srilanka petrol crisis : அடுத்த மாதம் முதல் வாகனங்கள் இயங்குவது சந்தேகம்! பற்றாக்குறையில் சிக்கித் தவிக்கும் இலங்கை..!
இந்தியா அனுப்பும் கடைசிகட்ட எரிபொருள் இந்த மாதத்துடன் முடிவடையும் சூழலில் உள்ளதால் இலங்கை கடுமையான நெருக்கடியை சந்திக்கும் நிலைக்கு ஆளாகியுள்ளது.
இலங்கையில் ஏற்பட்டுள்ள கடுமையான பொருளாதார நெருக்கடி மூலமாக அந்த நாட்டு மக்கள் கடுமையான அவதிக்குள்ளாகி வருகின்றனர். அடிப்படைத் தேவைகளான உணவு மற்றும் எரிபொருளுக்கு கூட அந்த நாட்டு மக்கள் அவதியுறும் நிலைக்கு ஆளாகியுள்ளனர்.
மக்கள் போராட்டம், பொருளாதார நெருக்கடியால் அவதிக்குள்ளாகியுள்ள இலங்கைக்கு ஆறுதலாக இந்தியா மட்டும் உதவி வருகிறது. இலங்கையின் எரிபொருள் தேவைக்காக இந்தியா ரூபாய் 3 ஆயிரத்து 908 கோடிக்கு கடனுதவி அளித்துள்ளது. இந்தியா சார்பில் வழங்கப்பட உள்ள கடைசிகட்ட எரிபொருள் இந்த மாதம் இலங்கைக்கு சென்றடையும். இதற்கு பின்பு இலங்கை எரிபொருள் தேவைக்காக மிக கடுமையான நெருக்கடியை சந்திக்கும் நிலையில் உள்ளது.
இதுதொடர்பாக, இலங்கையின் எரிசக்தி துறை அமைச்சர் காஞ்சன விஜேசேகரா கூறியதாவது, “ இந்தியாவின் கடனுதவி மூலம் அனுப்பப்படும் டீசல் வரும் 16-ந் தேதியும், 22-ந் தேதியும் இலங்கை வந்தடையும். கடந்த வாரம் முன்னுரிமை அடிப்படையில் 2800- 3000 மெட்ரிக டன் மட்டுமே வழங்கினோம். வரும் வாரத்திற்கு தேவையான முழு டீசல் தற்போது வழங்கப்பட்டுள்ளது. நாட்டின் தினசரி பெட்ரோல் தேவை 3500 டன். கடந்த செவ்வாய் முதல் நாள்தோறும் 3000 முதல் 3200 டன் மெட்ரிக் டன் பெட்ரோல் தினமும் வழங்கப்படுகிறது.” இவ்வாறு அவர் கூறினார்.
இலங்கையில் அடுத்த மாதத்தில் போக்குவரத்து சேவைகள் முற்றிலும் முடங்கிய அபாயம் ஏற்பட்டுள்ள நிலையில், தற்போது தனியார் பேருந்து சேவைகளின் நிலை கேள்விக்குறியாகியுள்ளது. எரிபொருள் தட்டுப்பாடு, பெட்ரோல் மற்றும் டீசல் பற்றாக்குறை காரணமாக பல்வேறு தனியார் பேருந்து நிறுவனங்களும் சேவைகளை நிறுத்தும் முடிவுக்கு வந்துள்ளன.
கோத்தபய அரசின் தவறான நிர்வாக நடவடிக்கையே இலங்கையின் மோசமான பொருளாதார சூழலுக்கு காரணம் என்று குற்றம்சாட்டியுள்ள அந்த நாட்டு பொதுமக்கள் அவரை பதவி விலக கோரி தொடர்ந்து போராட்டத்தில் ஈடுபட்டு வருகின்றனர் என்பது குறிப்பிடத்தக்கது. ஏற்கனவே பிரதமராக பதவி வகித்த மகிந்த ராஜபக்சே பதவி விலகியநிலையில், ரணில் விக்கிரமசிங்க கடந்த மாதம் புதிய பிரதமராக பொறுப்பேற்றார்.
எரிபொருள் முழுவதும் தீர்ந்துவிட்டால் அதனால் ஏற்படும் பாதிப்புகளை இலங்கை எப்படி எதிர்கொள்ளப்போகிறது என்று தெரியவில்லை என்று பொருளாதார நிபுணர்கள் கவலை தெரிவித்துள்ளனர்.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்
தலைப்பு செய்திகள்
ட்ரெண்டிங் செய்திகள்
