு வரும், வீட்டு உபயோக ஜவுளி உற்பத்தி மற்றும் ஏற்றுமதி நிறுவன உரிமையாளர்களுக்கு ஜவுளி கண்காட்சி குறித்த விழிப்புணர்வு ஏற்படுத்தப்பட்டது. அதனைத் தொடர்ந்து, கரூர் ஜவுளி உற்பத்தியாளர் மற்றும் ஏற்றுமதியாளர் சங்கத்தின் தலைவர் கோபாலகிருஷ்ணன் பத்திரிகையாளர்களை சந்தித்தார்.

 

 

ஜவுளிக்கரை சார்ந்த அனைத்து துறைகளும் கலந்து கொண்டு, கடந்த ஆண்டு நடைபெற்ற பாரத் டெக்ஸ் - 2025 கண்காட்சி என்பது பிரதமரின் கனவு ஆகும். தற்போது நடைபெறக் கூடிய இரண்டாவது ஜவுளி கண்காட்சிக்கான விழிப்புணர்வு கூட்டம் நேற்று நடந்தது. உலக அளவில் ஜவுளி துறைக்கான மிகப் பெரிய கண்காட்சியாக இது இருக்கும். கடந்தாண்டு நடைபெற்ற கண்காட்சியில் உள்நாட்டில் சுமார் 1 லட்சம் பேரும், வெளிநாட்டில் இருந்து 3000 பேரும் கலந்து கொண்டனர். இந்த ஆண்டு உள்நாட்டில் இரண்டு லட்சம் பேரும், வெளிநாட்டில் சுமார் 10,000 பேரும் கலந்து கொள்வார்கள் என்று எதிர்பார்க்கப்படுகிறது.

 

 

மத்திய அரசின் ஜவுளித்துறை சார்பில் கண்காட்சியை பார்வையிட வர கூடிய வெளிநாட்டவர்களுக்கு, தங்கும் வசதி, போக்குவரத்து வசதி ஆகியவை செய்து தரப்படவுள்ளது. மேலும், வெளிநாடுகளில் உள்ள இந்திய தூதரகம் மூலம் கண்காட்சி குறித்த விழிப்புணர்வை ஏற்படுத்தும் விதமாக பல்வேறு கூட்டங்கள் நடத்தப்படுகின்றன.

 

 

கடந்த ஆண்டு கரூரில் இருந்து 40 ஜவுளி நிறுவனங்கள் இந்த கண்காட்சியில் பங்கேற்று உள்நாட்டில் பல்வேறு ஆர்டர்களை பெற்றனர். மேலும், வெளிநாட்டைச் சேர்ந்த ஜவுளித்துறை சார்ந்த நபர்களின் அறிமுகமும், தொடர்பும் ஏற்படுத்தி கொள்ளும் வாய்ப்பு அமைந்தது என்றார்.