மயிலாடுதுறை மாவட்டத்தில் விநாயகர் சதுர்த்தி விழாவை முன்னிட்டு இவ்வளவு சிலைகளா  பிரதிஷ்டை..!

விநாயகர் சதுர்த்தி விழாவை முன்னிட்டு மயிலாடுதுறை மாவட்டத்தில் 395 விநாயகர் சிலைகள் பிரதிஷ்டை செய்ய உள்ளதாக மாவட்ட காவல் கண்காணிப்பாளர் தகவல் தெரிவித்துள்ளார்.

கோப்பு படம்

Source : ABP

நாடு முழுவதும் விநாயகர் சதுர்த்தி விழா வரும் 27-ஆம் தேதி கோலாகலமாகக் கொண்டாடப்பட உள்ளது. இந்நிலையில், விநாயகர் சதுர்த்தியை முன்னிட்டு மயிலாடுதுறை மாவட்டத்தில் பாதுகாப்பு ஏற்பாடுகள் தீவிரப்படுத்தப்பட்டுள்ளன. இம்மாவட்டத்தில் மொத்தம் 395 விநாயகர் சிலைகள் வைக்கப்பட்டு வழிபாடு மேற்கொள்ளப்பட உள்ளதாக மாவட்டக் காவல் கண்காணிப்பாளர் (எஸ்.பி) ஸ்டாலின் தெரிவித்துள்ளார். சிலை கரைப்பு இடங்களைப் பார்வையிட்டு ஆய்வு செய்த அவர், செய்தியாளர்களிடம் பாதுகாப்பு ஏற்பாடுகள் குறித்த பல்வேறு முக்கிய தகவல்களைப் பகிர்ந்து கொண்டார்.

சிறப்பு ஆய்வு மற்றும் பாதுகாப்புத் திட்டங்கள்

மயிலாடுதுறை மாவட்டம் சீர்காழி அருகே உள்ள சட்டநாதபுரம் உப்பனாற்றில், விநாயகர் சிலைகள் கரைக்கப்படும் இடத்தை எஸ்.பி. ஸ்டாலின் நேரில் பார்வையிட்டு ஆய்வு செய்தார். ஆண்டுதோறும் இந்த இடத்தில் தான் விநாயகர் சிலைகள் ஊர்வலமாகக் கொண்டுவரப்பட்டு கரைக்கப்படுவது வழக்கம். ஆய்வின்போது, சீர்காழி துணை காவல் கண்காணிப்பாளர் (டி.எஸ்.பி.) அண்ணாதுரை, சீர்காழி காவல் ஆய்வாளர் கமல்ராஜ், போக்குவரத்து காவல் உதவி ஆய்வாளர் மணவாளன் மற்றும் எஸ்.பி.யின் தனிப்பிரிவு காவலர் சார்லஸ் உள்ளிட்டோர் உடனிருந்தனர்.

ஆய்வுக்குப் பின்னர் செய்தியாளர்களிடம் பேசிய எஸ்.பி. ஸ்டாலின், “மயிலாடுதுறை மாவட்டத்தில் விநாயகர் சதுர்த்தி விழாவை முன்னிட்டு, மொத்தம் 395 விநாயகர் சிலைகள் நிறுவப்பட உள்ளன. இதில், மயிலாடுதுறை உட்கோட்டத்தில் 203 சிலைகளும், சீர்காழி உட்கோட்டத்தில் 192 சிலைகளும் வைக்கப்படுகின்றன. அனைத்து இடங்களிலும் உரிய பாதுகாப்பு ஏற்பாடுகள் செய்யப்பட்டுள்ளன. சிலைகள் வைப்பதற்கான விதிமுறைகள் குறித்து ஏற்கனவே இந்து அமைப்புகள் மற்றும் பக்தர்களுக்குத் தெரிவிக்கப்பட்டுள்ளது. சிலைகள் அமைக்கப்படும் இடங்களில் காவல்துறையின் பாதுகாப்பு பலப்படுத்தப்பட்டுள்ளது,” என்றார்.

சிலை ஊர்வலம் மற்றும் கரைப்பு நடவடிக்கைகள்

சிலைகள் கரைப்பு குறித்த விரிவான தகவல்களைப் பகிர்ந்துகொண்ட எஸ்.பி., மயிலாடுதுறை மாவட்டத்தில் “விநாயகர் சிலைகள் வரும் 27 மற்றும் 28-ஆம் தேதிகளில் நீர்நிலைகளில் கரைக்கப்பட உள்ளன. மீதமுள்ள சிலைகளை 29-ஆம் தேதிக்குள் முழுமையாகக் கரைக்க நடவடிக்கை எடுக்கப்பட்டுள்ளது,” என்றார். மேலும், “விநாயகர் சிலைகளை ஊர்வலமாக எடுத்துச் செல்லும்போது, அமைதி மற்றும் பாதுகாப்பு விதிகள் முறையாகக் கடைப்பிடிக்கப்பட வேண்டும். ஊர்வலத்தில் பங்கேற்போர் எவ்விதமான வன்முறைச் செயல்களிலும் ஈடுபடக்கூடாது. காவல்துறையின் அறிவுறுத்தல்களைப் பின்பற்றி, எவ்வித அசம்பாவிதங்களும் இன்றி ஊர்வலத்தை அமைதியாக நடத்தி முடிக்க வேண்டும்,” என அவர் வலியுறுத்தினார்.

உப்பனாற்றில் சிறப்பான ஏற்பாடுகள்

சீர்காழி சட்டநாதபுரம் உப்பனாற்றில் நடைபெறும் சிலை கரைப்பு நிகழ்விற்காக, சிறப்பு ஏற்பாடுகள் செய்யப்பட்டுள்ளதாக அவர் குறிப்பிட்டார். “விநாயகர் சிலைகள் கரைக்கப்படும் இடத்தில் போதிய மின்விளக்கு வசதிகள் அமைக்கவும், அந்தப் பகுதியைத் தூய்மைப்படுத்தவும் நகராட்சி நிர்வாகத்துடன் இணைந்து நடவடிக்கை எடுக்கப்பட்டுள்ளது. ஊர்வலத்தின் போதும், சிலை கரைப்பின் போதும் கூடுதல் எண்ணிக்கையிலான காவல்துறையினர் பாதுகாப்புப் பணியில் ஈடுபடுத்தப்படுவார்கள்,” என்றார்.

பொதுமக்களுக்கு வேண்டுகோள்

“விநாயகர் சதுர்த்தி விழா ஒரு மகிழ்ச்சியான தருணம். பக்தர்கள் தங்கள் நம்பிக்கையின்படி விழாவைக் கொண்டாடுவதற்குத் தேவையான அனைத்து உதவிகளையும் காவல் துறை வழங்கும். அதே நேரத்தில், அமைதிக்குக் குந்தகம் விளைவிக்கும் செயல்கள் நடந்தால், அவர்கள் மீது கடுமையான நடவடிக்கை எடுக்கப்படும். பொதுமக்கள் அனைவரும் ஒத்துழைப்பு நல்கி, விழாவை அமைதியான முறையில் கொண்டாடுமாறு கேட்டுக்கொள்கிறோம்,” என எஸ்.பி. ஸ்டாலின் தெரிவித்தார்.

இதையும் படிக்க

விநாயகர் சிலை தயாரிப்பு மையத்திற்கு சீல்: இந்து அமைப்புகள் கொந்தளிப்பு! மயிலாடுதுறையில் பரபரப்பு..

சிறுத்தையைக் கண்டு அஞ்சாத மயிலாடுதுறை, நாயைக் கண்டு அலறல்.