Virat Kohli IPL Record: IPL-ல் அதிக ரன்களை குவித்த முதல் வீரர்.. ரன் மிஷின் விராட் கோலியின் சாதனை!

Virat Kohli IPL Record: ஐ.பி.எல் தொடரில் அதிக ரன்களை குவித்த வீரர் விராட் கோலி.

விராட் கோலி

ரன் மிஷின் விராட் கோலி:

இந்திய அணியின் ரன் மிஷின் என்று இந்திய ரசிகர்கள் மட்டுமின்றி உலகத்தின் அனைத்து கிரிக்கெட் ரசிகர்களாலும் கொண்டாடப்படுபவர் விராட் கோலி. சர்வதேச அளவில் கடந்த 2008 ஆம் ஆண்டில் இலங்கை அணிக்கு எதிரான ஒருநாள் கிரிக்கெட் போட்டியின் மூலம் இந்திய அணியில் அறிமுகமானவர். அதேபோல் சர்வதேச அளவில் 2010 ஆம் ஆண்டு டி20 போட்டியில் ஜிம்பாப்வே அணிக்கு எதிராகவும், டெஸ்ட் போட்டியில் 2011 ஆம் ஆண்டு வெஸ்ட் இண்டீஸ் அணிக்கு எதிராகவும் அறிமுகமானார்.அதன்படி சர்வதேச அளவில் ஒரு நாள் போட்டிகளில் அதிக சதம் அடித்த வீரர், இந்திய அணிக்காக அதிக வெற்றிகளில் பங்கேற்ற வீரர்,ஒருநாள் போட்டிகளில் குறைவான இன்னிங்ஸ்களில் விளையாடி 13000 ஒருநாள் ரன்களை எட்டிய முதல் சர்வதேச வீரர், ஒரு உலகக்கோப்பையில் 700 ரன்களை குவித்த முதல் வீரர் என்ற சாதனைகளுக்கு எல்லாம் சொந்தக்காரர் விராட் கோலி தான்.

ஐ.பி.எல் போட்டியில் அதிக ரன்கள் குவித்த வீரர்:

அதோடு, இந்தியாவில் நடைபெற்று வரும் ஐ.பி.எல் டி 20 போட்டிகளில் அதிக ரன்களை குவித்த முதல் வீரர் மற்றும் 7 ஆயிரம் ரன்களை முதலில் கடந்த வீரராகவும் விராட் கோலி தான் இருக்கிறார். 2023ஆம் ஆண்டு ஐ.பி.எல் தொடரில் சிறப்பான பேட்டிங் திறனை வெளிப்படுத்திய விராட் கோலி, 6 அரைசதங்கள் உட்பட 2 சதங்களை விளாசி 639 ரன்களை குவித்து அசத்தினார். அந்த வகையில் கடந்த 2023 ஆம் ஆண்டு டெல்லி கேபிட்டல்ஸ் அணிக்கு எதிராக நடைபெற்ற போட்டியில், 7000 ரன்களை கடந்த முதல் வீரர் மற்றும் முதல் இந்திய வீரர் என்ற சாதனையையும் படைத்திருக்கிறார்.

அந்தவகையில் கடந்த 2008 ஆம் ஆண்டு முதல் ஐ.பி.எல் தொடரில் விளையாடி வருகிறார் விராட் கோலி. இதுவரை 237 ஐ.பி.எல் போட்டிகளில் 229 இன்னிங்ஸ்களில் விளையாடி இருக்கும் இவர் 7263 ரன்களை குவித்துள்ளார். இதில் 7 சதங்கள் மற்றும் 50 அரைசதங்கள் அடங்கும். அந்தவகையில் தான் விளையாடிய ஐ.பி.எல் போட்டிகளில் இதுவரையில் 643 பவுண்டரிகள் மற்றும் 234 சிக்ஸர்களை பறக்கவிட்டுள்ள விராட் கோலி அதிகபட்சமாக 113 ரன்களை விளாசியிருக்கிறார். கடந்த 2008 ஆம் ஆண்டு முதல் தற்போது வரை பெங்களூரு ராயல் சேலஞ்சர்ஸ் அணிக்கு மட்டுமே கோலி விளையாடி வருகிறார். முன்னதாக, ஐ.பி.எல் தொடரில் அதிக ரன்கள் குவித்த வீரர்களில் ஷிகர் தவான் 6617 ரன்களுடன் இரண்டாவது இடத்தில் இருக்கிறார். மூன்றாவது இடத்தில் 6397 ரன்களுடன் டேவிட் வார்னர், நான்காவது இடத்தில் 6211 ரன்களுடன் ரோகித் சர்மா மற்றும் ஐந்தாவது இடத்தில் 5528 ரன்களுடன் சுரேஷ் ரெய்னா இருக்கிறார் என்பது குறிப்பிடத்தக்கது.

மேலும் படிக்க: IND vs ENG: இங்கிலாந்து அணியை வீழ்த்திய இந்தியா! இளம் வீரர்களை புகழ்ந்து தள்ளிய கேப்டன் ரோகித் சர்மா!

மேலும் படிக்க: Tamil Thalaivas vs Bengal Warriors: பெங்கால் வாரியர்ஸ் அணியை ஓட விட்ட தமிழ் தலைவாஸ்! கடைசி போட்டியில் அசத்தல் வெற்றி!