WTC Final 2023: 444 ரன்கள் இலக்கை சேஸ் செய்யுமா இந்தியா? இரண்டாவது இன்னிங்ஸில் ஆஸ்திரேலியா 270 ரன்கள் எடுத்த நிலையில் டிக்ளேர்..!

இரண்டாவது இன்னிங்ஸில் 8 விக்கெட்டுகளை இழந்து 270 ரன்கள் எடுத்த நிலையில் ஆஸ்திரேலிய அணி டிக்ளர் செய்துள்ளது. இதன் மூலம் இந்திய அணிக்கு 444 ரன்கள் இலக்காக நிர்ணயிக்கப்பட்டுள்ளது. 

ரஹானே - தாக்கூர் (Getty)

WTC Final 2023: ஐசிசி தரப்பில் கடந்த 2021ஆம் ஆண்டு முதல் தொடங்கப்பட்ட இரண்டாவது உலக டெஸ்ட் சாம்பியன்ஷிப் போட்டித் தொடர் தற்போது இறுதி கட்டத்தினை எட்டியுள்ளது. இதன் இறுதிப் போட்டியில் இந்தியா மற்றும் ஆஸ்திரேலிய அணிகள் விளையாடி வருகின்றன.  லண்டனில் உள்ள ஓவல் மைதானத்தில் கடந்த 7ஆம் தேதி முதல் நடைபெற்று வரும் இந்த போட்டியில் டாஸ் வென்ற இந்திய அணி பந்து வீச முடிவு செய்தது.

முதல் நாள் ஆட்ட நேர முடிவில் ஆஸ்திரேலிய அணி 85 ஓவர்களை எதிர்கொண்டு 3 விக்கெட்டுகளை இழந்து 327 ரன்கள் சேர்த்திருந்த நிலையில் வெளிச்சமின்மை காராணமாக போட்டி நிறுத்தப்பட்டது. ஆஸ்திரேலிய அணி சார்பில் ஹெட் 156 பந்தில்  146 ரன்களுடனும் ஸ்டீவ் ஸ்மித் 227 பந்துகளில்  95 ரன்களுடனும் களத்தில் இருந்தனர். அதன் பின்னர் இரண்டாவது நாள் இரண்டாவது பாதியில் ஆஸ்திரேலிய அணி அனைத்து விக்கெட்டுகளையும் இழந்து 469 ரன்கள் சேர்த்தது. அதன் பின்னர், களமிறங்கிய இந்திய அணி ஆஸ்திரேலிய அணியின் வேகத்துக்கு தாக்குபிடிக்காமல் அடுத்தடுத்து விக்கெட்டுகளை இழந்து தடுமாறி வந்தது. இதனால் இந்திய அணி முதல் இன்னிங்ஸை இரண்டாவது நாளிலேயே முடித்துக்கொள்ளும் எனும் நிலை ஏற்பட்டது. அதன் பின்னர் இணைந்த ரஹானே ஜடேஜா ஜோடி இந்திய அணியை மெல்ல மெல்ல சரிவில் இருந்து மீட்டு வந்த நிலையில் ஜடேஜா 48 ரன்களில் தனது விக்கெட்டை இழந்து வெளியேறினார். அதன் பின்னர் இரண்டாவது நாள் ஆட்டம் முடித்துக்கொளப்பட்டது. 

இந்திய அணி முதல் இன்னிங்ஸில் அனைத்து விக்கெட்டுகளையும் இழந்து 296 ரன்கள் சேர்த்தது. இதன் மூலம் முதல் இன்னிங்ஸில் ஆஸ்திரேலிய அணி 173 ரன்கள் முன்னிலையில் இருந்தது. அதன் பின்னர் தனது இரண்டாவது இன்னிங்ஸை தொடங்கிய ஆஸ்திரேலிய அணி 4 விக்கெட்டுகளை இழந்து 123 ரன்கள் சேர்த்த போது மூன்றாவது நாள் ஆட்டம் முடித்துக்கொள்ளப்பட்டது.

நான்காவது நாளில் தனது இரண்டாவது இன்னிங்ஸில் 8 விக்கெட்டுகளை இழந்து 270 ரன்கள் எடுத்த நிலையில் ஆஸ்திரேலிய அணி டிக்ளர் செய்தது. இதன் மூலம் இந்திய அணிக்கு 444 ரன்கள் இலக்காக நிர்ணயிக்கப்பட்டுள்ளது.  இரண்டாவது இன்னிங்ஸில் ஆஸ்திரேலிய அணி சார்பில், அலெக்ஸ் கேரி 66 ரன்கள் சேர்த்திருந்தார். இந்திய அணி சார்பில், ஜடேஜா மூன்று விக்கெட்டுகளையும் ஷமி மற்றும் யுமேஷ் யாதவ் தலா இரண்டு விக்கெட்டுகளையும் கைப்பற்றினர்.