முதல் ரஞ்சி.. ஜம்மு காஷ்மீரை தலைநிமிர வைத்த பராஸ் டோக்ரா! 25 வருட உழைப்புக்கு அங்கீகாரம்!
ரஞ்சி கிரிக்கெட் கோப்பையை முதன்முறையாக வென்ற ஜம்மு காஷ்மீர் அணிக்காக மகுடம் சூடிய கேப்டன் பராஸ் டோக்ராவிற்கு பாராட்டு குவிந்து வருகிறது.
கர்நாடகாவின் ஹுப்ளியில் நடந்த ரஞ்சி கிரிக்கெட்டின் இறுதிப்போட்டியில் இன்று கர்நாடக அணியை வீழ்த்தி ஜம்மு காஷ்மீர் அணி ரஞ்சி வரலாற்றில் முதன்முறையாக பட்டம் பெற்று சாம்பியன் மகுடம் சூடியுள்ளது.
முதன்முறை ரஞ்சி சாம்பியன்:
1959ம் ஆண்டு முதல் ரஞ்சி கிரிக்கெட் ஆடி வரும் ஜம்மு காஷ்மீர் அணி இதுவரை பத்தோடு பதினொன்று அணிகளில் ஒன்றாகவே இருந்து வருகிறது. இந்த நிலையில், கே.எல்.ராகுல், மயங்க் அகரவால், தேவ்தத் படிக்கல், கருண்நாயர், பிரசித் கிருஷ்ணா, விஜயகுமார் வைஷக் என வலுவான கர்நாடக அணியை திறமையான படையைக் கொண்டு வீழ்த்தியவர் பராஸ் டோக்ரா.
உள்ளூர் கிரிக்கெட்டில் ஜாம்பவனாக திகழ்ந்த இவர் ஜம்மு காஷ்மீர் அணியை வழிநடத்தி சாம்பியன் பட்டம் பெற வைத்துள்ளார். யார் இவர்? என்று கீழே விரிவாக காணலாம்.
யார் இந்த பராஸ் டோக்ரா:
41 வயதான பராஸ் டோக்ரா இமாச்சலபிரதேசத்தில் கடந்த 1984ம் ஆண்டு நவம்பர் 19ம் தேதி பிறந்தவர். வலதுகை பேட்ஸ்மேனான இவர் ஜம்மு காஷ்மீர், இமாச்சல பிரதேசம், பாண்டிச்சேரி அணிகளுக்காக ஆடிய அனுபவம் கொண்டவர். ஐபிஎல் தொடரில் கொல்கத்தா நைட் ரைடர்ஸ், ராஜஸ்தான் ராயல்ஸ், பஞ்சாப் கிங்ஸ் அணிக்காக ஆடியவர்.
முதல் தர கிரிக்கெட்டில் இதுவரை 153 போட்டிகளில் 246 இன்னிங்சில் ஆடி 10 ஆயிரத்து 603 ரன்களை எடுத்துள்ளார். அதில் 34 சதங்களும், 37 அரைசதங்களும் அடங்கும். சராசரியாக 47.93 வைத்துள்ளார். லிஸ்ட் ஏ கிரிக்கெட்டில் 130 கிரிக்கெட்டில் 3751 ரன்கள் எடுத்துள்ளார். சராசரியாக 39.90 வைத்துள்ளார். அதிகபட்சமாக ஆட்டமிழக்காமல் 136 ரன்கள் எடுத்துள்ளார். 105 டி20 போட்டிகளில் ஆடி 2 ஆயிரத்து 324 ரன்கள் எடுத்துள்ளார்.
ரஞ்சியில் அசத்தல்:
2012 -13 ரஞ்சி சீசனில் இமாச்சல பிரதேசம் அணிக்காக ஆடி 8 போட்டிகளில் 5 சதங்கள் விளாசினார். வெஸ்ட் இண்டீஸ் சுற்றுப்பயணத்தில் இந்திய ஏ அணிக்காக அதிகாரப்பூர்வமற்ற டெஸ்ட் போட்டிகளில் ஆடியுள்ளார். 2015-2016 ரஞ்சி சீசன்களில் 703 ரன்களை விளாசியுள்ளார்.
ஐபிஎல் தொடரில் 2010 சீசனில் ராஜஸ்தான் அணிக்காக தேர்வானார். ஐபிஎல் தொடரில் 3 அணிகளுக்காக மொத்தம் 13 போட்டிகளில் ஆடி 127 ரன்கள் எடுத்துள்ளார். அதிகபட்சமாக 41 ரன்கள் எடுத்துள்ளார். 2001ம் ஆண்டு முதல் தொடர்ந்து 25 ஆண்டுகள் கிரிக்கெட் ஆடி வருகிறார்.
புதிய வரலாறு:
இந்திய டெஸ்ட் அணியில் இடம்பிடிக்க போதுமான அனுபவமும், திறமையும் இருந்தும் ஒரு முறை கூட இவருக்கு வாய்ப்பு வழங்கப்படவில்லை. இருப்பினும், விடா முயற்சியுடன் ஜம்மு காஷ்மீர் அணிக்காக இன்று புதிய வரலாற்றை படைத்துள்ளார்.
தலைப்பு செய்திகள்
ட்ரெண்டிங் செய்திகள்
