Team India Next Captain: இந்திய கிரிக்கெட் அணியின் புதிய கேப்டன்...! ரோகித்தை பின்னுக்குத் தள்ளிய கே.எல்.ராகுல்...! விரைவில் அறிவிப்பா...?

இந்திய டெஸ்ட் அணியின் புதிய கேப்டனாக ரோகித் சர்மாவை விட கே.எல்.ராகுலையே நியமிக்க அதிக வாய்ப்புகள் உள்ளதாக தகவல்கள் வெளியாகியுள்ளது.

கே.எல்.ராகுல் - ரோகித் சர்மா

இந்திய டெஸ்ட் அணியின் கேப்டனாக பொறுப்பு வகித்து வந்தவர் விராட்கோலி. தென்னாப்பிரிக்க தொடரில் ஏற்பட்ட தோல்வி காரணமாக நேற்று திடீரென தனது கேப்டன் பதவியை ராஜினாமா செய்வதாக அறிவித்தார். அவரது இந்த அறிவிப்பால்  இந்திய ரசிகர்கள் கடும் அதிர்ச்சியடைந்தனர்.

எந்தவொரு ஐ.சி.சி. கோப்பையையும் கோலி வென்று தராவிட்டாலும், இந்திய அணியின் வெற்றிக்கேப்டனாகவே கோலி வலம்வந்தார்.இந்த நிலையில், அவரது ராஜினாமா இந்திய அணிக்கு பெரும் பின்னடைவை ஏற்படுத்தியுள்ளது. ஏற்கனவே ஒருநாள் மற்றும் டி20 போட்டிகளுக்கு ரோகித் சர்மா கேப்டனாக பொறுப்பு வகிக்கும் நிலையில், இந்திய அணியின் அடுத்த டெஸ்ட் கேப்டன் யார் என்ற கேள்வி எழுந்துள்ளது.

ஏற்கனவே இந்த தொடரில் இடம்பெற்றிருந்த ரோகித்சர்மா காயம் காரணமாக தென்னாப்பிரிக்க தொடரில் இருந்தே விலகியுள்ள நிலையில், அவருக்கு பதிலாக துணை கேப்டன் பொறுப்பை கே.எல்.ராகுலிடம் ஒப்படைத்தனர். ரோகித்சர்மாவை கேப்டனாக நியமிக்க பலரும் விருப்பம் தெரிவித்தாலும், இந்திய அணியின் எதிர்கால நலனை கருத்தில் கொண்டும், ரோகித்சர்மாவிற்கு அடிக்கடி ஏற்படும் காயம் இவற்றை எல்லாம் கருத்தில் கொண்டும் அவருக்கு பதிலாக கே.எல்.ராகுலை கேப்டனாக நியமிக்க முடிவு செய்யப்பட்டுள்ளதாக தகவல்கள் வெளியாகியுள்ளது.

விராட்கோலிக்கு பிறகு கேப்டன் பொறுப்பை ஏற்க ரோகித்சர்மாவிற்கு அனைத்து தகுதிகள் இருந்தாலும் அவருக்கு தற்போது 34 வயதாகிவிட்டது. ஆனால், கே.எல்.ராகுலுக்கு தற்போதுதான் 29 வயதாகிறது. அதுமட்டுமின்றி, இந்திய அணியின் தொடக்க வீரராக விளையாடி வரும் கே.எல்.ராகுல் டெஸ்ட், ஒருநாள் மற்றும் டி20 ஆகிய மூன்று வடிவ போட்டிகளிலும் இந்திய அணியின் தவிர்க்க முடியாத வீரராக உள்ளார். இதுமட்டுமின்றி, ஐ.பி.எல். போட்டிகளில் பஞ்சாப் அணியின் கேப்டனாக பொறுப்பு வகித்த அனுபவமும் கே.எல்.ராகுலுக்கு உண்டு.

ரோகித்சர்மா காயம் காரணமாக தென்னாப்பிரிக்க தொடரில் இருந்து விலகிய காரணத்தால், அவருக்கு பதிலாக தென்னாப்பிரிக்க தொடருக்கான இந்திய அணிக்கு கேப்டனாக கே.எல்.ராகுல் நியமிக்கப்பட்டுள்ளார் என்பது குறிப்பிடத்தக்கது. ரஹானேவை தற்போதுதான் துணை கேப்டன் பொறுப்பில் இருந்து கீழே இறக்கியதாலும், புஜாராவிற்கும் 30 வயதிற்கு மேல் ஆகுவதாலும் இளம் வீரரையே கேப்டனாக நியமிக்க இந்திய அணி நிர்வாகம் விரும்புவதாக தெரிகிறது.

இதுதொடர்பாக பி.சி.சி.ஐ. தலைவர் சவ்ரவ் கங்குலி, பயிற்சியாளர் ராகுல்டிராவிட் உள்ளிட்ட பலரும் தீவிரமாக ஆலோசித்து வருகின்றனர். 29 வயதே ஆன கே.எல்.ராகுல் இதுவரை 43 டெஸ்ட் போட்டிகளில் ஆடி 2 ஆயிரத்து 547 ரன்களை குவித்துள்ளார். அவற்றில் 7 சதங்களும், 13 அரைசதங்களும் அடங்கும். அதிகபட்சமாக 199 ரன்களை டெஸ்ட் போட்டிகளில் அடித்துள்ளார். லண்டன் லார்ட்ஸ் மைதானத்தில் அடித்த பெருமையும் கே.எல்.ராகுலுக்கு உண்டு.

மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்

ABP நாடு செய்திகளை சமூக வலைத்தள பக்கங்களிலும் பின் தொடரலாம்

பேஸ்புக் பக்கத்தில் தொடர

ட்விட்டர் பக்கத்தில் தொடர

யூடிபில் வீடியோக்களை காண