இன்ஸ்டாகிராமில் சிக்கலா? மார்க் ஜுக்கர்பெர்க் அதிர்ச்சி வாக்குமூலம்: சிறுவர்கள் மனநல பாதிப்பு வழக்கில் பரபரப்பு!

சமூக ஊடக வழக்கு: "சிறுவர்கள் வயதை மறைப்பதைத் தடுப்பது கடினம்" - நீதிமன்றத்தில் மார்க் ஜுக்கர்பெர்க் வாதம்

சமூக வலைதள பயன்பாடு

Source : Pixabay

அமெரிக்காவில் நடந்து வரும் சமூக ஊடகங்கள் தொடர்பான வழக்கில், மெட்டா நிறுவனத்தின் தலைவர் மார்க் ஜுக்கர்பெர்க் ஆஜராகி முக்கியமான பரபரப்பு வாக்குமூலம் அளித்துள்ளார்.

வயது வரம்பு சர்ச்சை

இன்ஸ்டாகிராம் உள்ளிட்ட சமூக வலைதளங்கள், சிறுவர்கள் மற்றும் இளம்பருவத்தினரின் மனநலத்தைப் பாதிப்பதாகத் தொடரப்பட்ட இந்த வழக்கு சர்வதேச அளவில் கவனத்தை ஈர்த்தது. விசாரணையின்போது, 13 வயதிற்கு உட்பட்ட குழந்தைகள் இன்ஸ்டாகிராம் போன்ற தளங்களைப் பயன்படுத்துவதைத் தடுப்பது குறித்தும், அவர்கள் வயது வரம்புக் கட்டுப்பாடுகளை மீறுவது குறித்தும் மார்க்கிடம் சரமாரியான கேள்விகள் எழுப்பப்பட்டன.

இதற்குப் பதிலளித்த அவர், "சிறுவர்கள் தங்களுக்கான கட்டுப்பாடுகளைத் தவிர்ப்பதற்காகத் தங்கள் வயதைத் தவறாகக் குறிப்பிடுவதற்கான காரணங்களை என்னால் முழுமையாகப் புரிந்து கொள்ள முடியவில்லை" என்ற ரீதியில் கருத்துத் தெரிவித்தார். அதாவது, சமூக வலைதளங்களில் நுழையத் தடை இருக்கும்போது, சிறுவர்கள் தங்கள் பிறந்த தேதியை மாற்றிக் கொடுத்து உள்ளே நுழைவதைத் தடுப்பது தொழில்நுட்ப ரீதியாக ஒரு பெரும் சவாலாக இருப்பதை அவர் ஒப்புக்கொண்டார்.

நடந்தது என்ன?

சமூக ஊடகங்கள் சிறார்களைத் தங்களுக்கு அடிமையாக்குவதாகவும், இதனால் அவர்களுக்கு மனச்சோர்வு, பதற்றம் மற்றும் தூக்கமின்மை ஏற்படுவதாகவும் பெற்றோர்கள் மற்றும் பல்வேறு மாகாண அரசுகள் குற்றம் சாட்டி வருகின்றன. இன்ஸ்டாகிராமின் அல்காரிதம்கள் சிறுவர்களை ஆபத்தான உள்ளடக்கங்களை நோக்கித் தள்ளுவதாகக் கூறப்படும் குற்றச்சாட்டுகளுக்குப் பதிலளிக்க ஜுக்கர்பெர்க் நீதிமன்றத்திற்கு அழைக்கப்பட்டார்.

மெட்டா சொல்வது என்ன?

இந்த விசாரணையில் மெட்டா நிறுவனம் சார்பில் வாதிடுகையில், வயது சரிபார்ப்பு (Age Verification) பொறுப்பானது சமூக வலைதள நிறுவனங்களை விட, ஆப் ஸ்டோர்கள் மற்றும் பெற்றோர்களிடமே அதிகம் இருக்க வேண்டும் என்று வலியுறுத்தப்பட்டது. இருப்பினும், 13 வயதிற்கு உட்பட்டவர்கள் சமூக ஊடகங்களைப் பயன்படுத்துவதைத் தடுக்க இன்னும் கடுமையான சட்டங்களும் தொழில்நுட்பத் தீர்வுகளும் தேவை என்பதை இந்த வழக்கு மீண்டும் உறுதிப்படுத்தியுள்ளது.

இந்த வழக்கின் தீர்ப்பு, எதிர்காலத்தில் இணையதளங்கள் மற்றும் செயலிகள் எவ்வாறு செயல்பட வேண்டும் என்பதையும், சிறார்களின் இணையப் பாதுகாப்பையும் தீர்மானிக்கும் ஒரு மைல்கல்லாக அமையும் என்று எதிர்பார்க்கப்படுகிறது.