IND vs SL 2nd ODI: இந்தியாவை சமாளிக்குமா இலங்கை..? இரண்டாவது ஒருநாள் போட்டி இன்று நடக்கிறது..!

IND vs SL 2nd ODI: இந்தியா மற்றும் இலங்கை அணிகளுக்கு இடையிலான இரண்டாவது ஒருநாள் கிரிக்கெட் போட்டி இன்று மதியம் 1.30 மணிக்கு கல்கத்தாவில் உள்ள ஈடன் கார்டன் மைதானத்தில் நடைபெறவுள்ளது.

சுப்மன் கில் - ரோகித் ஷர்மா (Source: PTI)

IND vs SL 2nd ODI:  இந்தியா மற்றும் இலங்கை அணிகளுக்கு இடையிலான இரண்டாவது ஒருநாள் கிரிக்கெட் போட்டி இன்று மதியம் 1.30 மணிக்கு கல்கத்தாவில் உள்ள ஈடன் கார்டன் மைதானத்தில் நடைபெறவுள்ளது. 

இந்தியாவுக்கு சுற்றுப்பயணம் செய்து டி20 மற்றும் ஒருநாள் போட்டியில் விளையாடி வரும் இலங்கை அணி ஏற்கனவே டி20 போட்டித் தொடரினை 2-1 என்ற கணக்கில் இழந்தது. நேற்று முன்தினம் நடந்த ஒருநாள் போட்டியில் இலங்கை அணி 67 ரன்கள்  வித்தியாசத்தில் தோல்வியைத் தழுவியது. இந்நிலையில், இரண்டாவது ஒருநாள் போட்டி இன்று மதியம் கொல்கத்தாவில் உள்ள ஈடன் கார்டன் மைதானத்தில் நடைபெறவுள்ளது. மூன்று போட்டிகள் கொண்ட ஒருநாள் தொடரில் தற்போது இந்திய அணி முன்னிலை வகிப்பதால் அடுத்த இரண்டு போட்டிகளும் இலங்கை அணிக்கு மிகவும் முக்கியமான போட்டியாக இருக்கும். 

ஏற்கனவே முதல் போட்டியில் இலங்கை அணி ஆல்-அவுட் ஆகிவிடும் என எதிர்பார்க்கப்பட்ட நிலையில் இலங்கை அணியின் கேப்டன் ஷனகா நிலைத்து நின்று விளையாடி 88 பந்தில் 108 ரன்கள் எடுத்து அணிக்கு நம்பிக்கை அளிக்கும்  ஆட்டத்தினை வெளிப்படுத்தியதுடன், இந்திய பந்து வீச்சினை எப்படி  எதிர்கொள்ள வேண்டும் என தனது அணிக்கு செய்து காட்டி இருக்கிறார். போட்டியில் தோற்றாலும், ஒரு வீரனாக அனைத்து கிரிக்கெட் ரசிகர்களின் மனதினை வென்ற பின்னர் தான் மைதானத்தில் இருந்து வெளியேறினார். 

ஷனகாவின் சதம் இலங்கை அணிக்கு ஒரு தனி உத்வேகத்தினை அளித்திருக்கும், இந்நிலையில், இலங்கை அணி இரண்டாவது ஒருநாள் போட்டியினை வெல்ல பெரும் நம்பிக்கையோடு களமிறங்கவுள்ளது. ஆனால் இலங்கை அணிக்கு இருக்கக் கூடிய சவால் அதன் பலத்தினை விடவும் பலமடங்கு பெரிய பேட்டிங் பட்டாளத்தினை கொண்டுள்ள இந்திய அணியை சமாளிக்க உத்வேகம் மட்டும் போதாது, புது உத்தியும் தேவை, அப்படியான உத்தியுடன் இலங்கை அணி செயல்படுமா என்பதை போட்டியின் போதுதான் பார்க்க வேண்டும். 

இந்திய அணியைப் பொறுத்தவரையில் சொந்த ஊரில் நடக்கும் போட்டி என்பதால் கொஞ்சம் ரிலாக்‌ஷாகத்தான் விளையாடும். இந்திய அணியின் தொடக்க ஆட்டக்காரர்களான கேப்டன் ரோகித் ஷர்மா மற்றும் சுப்மன் கில் ஆகியோருக்கு மிகவும் ராசியான மைதானம் என்றால் அது இன்று போட்டி நடைபெறவுள்ள ஈடன் கார்டன் மைதானம் தான். சுப்மன் கில் ஐபிஎல் தொடரில்  கொல்கத்தா நைட் ரைடர்ஸ் அணிக்காக பல சிறப்பான ஆட்டங்களை வெளிப்படுத்தி இந்திய அணியில் இடம் பெற காரணமாக இருந்த மைதானம் என்பதால், தொடக்க வீரர்கள் இருவரிடமும் இருந்து தரமான சம்பவத்தினை எதிர்பார்க்கலாம். 

இந்தியா இலங்கை அணிகளுக்கு இடையில் இதுவரை 163 ஒருநாள் போட்டிகளில் நேருக்கு நேர் மோதியுள்ளன. இதில் இந்திய அணி 94 போட்டிகளிலும், இலங்கை அணி 57 போட்டிகளிலும் வென்றுள்ளன. 11 போட்டிகள் முடிவு எதுவும் எடுக்கப்படாமல் கைவிடப்பட்டுள்ளது. ஒரு போட்டி டிராவில் முடிவடைந்துள்ளது. 

இந்தியா vs இலங்கை 2வது ODIயை நான் எப்படி நேரடி ஒளிபரப்பு செய்யலாம்?

இந்தியா மற்றும் இலங்கை அணிகளுக்கு இடையிலான இராண்டாவது ஒருநாள் போட்டியின் நேரடி ஒளிபரப்பை இந்தியாவில் உள்ள ஹாட்ஸ்டார் செயலியில் காணலாம்.

இந்தியா:  ரோஹித் சர்மா (கேப்டன்), ஷ்ரேயாஸ் ஐயர், சூர்யகுமார் யாதவ், கே.எல். ராகுல் (விக்கெட் கீப்பர்), விராட் கோலி, ஷுப்மன் கில், அக்சர் படேல், வாஷிங்டன் சுந்தர், ஹர்திக் பாண்டியா, இஷான் கிஷன் (விக்கெட் கீப்பர்), யுஸ்வேந்திர சாஹல், அர்ஷ்தீப் சிங், குல்தீப் யாதவ். முகமது ஷமி, முகமது சிராஜ், உம்ரான் மாலிக் மற்றும் ஜஸ்பிரித் பும்ரா.

இலங்கை:  தசுன் ஷனக (கேப்டன்), நுவனிது பெர்னாண்டோ, அவிஷ்க பெர்னாண்டோ, அஷேன் பண்டார, பதும் நிஸ்ஸங்க, தனஞ்சய டி சில்வா, சரித் அசலங்கா, சாமிக்க கருணாரத்னே, குசல் மெண்டிஸ் (விக்கெட் கீப்பர்), சதீர சமரவிக்ரம (விக்கெட் கீப்பர்), டில்ஷான் மதுஷங்க, பிரமோத் மதுஷங்க, பிரமோத். வெல்லலகே, ஜெஃப்ரி வான்டர்சே, கசுன் ராஜித, லஹிரு குமார, மற்றும் மஹீஷ் தீக்ஷன.