Japanese SUV: ரூ.9 லட்சம் பட்ஜெட்டில் எஸ்யுவியை இறக்கும் ஜப்பான் நிறுவனம் - டாடாவை மிஞ்சுமா? கார் எப்படி இருக்கும்?
Japanese SUV: இந்திய ஆட்டோமொபைல் சந்தையில் 9 லட்சம் ரூபாய் பட்ஜெட்டில் டாடா நிறுவனத்திற்கு போட்டியாக, ஜப்பான் நிறுவனம் புதிய எஸ்யுவியை விரைவில் சந்தைப்படுத்தப்பட உள்ளது.
Japanese SUV: இந்திய ஆட்டோமொபைல் ஜப்பான் நிறுவனம் விரைவில் அறிமுகப்படுத்த உள்ள எஸ்யுவியின் விவரங்களை இந்த தொகுப்பில் அறியலாம்.
ஜப்பான் நிறுவனத்தின் புதிய எஸ்யுவி:
ஹோண்டா நிறுவனமானது இந்திய ஆட்டோமொபைல் சந்தைக்கு புதிய காம்பேக்ட் எஸ்யுவியை தயார்படுத்தி வருகிறது. ஆனாலும், விரைவில் வரவிருக்கும் இந்த மாடல் தொடர்பாக நிறுவனம் இதுவரை எந்த தகவலையும் வெளியிடவில்லை. உள்ளூரில் டாடா நெக்ஸானுக்கு போட்டியாக ஜப்பான் நிறுவனத்தின் புதிய கார் மாடல் சந்தைப்படுத்தப்பட உள்ளதாம். இந்த புதிய எஸ்யுவியில் இருந்து நாம் என்ன எதிர்பார்க்கலாம் என்ற விவரங்கள் கீழே பட்டியலிடப்பட்டுள்ளன.
ஹோண்டா காம்பேக்ட் எஸ்யுவி
காம்பேக்ட் கார் பிரிவில், ஹோண்டா நிறுவனம் தற்போது உள்நாட்டில் அமேஸ் எனும் செடான் மாடலை மட்டுமே கொண்டுள்ளது. இந்நிலையில் இந்த பிரிவில் மற்றொரு மாடலை களமிறக்க ஹோண்டா திட்டமிட்டு வருகிறது. இது இந்தியாவை மையமாகக் கொண்ட ஒரு எஸ்யுவியாக இருக்கும் என்று எதிர்பார்க்கப்படுகிறது. காம்பேக்ட் எஸ்யுவி பிரிவில் ஹோண்டா ஒரு புதிய நிறுவனம் அல்ல. முன்னதாக, இந்தியாவில் ப்ரியோ, ஜாஸ் மற்றும் டபிள்யூஆர்-வி போன்ற பல காம்பாக்ட் கார்களை விற்பனை செய்துள்ளது. அந்த வகையில், ஜப்பானிய வாகன உற்பத்தி நிறுவனத்திற்கு இந்தப் பிரிவு பற்றி நன்கு தெரியும். மேலும், சமீபத்திய ஜிஎஸ்டி விகிதங்கள் காம்பேக்ட் கார் விற்பனையை அதிகரித்துள்ளதால், உள்ளூரில் சந்தையில் தனது விற்பனையை மேம்படுத்தவும் புதிய மாடல் உதவும் என நிறுவனம் நம்புகிறதாம்.
வரவிருக்கும் ஹோண்டா காம்பேக்ட் எஸ்யுவி, அமேஸ் காரின் அதே ப்ளாட்ஃபார்ம், அதாவது உலகளாவிய சிறிய கார் ப்ளாட்ஃபார்மை அடிப்படையாகக் கொண்டிருக்கும் என்று எதிர்பார்க்கப்படுகிறது. இருப்பினும், அந்த காம்பேக்ட் செடானில் உள்ள பவர்ட்ரெய்ன் மற்றும் அம்சங்களைக் கூடத் தக்கவைத்துக் கொள்ளலாம். அறிமுகப்படுத்தப்பட்டவுடன், இது டாடா நெக்ஸான், மஹிந்திரா XUV 3XO, ஸ்கோடா கைலாக், ஹூண்டாய் வென்யு மற்றும் பிற எஸ்யுவி கார்களுடன் போட்டியிடும் என எதிர்பார்க்கப்படுகிறது.
ஹோண்டா புதிய எஸ்யுவியின் அம்சங்கள், வசதிகள்
வரவிருக்கும் புதிய எஸ்யுவி அமேஸ் காரில் உள்ள அதே அம்சங்களைக் கொண்டிருக்கக்கூடும். எனவே, அதன் தொகுப்பில் 8 இன்ச் டச்ஸ்க்ரீன், 7 இன்ச் செமி-டிஜிட்டல் இன்ஸ்ட்ரூமென்ட் க்ளஸ்டர், க்ரூஸ் கன்ட்ரோல், வயர்லெஸ் ஆண்ட்ராய்டு மற்றும் ஆப்பிள் கார்ப்ளே, வயர்லெஸ் ஃபோன் சார்ஜர், 6-ஸ்பீக்கர் சவுண்ட் சிஸ்டம், ஸ்டாண்டர்டாக 6 ஏர்பேக்குகள், ADAS சூட் மற்றும் பல அம்சங்கள் இடம்பெறலாம். பவர்ட்ரெய்னைப் பொறுத்தவரை, அதே 1.2-லிட்டர் நேட்சுரலி ஆஸ்பிரேடட் பெட்ரோல் இன்ஜின் (89bhp & 110Nm), மேனுவல் மற்றும் CVT கியர்பாக்ஸ் ஆப்ஷன்களுடன் இணைக்கப்பட்டுள்ளது. இந்த மாடலை மேலும் கவர்ச்சிகரமானதாக மாற்ற, ஹோண்டா இந்த மாடலுடன் ஒரு ரெட்ரோஃபிட்டட் CNG கிட்டையும் வழங்கக்கூடும். இது இந்த மாடலின் விற்பனையை மேலும் அதிகரிக்கவும் உதவும்.
எதிர்பார்க்கப்படும் விலை விவரங்கள்:
ஹோண்டாவின் புதிய காம்பேக்ட் எஸ்யுவி எப்போது வெளியாகக் கூடும் என்பது தொடர்பான தகவல் ஏதும் இதுவரை வெளியாகவில்லை. அதேநேரம், இந்த மாடல் 2027-ஆம் ஆண்டின் இறுதிக்குள் அல்லது 2028-ஆம் ஆண்டின் தொடக்கத்தில் வெளியாகக்கூடும் என்று எதிர்பார்க்கப்படுகிறது. விலையைப் பொறுத்தவரை, இந்த புதிய ஹோண்டா காம்பேக்ட் எஸ்யுவியின் விலை ரூ. 9 லட்சம் முதல் ரூ. 16 லட்சம் வரை நிர்ணயிக்கப்படலாம்.
தலைப்பு செய்திகள்
ட்ரெண்டிங் செய்திகள்
