குழந்தைகளுடன் தீ மிதித்த பக்தர்கள் - பரவசத்தில் மெய்சிலிர்த்த மக்கள்!
மயிலாடுதுறை மாவட்டத்தில் நடைபெற்ற இருவேறு கோயில் தீமிதி திருவிழாவில் ஏராளமான பக்தர்கள் தீமிதித்து நேர்த்திக்கடன் செலுத்தினர்.
மயிலாடுதுறை மாவட்டம் தரங்கம்பாடி தாலுக்கா கீழ்மாத்தூர் ஊராட்சி ஒட்டங்காடு கிராமத்தில் தருமபுரம் ஆதீனத்திற்கு சொந்தமான பழமைவாய்ந்த ஸ்ரீ சீதளாதேவி மாரியம்மன் திருக்கோயில் அமைந்துள்ளது. கோயில் ஆண்டு தோறும் பங்குனி மாதம் ஆண்டு திருவிழா நடைபெறுவது வழக்கம். இந்தாண்டு திருவிழாவனது கடந்த மார்ச் 17-ஆம் தேதி கொடியேற்றத்துடன் தொடங்கியது.
தொடர்ந்து காப்பு கட்டுதல் நடைபெற்றது. அதனை அடுத்து தினம்தோறும் அம்மனுக்கு அபிஷேக ஆராதனையும் அம்மன் வீதியுலா காட்சியும் நடைபெற்று வந்தது. விழாவில் முக்கிய நிகழ்வான 14 ம் நாள் திருவிழாவான தீமிதி திருவிழா நடைபெறுகிறது. தீமிதி நிகழ்வை முன்னிட்டு கோயில் தீர்த்த குளத்திலிருந்து சிறப்பு பூஜைகளுடன் மேளதாள வாத்தியங்கள் முழங்க கரகம் புறப்பாடு செய்யப்பட்டது.
காப்பு கட்டி விரதம் இருந்த பக்தர்கள் அலகு காவடி எடுத்தும் 16 அடிநீள அலகை வாயில் குத்தியும், மஞ்சள், சிவப்பு உடை உடுத்தி ஆயிரத்திற்கும் மேற்பட்ட பக்தர்கள் கோயிலை சுற்றி வலம் வந்தனர். பின்னர் கோயிலின் முன்பு அமைக்கப்பட்டிருந்த தீக்குழியில் இறங்கி தீமிதித்து தங்கள் நேர்த்திகடனை செலுத்தினர். ஏராளமான பக்தர்கள் குழந்தைகளை தூக்கி கொண்டு பக்தி பரவசத்துடன் தீமிதித்தது பக்தர்களை மெய்சிலிர்க்க வைத்தது. தொடர்ந்து பக்தர்கள் சுவாமிக்கு மா விளக்கு போட்டு தரிசனம் செய்து வழிபட்டனர். தீமிதி திருவிழாவை காண சுற்றுவட்டார பகுதிகளில் இருந்து ஏராளமான மக்கள் கோயில் திரண்டிருந்தனர். விழாவில் கரகாட்டம் உள்ளிட்ட கலை நிகழ்வுகள் நடைபெற்றன.
இதேபோல் இலுப்பூர் கிராமத்தில் உள்ள ஸ்ரீ மகா மாரியம்மன் திருக்கோயிலில் 23 -ஆம் ஆண்டு தீமிதி திருவிழா வெகு விமர்சையாக நடைபெற்றது. கடந்த 23 -ஆம் தேதி கணபதி ஹோமத்துடன் விழா தொடங்கியது. அதனை தொடர்ந்து வீரசோழன் ஆற்றில் இருந்து கரகம் சிறப்பு பூஜைகளுடன் புறப்பாடு செய்யப்பட்டது. காப்பு கட்டி விரதமிருந்த திரளான பக்தர்கள் ஆற்றங்கரையில் இருந்து மேளதாள வாத்தியங்கள் முழங்க கரகம் முன்னே செல்ல பின்தொடர்ந்தது கோயிலை வந்தடைந்தனர்.
சக்தி கரகம் முன்னதாக தீக்குழியில் இறங்க அதனை தொடர்ந்து விரதம் இருந்த பக்தர்கள் ஒருவர் பின் ஒருவராக தீமிதித்து தங்களது நேர்த்தி கடனை செலுத்தினர். மேலும் ஏராளமான பக்தர்கள் மாவிளக்கு தீபமிட்டு வழிபட்டனர். தொடர்ந்து கண் கவரும் வானவேடிக்கைகள் விண்ணில் சீறிப்பாய்ந்த நிகழ்ச்சி பொதுமக்களை உற்சாகப்படுத்தியது. தீமிதி திருவிழாவில் பல்வேறு பகுதிகளில் இருந்து ஏராளமான பக்தர்கள் கலந்து கொண்டு சாமி தரிசனம் செய்தனர்.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்
தலைப்பு செய்திகள்
ட்ரெண்டிங் செய்திகள்
