Highest ODI Score: அம்மாடியோவ்..! ஒருநாள் போட்டியில் இப்படியா..! புதிய உலக சாதனையை படைத்த இங்கிலாந்து..!
நெதர்லாந்து அணிக்கு எதிராக 498 ரன்கள் குவித்த இங்கிலாந்து, ஒருநாள் கிரிக்கெட் போட்டியில் அதிக ரன்கள் விளாசிய அணி என்ற உலக சாதனையை படைத்துள்ளது.
இங்கிலாந்து அணி நெதர்லாந்து அணிக்கு சுற்றுப்பயணம் மேற்கொண்டு ஆடி வருகிறது. இரு அணிகளும் மோதும் முதல் ஒருநாள் போட்டி ஆம்ஸ்டீல்வன் நகரில் நடைபெற்று வருகிறது. இந்த போட்டியில் டாஸ் வென்ற நெதர்லாந்து அணி பந்துவீச்சை தேர்வு செய்தது. டாஸ் வென்று பந்துவீச்சைத் தேர்வு செய்தது மிகப்பெரிய தவறு என்பதை நெதர்லாந்து கேப்டன் பின்னர் வருத்தப்பட்டிருப்பார்.
நெதர்லாந்து அணிக்கு ஆறுதலாக அந்த அணியின் தொடக்க வீரர் ஜேசன் ராய் மட்டும் 1 ரன்னில் ஆட்டமிழந்தார். அடுத்து ஜோடி சேர்ந்த பிலிப்சால்ட் மற்றும் டேவிட்மலான் ஜோடி மைதானத்தின் நான்கு புறமும் பந்துகளை விளாசித் தள்ளியது. குறிப்பாக, பிலிப் சால்ட் பவுண்டரிகளாக விளாசினார்.
அதிரடியாக ஆடிய பிலிப் சால்ட்ம் சதமடித்து அசத்தினர். இருவரும் இணைந்து இரண்டாவது விக்கெட்டிற்கு 222 ரன்களை குவித்தனர். 29.4வது ஓவரில் பிலிப் சால்ட் 14 பவுண்டரி 3 சிக்ஸருடன் 122 ரன்களை குவித்து வெளியேறினார். அவர் ஆட்டமிழந்த பிறகு களமிறங்கிய ஜோஸ் பட்லர் நெதர்லாந்து பந்துவீச்சாளர்களை மிகவும் நோகடித்தார்.
ஜோஸ் பட்லர் சிக்ஸர்களாக விளாசினார். இருவரும் இணைந்து அதிரடியாக ஆடியதால் இங்கிலாந்து அணி 43 ஓவர்களிலே 400 ரன்களை கடந்தது. அணியின் ஸ்கோர் 407 ரன்களை எட்டியபோது சதமடித்து அசத்தியிருந்த டேவிட் மலான் 109 பந்துகளில் 9 பவுண்டரி 3 சிக்ஸருடன் 125 ரன்கள் விளாசி வெளியேறினார். அவர் ஆட்டமிழந்த பிறகு களமிறங்கிய கேப்டன் மோர்கன் டக் அவுட்டாகினார்.
பின்னர், ஜோஸ் பட்லருடன் ஜோடி சேர்ந்த லியாம் லிவிங்ஸ்டன் சரவெடியாக வெடித்தார். அவர் சிக்ஸரும் பவுண்டரியும் விளாசினார். லிவிங்ஸ்டன் அரைசதம் அடித்தார். 49.2 ஓவர்களில் 481 ரன்களை எட்டி தங்களது முந்தைய சாதனையை இங்கிலாந்து சமன்செய்தது. அடுத்த பந்தில் சிக்ஸர் அடித்து ஒருநாள் கிரிக்கெட் போட்டியில் அதிக ரன்களை விளாசிய அணி என்ற புதிய உலக சாதனையை படைத்தது. 50 ஓவர்களின் முடிவில் இங்கிலாந்து அணி 4 விக்கெட் இழப்பிற்கு 498 ரன்களை விளாசி புதிய உலக சாதனையை படைத்தது.
ஆஸ்திரேலிய அணிக்கு எதிராக இங்கிலாந்து 2018ம் ஆண்டு விளாசிய 481 ரன்களே இதற்கு முந்தைய சாதனையாக இருந்தது. தற்போது அந்த சாதனையை இங்கிலாந்தே முறியடித்து புதிய உலக சாதனை படைத்துள்ளது. 2016ம் ஆண்டு பாகிஸ்தானுக்கு எதிராக 444 ரன்களை விளாசி இங்கிலாந்து சாதனை படைத்திருந்தது. ஒருநாள் கிரிக்கெட் போட்டியில் அதிக ரன்கள் விளாசிய அணி என்ற பட்டியலில் முதல் மூன்று இடத்திலும் இங்கிலாந்தே உள்ளது என்பது குறிப்பிடத்தக்கது.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்
தலைப்பு செய்திகள்
ட்ரெண்டிங் செய்திகள்
