Theni neutrino project Details : தேனி ஊரையே அழிக்க பாக்கறாங்க - நியூட்ரினோ அதிரவைக்கும் பின்னணி..

தேனி மாவட்டம் தேவாரம் அருகேயுள்ள T.புதுக்கோட்டை எனும் மலையடிவார கிராமமான பொட்டிபுரம் பஞ்சாயத்துக்கு உட்பட்ட பகுதியான இந்த கிராமத்தின் அருகில் மேற்குத் தொடர்ச்சி மலையின் அடிவாரத்தில் அமைக்கப்படுகிறது நியூட்ரினோ ஆய்வகத்திட்டம். மலையின் உச்சியிலிருந்து 1.3 கி.மீ கீழே, மலையின் அடிவாரத்தில் 2.5 கி.மீ தூரத்திற்கு சுரங்கப் பாதை தோண்டப்படும் எனவும், இதையடுத்து மலையை குடைந்து பெரிய ஆய்வுக் கூடம் அமைக்கப்படும். அங்கு 50 கிலோ டன் இரும்பிலான நியூட்ரினோ காணும் கருவி அமைக்கப்படும். இதைச் சுற்றி நான்கு திசைகளிலும் மேலேயும் ,கீழேயும் குறைந்தபட்சம் ஒரு கி.மீ பரிமாணமுள்ள பாறை இருந்தால் தான் ஆராய்ச்சி நடத்த முடியும் என்ற நிலையில் அம்பரப்பர் மலையில் உள்ள பெரிய பாறைகள் மூலம்தான் வானவெளியில் இருந்து வரும் காஸ்மிக் கதிர்களை தடுத்து நிறுத்த முடியும். என்ற நிலையில் அதன் பிறகு தான், நியூட்ரினோவை காண முடியும் எனவும் கூறப்படுகிறது. முதற்கட்டமாக ஐ.என்.ஓ., கூடத்தில், காஸ்மிக் கதிர்கள் உண்டாக்கும் நியூட்ரினோக்களைப் பற்றி ஆராய்ச்சிகள் நடத்தப்படும். இந்த நியூட்ரினோ திட்டமான அறிவியல் ஆய்வு மையம் அமைவதற்கு எதிர்ப்பு தெரிவித்து இந்தப் பகுதியைச் சேர்ந்த டி.புதுக் கோட்டை, ராமகிருஷ்ணாபுரம், பொட்டிபுரம், சின்ன பொட்டிபுரம், திம்மிநாயக்கன் பட்டி, குப்பனாசாரிபட்டி, தெற்குப்பட்டி கிராமங்களை சேர்ந்த பொதுமக்கள் தொடர்ந்து எதிர்ப்பு தெரிவித்து வருகின்றனர். நியூட்ரினோ எனும் திட்டத்தால் தங்கள் பகுதியில் விவசாயம் அழியும் நிலை ஏற்படும் எனவும் அதனால் ஏற்படும் பாதிப்புகளை பற்றியும் தேனி மாவட்ட நிர்வாகத்திடம் பல முறை கோரிக்கை மனுவாக அளித்துள்ளதாக இப்பகுதி கிராம மக்கள் கூறுகின்றனர். அம்பரப்பர் மலையில் அமைக்கப்படும் நியூட்ரினோ திட்டத்திற்கு எதிர்ப்பு தெரிவித்து மதிமுக பொதுசெயலாளர் வைகோ 2015 மதுரை நீதிமன்றத்தில் வழக்கு தொடுத்துள்ளார். வழக்கும் நிலுவையில் இருந்து வருகிறது இதனை தொடர்ந்து 2016ல் பூவுலகின் நண்பர்கள் சார்பாக இந்த நியூட்ரினோ திட்டத்திற்கான சுற்றுச்சூழல் தாக்கல் மதிப்பீட்டு அறிக்கையை போலியான நிறுவனத்தின் மூலம் வாங்கியதாக குறிப்பிட்டு சென்னை உயர் நீதிமன்ற பசுமை தீர்ப்பாயத்தில் வழக்கு தொடரப்பட்டு இரண்டு வழக்குகளும் நிலுவையில் உள்ள நிலையில் தற்போது காட்டு உயிர் அனுமதி கோரி வனத்துறைக்கு நியூட்ரினோ திட்ட ஆய்வுக்குழு சார்பாக டாடா அடிப்படை ஆராய்ச்சி நிறுவனம் விண்ணப்பம் அளித்துள்ளது. குறிப்பாக முல்லை பெரியாறு அணையிலிருந்து 3.50 கி.லி தண்ணீரை இந்த நியூட்ரினோ திட்டத்திற்க்கு செலவிடுவதும் இதனால் ஏற்கனவே விவசாயத்திற்க்கு போதிய தண்ணீர் இல்லாத நிலையிலும் குடி நீர் பற்றாக்குறையான நிலையிலும் இந்த திட்டத்திற்க்கு இவ்வளவு தண்ணீரை செலவிடுவதால் தண்ணீர் பற்றாக்குறையால் இப்பகுதி மட்டுமல்லாமல் தேனி, திண்டுக்கல், ராமநாதபுரம், சிவகங்கை என 5 மாவட்டங்களும் கடுமையாக தண்ணீர் பற்றாக்குறையால் பாதிக்கப்படும் எனவும் இப்பகுதி மக்கள் தெரிவிக்கின்றனர்.