Trump Vs Zelensky: “ஜெலன்ஸ்கி போரை நிறுத்த விரும்பல“-ட்ரம்ப்; நீங்களே ஆயுதங்கள சப்ளை பண்ணிட்டு இப்படி சொல்லலாமா.?

போர் நிறுத்தம் தொடர்பாக ரஷ்யா-உக்ரைன் இடையே பேச்சுவார்த்தை நடைபெறும் நிலையில், ஜெலன்ஸ்கி தான் அதை தாமதப்படுத்துவதாகவும், அவர் போரை நிறுத்த விரும்புவது போல் தெரியவில்லை என்றும் ட்ரம்ப் கூறியுள்ளார்.

உக்ரைன் அதிபர் ஜெலன்ஸ்கி மீது அமெரிக்க அதிபர் ட்ரம்ப் குற்றச்சாட்டு

Source : PTI

ரஷ்யா - உக்ரைன் போரை நிறுத்துவதற்காக பேச்சுவார்த்தைகள் தொடர்ந்து நடைபெற்று வருகின்றன. இந்நிலையில், போர் நிறுத்தத்திற்கான தனது முன்மொழிவு மீது, உக்ரைன் அதிபர் வோலோடிமிர் ஜெலன்ஸ்கி எந்த முடிவும் எடுக்காமல் காலம் தாழ்த்துவது, அவர் போர் நிறுத்தத்தை விரும்பவில்லையோ என்று எண்ணத் தோன்றுவதாக, அமெரிக்க அதிபர் ட்ரம்ப் தெரிவித்துள்ளார். ஆனால், ஆயுதங்களையும் அவர்களுக்கு கொடுத்துவிட்டு ட்ரம்ப் இப்படி சொல்லலாமா என் கேள்வி எழுந்துள்ளது.

ட்ரம்ப் முன்மொழிந்த அமைதித் திட்டம்

ரஷ்யா - உக்ரைன் இடையேயான போர் கிட்டத்தட்ட 4 ஆண்டுகளை எட்ட உள்ளது. இந்நிலையில், இரு நாடுகளுக்கு இடையேயான போரை  நிறுத்துவதற்காக உலக நாடுகள் எடுத்த முயற்சிகள் அனைத்தும் தோல்வியில் முடிந்தன. இதைத் தொடர்ந்து, காசா - இஸ்ரேல் போர் நிறுத்தத்திற்கு முன்மொழிந்ததைப் போல்,  ரஷ்யா-உக்ரைனுக்கான மற்றொரு அமைதித் திட்டத்தை அமெரிக்க அதிபர் ட்ரம்ப் முன்மொழிந்தார்.

ட்ரம்ப்பின் அந்த அமைதித் திட்டத்தை ரஷ்யா முதலில் ஏற்றுக்கொண்டது. இந்நிலையில், அமைதி ஒப்பந்தத்தில் குறிப்பிடப்பட்டுள்ள பெரும்பாலான அம்சங்கள் ரஷ்யாவுக்கே சாதகமாக இருப்பதாக உக்ரைன் அதிபர் ஜெலன்ஸ்கி தெரிவித்தார். இதைத் தொடர்ந்து, அந்த அமைதித் திட்டத்தில் ஒருசில அம்சங்களை மாற்றியமைத்து, மீண்டும் அமைதி ஒப்பந்தத்துக்கான ஒரு முன்மொழிவை அமெரிக்கா வழங்கியது. ஆனால், இந்த முறை, அதில் இடம்பெற்றுள்ள சில அம்சங்கள் நடைமுறைக்கு ஒத்துவராது என்று ரஷ்யா எதிர்ப்பு தெரிவித்தது. மறுபுறம், உக்ரைன் பிரதிநிதிகள் இதற்கு வரவேற்பு தெரிவித்தனர்.

ஜெலன்ஸ்கியை குற்றம்சாட்டிய ட்ரம்ப்

இந்த சூழலில், இந்த அமைதி ஒப்பந்த முன்மொழிவு குறித்து, மூன்று நாட்களாக அமெரிக்காவின் மியாமியில், அமெரிக்கா மற்றும் உக்ரைன் பிரதிநிதிகள் இடையே பேச்சுவார்த்தை நடந்துவந்த நிலையில், அது எந்தவித முடிவு இல்லாமல் நிறைவடைந்தது.

இந்த பேச்சுவாத்தைகள் நடந்து முடிந்த சில மணி நேரங்களில், அமெரிக்க அதிபர் டிரம்ப் அது குறித்த தனது கருத்தை தெரிவித்தார். அதில், இந்த அமைதி ஒப்பந்த முன்மொழிவு வரைவை உக்ரைன் அதிபர் ஜெலன்ஸ்கியின் குழுவில் உள்ளவர்கள் ஏற்றுக்கொண்ட போதிலும், ஜெலன்ஸ்கி அதை ஏற்றுக்கொள்ள தயாராக இல்லை என்றும், இது தனக்கு ஏமாற்றம் அளிப்பதாகவும் ட்ரம்ப் தெரிவித்துள்ளார்.

அதோடு, ரஷ்ய அதிபர் புதின் இந்த போரை முடிவுக்கு கொண்டுவர விரும்புவதாகவும், ரஷ்யாவுக்கு அதில் எந்த பிரச்னையும் இல்லை என்று தாம் நம்புவதாகவும் ட்ரம்ப் கூறியுள்ளார். அதே சமயத்தில், உக்ரைன் அதிபர் தான்  பேச்சுவார்த்தையை தாமதப்படுத்தி வருவதாக ம்ரம்ப் குற்றஞ்சாட்டியுள்ளார்.

இந்நிலையில், போரை நிறுத்த அமெரிக்கா முன்மொழிந்துள்ள அமைதி திட்டம் குறித்து, ஐரோப்பிய நாடுகள் லண்டனில் கூடி விவாதிக்க உள்ளதாக தகவல்கள் வெளியாகியுள்ளன. ரஷ்யா உடன் போர் புரிவதற்கான ஆயுதங்களை அமெரிக்காவும் உக்ரைனுக்கு வழங்கி வருகிறது. மேலும், ட்ரம்ப்பின் அமைதித் திட்டம் பெரும்பாலும் ரஷ்யாவுக்கு சாதகமாகவே வடிவமைக்கப்பட்டதாக ஏற்கனவே கூறப்பட்டது. இந்த நிலையில், ட்ரம்ப் உக்ரைன் அதிபர் ஜெலன்ஸ்கி மீது குற்றம்சாட்டுகிறார். இது எந்த விதத்தில் நியாயம் என்ற கேள்வியே தற்போது எழுகிறது.