Aadi Amavasai 2025: ஆடி அமாவாசை: முன்னோர் ஆசி பெற பூம்புகார் கடற்கரையில் திரண்ட மக்கள்..!
Aadi Amavasai 2025: ஆடி அமாவாசையை முன்னிட்டு முன்னோர்களுக்கு தர்பணம் கொடுக்க பூம்புகார் கடற்கரையில் ஏராளமான மக்கள் திரண்டு வழிபாடு செய்தனர்.
ஆடி அமாவாசை என்பது இந்துக்களின் மிக முக்கியமான நாட்களில் ஒன்றாகும். இந்நாளில் பித்ருக்களுக்கு (மறைந்த முன்னோர்கள்) எள்ளும், தண்ணீரும் இட்டு தர்ப்பணம் செய்வதன் மூலம் அவர்களின் ஆசிகளைப் பெறலாம் என்பது தலைமுறை தலைமுறையாகப் பின்பற்றப்படும் நம்பிக்கையாகும். பித்ருக்களுக்கு எள்ளும் தண்ணீரும் மிகவும் பிடித்தமானவை என்பதால், அமாவாசை நாளில் அவர்களை நினைத்து பித்ரு ப்ரீதி (முன்னோர்களை மகிழ்வித்தல்) செய்வது வழக்கமாக உள்ளது. ஆகையால் இந்த சிறப்பு மிக்க ஆடி அமாவாசையை முன்னிட்டு, தமிழகத்தின் புண்ணியத் தலங்கள், ஆற்றங்கரைகள் மற்றும் கடற்கரைகளில் முன்னோர்களுக்குத் தர்ப்பணம் வழங்க மக்கள் பெருமளவில் கூடுவார்கள்.
ஆடி, தை, புரட்டாசி அமாவாசைகளின் மகத்துவம்
ஆடி மாதத்தில் வரும் அமாவாசை, தை மாதத்தில் வரும் அமாவாசை, மற்றும் புரட்டாசி மாதத்தில் வரும் அமாவாசை ஆகியவை மிகவும் விசேஷமான நாட்களாகக் கருதப்படுகின்றன. இந்த மூன்று அமாவாசை நாட்களிலும் ஆறு, குளம் மற்றும் கடலில் புனித நீராடி, மறைந்த முன்னோர்களுக்குத் தர்ப்பணம் கொடுத்து, அருகில் உள்ள கோயில்களில் சுவாமி தரிசனம் செய்தால் வாழ்க்கையில் சகல நன்மைகளும் கிடைக்கும் என்பது இந்துக்களின் ஆழ்ந்த நம்பிக்கையாகும். இதன் காரணமாக, தமிழகத்தின் கடற்கரைப் பகுதிகள் மற்றும் புண்ணிய நதிக்கரைகளில் அமாவாசை நாட்களில் முன்னோர்களுக்குத் தர்ப்பணம் அளிக்கும் நிகழ்வுகள் பக்திப்பூர்வமாக நடைபெறுகின்றன.
பூம்புகாரில் சிறப்பு வழிபாடுகள்
மயிலாடுதுறை மாவட்டத்தில் அமைந்துள்ள பூம்புகார், வரலாற்றுச் சிறப்புமிக்க ஒரு பகுதியாகும். இங்கு காவிரி ஆறும், கடலும் சங்கமிக்கும் சங்கமத்துறை மற்றும் பிரசித்தி பெற்ற காவிரி துலா கட்டம் ஆகியவை அமைந்துள்ளன. ஆடி, தை, புரட்டாசி மாத அமாவாசை நாட்களில் முன்னோருக்குத் தர்ப்பணம் கொடுப்பதற்காகத் தமிழகத்தின் பல்வேறு பகுதிகளில் இருந்தும் ஏராளமான பக்தர்கள் பூம்புகார் சங்கமத்துறைக்கு படை எடுத்து வருவார்கள்.
காவிரி ஆறு கடலுடன் கலக்கும் சங்கமத்துறை, பித்ரு காரியங்களுக்கு உகந்த புனிதத் தலமாகப் போற்றப்படுகிறது. இங்கு அமர்ந்து, வேத விற்பன்னர்களின் உதவியுடன் எள், தண்ணீர், அரிசி, தர்ப்பை புல் போன்ற பொருட்களைப் பயன்படுத்தி, மறைந்த முன்னோர்களின் ஆத்மா சாந்தி அடைய வேண்டி சடங்குகள் செய்வார்கள். பின்னர், கடல் அல்லது ஆற்று நீரில் புனித நீராடி, தங்கள் முன்னோர்களுக்குப் பிண்டங்கள் சமர்ப்பித்து வழிபடுவார்கள். இந்த நிகழ்வின்போது, குடும்ப உறுப்பினர்கள் அனைவரும் ஒன்றிணைந்து, தங்கள் முன்னோர்களின் நினைவைப் போற்றுவார்கள்.
அமாவாசை சடங்குகளின் பின்னணி
இந்து தர்ம சாஸ்திரங்களின்படி, நம் முன்னோர்கள் பித்ருலோகத்தில் இருந்து குறிப்பிட்ட சில நாட்களில் பூமிக்கு வந்து தங்கள் சந்ததியினரைப் பார்க்க வருவதாக நம்பப்படுகிறது. அமாவாசை நாள், குறிப்பாக ஆடி அமாவாசை, முன்னோர்களுக்குத் தர்ப்பணம் அளிப்பதற்கான ஒரு முக்கிய நாளாகக் கருதப்படுகிறது. இந்நாளில் தர்ப்பணம் அளிப்பதன் மூலம், முன்னோர்களின் ஆசீர்வாதத்தைப் பெற்று, குடும்பத்தில் சுபிட்சம், அமைதி, வளம் ஆகியவை பெருகும் என்று ஐதீகம் கூறுகிறது. தர்ப்பணம் என்பது, முன்னோர்களுக்கு நாம் செலுத்தும் நன்றி கடனாகவும், அவர்களின் ஆன்மாக்களுக்கு சாந்தி அளிப்பதாகவும் அமைகிறது.
பக்தர்களின் எதிர்பார்ப்பு
இந்த ஆடி அமாவாசை நாளில், மயிலாடுதுறை மாவட்ட மக்கள் மட்டுமல்லாமல், தமிழகத்தின் பல்வேறு பகுதிகளில் இருந்தும் பூம்புகார் வரும் பக்தர்கள் தங்கள் முன்னோர்களுக்குத் தர்ப்பணம் அளித்து, அவர்களின் அருளைப் பெற்று, நல்வாழ்வு வாழ வேண்டும் என்பதே அவர்களின் எதிர்பார்ப்பாக இருந்து வருகிறது.
தலைப்பு செய்திகள்
ட்ரெண்டிங் செய்திகள்
